દુ:ખદ સમાચાર...એશિયા કપ માટે ટીમની જાહેરાત પહેલા BCCI શોકમગ્ન, દિગ્ગજ ખેલાડીનું નિધન

BCCI : એશિયા કપ 2025 માટે BCCI ગમે ત્યારે ટીમની જાહેરાત કરી શકે છે, તેથી BCCIની દરેક પોસ્ટ પર બધાની નજર છે. એશિયા કપ માટે ટીમની જાહેરાત થાય તે પહેલા જ બોર્ડ શોકમાં ડૂબી ગયું છે. BCCI સાથે સંકળાયેલા એક મોટા વ્યક્તિનું નિધન થયું છે, જેના કારણે બોર્ડે શોક વ્યક્ત કર્યો છે. BCCI સચિવ દેવજીત સૈકિયાએ પણ આ દિગ્ગજ ખેલાડીના નિધન પર શોક વ્યક્ત કર્યો અને તેમને યાદ કર્યા.

80 વર્ષની વયે અવસાન

ભારતીય ક્રિકેટ કંટ્રોલ બોર્ડ (BCCI)એ ભૂતપૂર્વ ભારતીય ઓલિમ્પિયન અને જાણીતા સ્પોર્ટ્સ મેડિસિન નિષ્ણાત ડૉ. વેસ પેસના નિધન પર ઊંડો શોક વ્યક્ત કર્યો છે. તેમણે ગુરુવારે સવારે 80 વર્ષની વયે અંતિમ શ્વાસ લીધા. તેમણે 1972 મ્યુનિક ઓલિમ્પિકમાં ટીમ ઇન્ડિયા માટે બ્રોન્ઝ મેડલ જીત્યો હતો. એટલું જ નહીં, તેમણે 1971માં હોકી વર્લ્ડ કપમાં પણ પોતાના દેશનું પ્રતિનિધિત્વ કર્યું હતું.

BCCIએ કરી પોસ્ટ 

BCCIએ તેની મીડિયા એડવાઈઝરીમાં શોક વ્યક્ત કર્યો અને લખ્યું, '1972ના મ્યુનિક ઓલિમ્પિકમાં ભારતની બ્રોન્ઝ મેડલ વિજેતા પુરુષ હોકી ટીમના સભ્ય, ડૉ. પેસ પ્રતિભા ધરાવતા ખેલાડી અને પ્રશાસક હતા. BCCI તેમના પ્રત્યે ઊંડી સંવેદના વ્યક્ત કરે છે. તેમણે 1971ના હોકી વર્લ્ડ કપમાં પણ દેશનું પ્રતિનિધિત્વ કર્યું હતું. તેમની શાનદાર રમત કારકિર્દી પછી તેમણે સ્પોર્ટ્સ મેડિસિન ક્ષેત્રે પોતાને સમર્પિત કરી દીધા અને વિવિધ રમતોમાં ખેલાડીઓની સેવા કરવામાં વિશિષ્ટતા અને કાળજી સાથે યોગદાન આપ્યું.

એશિયા કપમાં ભારત માટે ઓપનિંગ કરશે આ બે ખતરનાક બેટ્સમેન, વિરોધી ટીમો પાણી ભરશે !

2010થી 2018 સુધી સેવા આપી

BCCIએ વધુમાં જણાવ્યું હતું કે, 'ડૉ. પેસ ઓક્ટોબર 2010થી માર્ચ 2018 સુધી BCCI સાથે એન્ટી-ડોપિંગ અને એજ વેરિફિકેશન કન્સલ્ટન્ટ તરીકે સંકળાયેલા હતા. તેમણે BCCIમાં એન્ટી-ડોપિંગ માટે માળખાગત શૈક્ષણિક કાર્યક્રમો શરૂ કર્યા, જેનાથી ખેલાડીઓ અને સપોર્ટ સ્ટાફમાં જાગૃતિ અને પાલનમાં નોંધપાત્ર વધારો થયો. તેમની કુશળતા અને પ્રતિબદ્ધતાએ બોર્ડના એન્ટી-ડોપિંગ શિક્ષણ અને પરીક્ષણ માળખાને મજબૂત બનાવવામાં તેમજ એજ વેરિફિકેશન અને ખેલાડી કલ્યાણ પહેલને અમલમાં મૂકવામાં મુખ્ય ભૂમિકા ભજવી. તેમની વ્યાવસાયિક પ્રામાણિકતા અને રમત પ્રત્યેના જુસ્સાએ ભારતીય ક્રિકેટની સપોર્ટ સિસ્ટમ્સ પર અમીટ છાપ છોડી.'

દેવજીત સૈકિયાએ શું કહ્યું ?

BCCI સેક્રેટરી દેવજીત સૈકિયાએ કહ્યું, 'ડૉ. પેસનું BCCI સાથે જોડાણ રમતગમતની ભાવનાનું રક્ષણ કરવામાં તેમની માન્યતાને પ્રતિબિંબિત કરે છે. ડોપિંગ વિરોધી ક્ષેત્રમાં તેમના અથાક કાર્ય, જેમાં શૈક્ષણિક પહેલની શરૂઆત અને ઉંમર ચકાસણીમાં તેમના પ્રયાસોનો સમાવેશ થાય છે, તેનાથી ક્રિકેટરોની ઘણી પેઢીઓને ફાયદો થયો છે. અમે લિએન્ડર પેસ, તેમના પરિવાર અને પ્રિયજનો પ્રત્યે અમારી હૃદયપૂર્વકની સંવેદના વ્યક્ત કરીએ છીએ.