 "બેટિંગ પ્રેક્ટિસ કે 'ખૂની ખેલ'... ઋષભ પંતની નીડરતાનું ખુલ્યું રહસ્ય, નેટમાં બોલરો પાસેથી કરતો હતો આવી ડિમાન્ડ")
Rishabh Pant: ટીમ ઈન્ડિયાના સ્ટાર બેટ્સમેન ઋષભ પંત હાલમાં પગની દર્દનાક ઈજામાંથી સ્વસ્થ થઈ રહ્યો છે. ઈંગ્લેન્ડ સામેની ટેસ્ટ સિરીઝમાં પંત ઈજાગ્રસ્ત થયો હતો અને ભારે પીડા સાથે બેટિંગ કરવા માટે મેદાનમાં ઉતર્યો હતો. પંતની ઘાતક બેટિંગની આજે આખી દુનિયામાં ચર્ચા થાય છે. પરંતુ તે આટલો ખતરનાક કેવી રીતે બન્યો તેની ઈનસાઈડ સ્ટોડી ખૂબ જ રસપ્રદ છે. પંતની નીડરતાનો પૂર્વ ભારતીય ક્રિકેટર સંજય બાંગરે ખુલાસો કર્યો છે. તેમણે જણાવ્યું કે, પંત નેટમાં બોલરો પાસેથી એવી માંગણીઓ કરતો હતો કે તે ધીમે ધીમે ખતરનાક બેટ્સમેન બની ગયો.
2022માં થયો હતો અકસ્માત
2022ના અંતમાં ડિસેમ્બર મહિનામાં ઋષભ પંત એક ભયાનક કાર અકસ્માતનો ભોગ બન્યો હતો. ઈજાઓ એટલી ગંભીર હતી કે એવું અનુમાન લગાવવામાં આવી રહ્યું હતું કે તે ભાગ્યે જ ક્યારેય ક્રિકેટ જગતમાં પાછો ફરશે. પરંતુ પંતે મૃત્યુને હરાવીને પોતાની હિંમતથી ટીમ ઈન્ડિયામાં ધમાકેદાર વાપસી કરી. હવે સંજય બાંગરે આ બહાદુર ખેલાડીની સફળતા પાછળની ઈનસાઈડ સ્ટોડી બધાની સામે મૂકી છે. સંજય બાંગરે તેની બહાદુરી પાછળનો ખુલાસો કર્યો છે.
સંજય બાંગરે શું કહ્યું?
સંજય બાંગરે દૂરદર્શન સ્પોર્ટ્સ સાથેની વાતચીતમાં કહ્યું કે, 'મેં આશિષ નેહરા પાસેથી સાંભળ્યું હતું કે, પંત એક મહાન ખેલાડી છે અને ટૂંક સમયમાં મોટું નામ બનાવશે. તે ગોડ ગિફ્ટેડ છે અને ખૂબ જ નીડર છે. મેં પોતે નેટમાં તેની નીડરતાની પહેલી ઝલક જોઈ હતી. તે પેસરોને તેના શરીર પર ફાસ્ટ બોલ ફેંકવાનું કહેતો હતો. બહુ ઓછા બેટ્સમેનોમાં આવી માનસિકતા હોય છે.'
સાચો સાબિત થયો નેહરા
તેમણે આગળ કહ્યું કે, 'તે સમયે તેણે IPL રમવાનું શરૂ કર્યું હતું. નેહરા સાચો હતો, ઘણા સમય પછી આપણને એવો વિકેટકીપર મળ્યો છે જે ટોપ-5 પોઝિશનમાં બેટિંગ કરી શકે છે.' પંતે ઇંગ્લેન્ડ પ્રવાસ પર રેકોર્ડબ્રેક પ્રદર્શન કર્યું. તેણે ટેસ્ટની બન્ને ઇનિંગ્સમાં સદી ફટકારીને ઘણા રેકોર્ડ પોતાના નામે કર્યા. જો કે, ઈજાને કારણે પંત એશિયા કપ 2025માં ટીમનો ભાગ નથી.
)