IPL 2025 : BCCIની મોટી કાર્યવાહી, મેદાન બહાર બેઠેલા દિલ્હીના આ દિગ્ગજ ખેલાડીને પણ ફટકાર્યો દંડ

IPL 2025 : IPL 2025ની 32મી મેચમાં દિલ્હી કેપિટલ્સે રાજસ્થાન રોયલ્સને સુપર ઓવરમાં હરાવ્યું હતું. આ જીત બાદ દિલ્હી કેપિટલ્સ સાથે જોડાયેલા એક મોટા સમાચાર સામે આવ્યા છે કે ટીમના બોલિંગ કોચ મુનાફ પટેલ પર 25 ટકા દંડ લગાવવામાં આવ્યો છે. આ સિવાય તેના ખાતામાં એક ડીમેરિટ પોઈન્ટ પણ જમા થયો છે. આ પાછળનું કારણ શું છે, તેના વિશે આ લેખમાં જાણીશું.

બોલિંગ કોચ પર કાર્યવાહી

દિલ્હી કેપિટલ્સના બોલિંગ કોચ મુનાફ પટેલને રાજસ્થાન રોયલ્સ સામેની મેચ દરમિયાન IPL આચાર સંહિતાનું ઉલ્લંઘન કરવા બદલ મેચ ફીના 25 ટકા દંડ ફટકારવામાં આવ્યો છે. તેના ખાતામાં એક ડીમેરિટ પોઈન્ટ જમા થઈ ગયો છે. બુધવારે રમાયેલી આ મેચ ખૂબ જ રોમાંચક હતી જેમાં દિલ્હીએ સુપર ઓવરમાં જીત મેળવી હતી. IPLના નિવેદન અનુસાર, ભૂતપૂર્વ ભારતીય ફાસ્ટ બોલરે રમતની ભાવનાથી વિપરીત વર્તન કરવા સંબંધિત IPL કોડ ઓફ કન્ડક્ટની કલમ 2.20ના લેવલ 1 હેઠળ ગુનો સ્વીકાર્યો છે.

નિવેદનમાં કહેવામાં આવ્યું છે કે, દિલ્હી કેપિટલ્સના બોલિંગ કોચ મુનાફ પટેલને રાજસ્થાન રોયલ્સ સામે રમાયેલી મેચ દરમિયાન IPL આચાર સંહિતાનું ઉલ્લંઘન કરવા બદલ તેમની મેચ ફીના 25 ટકા દંડ અને એક ડિમેરિટ પોઈન્ટ તેમના ખાતામાં જમા કરવામાં આવ્યો છે. મુનાફે મેચ રેફરીના આ નિર્ણયને સ્વીકારી લીધો છે. જો કે, નિવેદનમાં મુનાફે કઈ ભૂલ કરી છે તેનો ઉલ્લેખ નથી કર્યો પરંતુ એવું માનવામાં આવે છે કે તેને મેચ અધિકારી સાથે દલીલ કરવા બદલ સજા કરવામાં આવી છે.

Munaf Patel had a heated exchange with the 4th umpire during the #DCvRR match at the Arun Jaitley Stadium, Delhi after the umpire denied sending a player to enter the ground to convey his message.#DCvsRR #IPL2025 pic.twitter.com/hHv0tNAUvd

— Gaurav Chaudhary (@gkctweets) April 16, 2025

આ કારણે સજા મળી

મુનાફ તેના એક ખેલાડીને એક મેસેજ આપવા મેદાનમાં મોકલવા માંગતો હતો પરંતુ મેચ અધિકારીઓએ તેને તેમ કરવાની મંજૂરી આપી નહોતી. આ ઘટના દિલ્હીની બોલિંગ દરમિયાન બની હતી જ્યારે ફોર્થ અમ્પાયરે દિલ્હીના રિઝર્વ ખેલાડીને પટેલનો મેસેજ આપવા મેદાનમાં પ્રવેશતા અટકાવ્યો હતો. પૂર્વ ભારતીય ફાસ્ટ બોલર બાઉન્ડ્રી લાઇન પર અમ્પાયર સાથે દલીલ કરતો જોવા મળ્યો હતો. આ ઘટનાનો વીડિયો સોશિયલ મીડિયા પર વાયરલ થયો હતો.