 "ભારત-પાકિસ્તાન વચ્ચે મેચ રમાશે ? એશિયા કપને લઈને ભારત સરકારની મોટી જાહેરાત")
)
IND vs PAK Asia Cup 2025 : ભારત અને પાકિસ્તાન વચ્ચેની મેચો અંગે કેન્દ્ર સરકાર દ્વારા મોટી જાહેરાત કરવામાં આવી છે. ભારત સરકારે સ્પષ્ટ કર્યું છે કે ભારતીય ટીમ પાકિસ્તાન જશે નહીં અને પાકિસ્તાની ટીમને પણ ભારત આવવાની મંજૂરી આપવામાં આવશે નહીં.
બીજી તરફ, એશિયા કપ અને ICC ટુર્નામેન્ટ જેવી બહુ-રાષ્ટ્રીય ટુર્નામેન્ટને અલગ ગણવામાં આવશે. ભારત આમાં ભાગ લઈ શકે છે, જો કે તે તટસ્થ સ્થળે યોજવામાં આવે. રમતગમત મંત્રાલયના એક વરિષ્ઠ અધિકારીએ જણાવ્યું હતું કે ભારતની નીતિમાં કોઈ ફેરફાર કરવામાં આવ્યો નથી અને પાકિસ્તાન સાથે દ્વિપક્ષીય ક્રિકેટ સંબંધો પુનઃસ્થાપિત કરવાનો કોઈ પ્રશ્ન જ નથી.
પરંતુ એશિયા કપ એક બહુ-રાષ્ટ્રીય ટુર્નામેન્ટ હોવાથી, ટીમ ઈન્ડિયા તેમાં રમશે. આ નિર્ણય પછી એ સ્પષ્ટ થઈ ગયું છે કે ભારત-પાકિસ્તાન વચ્ચેની ટક્કર ફક્ત એશિયા કપ અથવા ICC ટુર્નામેન્ટ જેવા પ્લેટફોર્મ પર જ જોવા મળશે.
આ અધિકારીએ કહ્યું - ભારતીય ટીમો અને ખેલાડીઓ તે આંતરરાષ્ટ્રીય ટુર્નામેન્ટમાં ભાગ લેશે જેમાં પાકિસ્તાની ટીમો અથવા ખેલાડીઓ પણ ભાગ લેશે. તેવી જ રીતે પાકિસ્તાની ટીમો અને ખેલાડીઓને ભારતમાં યોજાનારી બહુ-રાષ્ટ્રીય ટુર્નામેન્ટમાં રમવાની મંજૂરી આપવામાં આવશે.
એશિયા કપમાં ભારત અને પાકિસ્તાન વચ્ચે મેચ ક્યારે છે
એશિયા કપમાં ભારત-પાકિસ્તાન 14 સપ્ટેમ્બરે ટકરાશે. 29 સપ્ટેમ્બરે ફાઇનલ મેચ થશે. આ ટુર્નામેન્ટ T20 આંતરરાષ્ટ્રીય ફોર્મેટમાં રમાશે. આ ટુર્નામેન્ટ 9 સપ્ટેમ્બરથી શરૂ થઈ રહી છે.
ભારત અને પાકિસ્તાન 2012-13 સીઝન પછી કોઈ દ્વિપક્ષીય ક્રિકેટ શ્રેણી રમ્યા નથી. ત્યારથી, બંને દેશોની પુરુષ અને મહિલા ટીમો ફક્ત બહુ-રાષ્ટ્રીય ટુર્નામેન્ટમાં જ એકબીજાનો સામનો કરી છે.
ભારતે સુરક્ષા કારણોસર 2023માં એશિયા કપ અને 2025માં ચેમ્પિયન્સ ટ્રોફી માટે પાકિસ્તાન જવાનો ઇનકાર કર્યો હતો. આ પછી, આ ટુર્નામેન્ટ તટસ્થ સ્થળોએ યોજાઈ હતી. તાજેતરમાં, પાકિસ્તાન હોકી ટીમે પણ ભારત જવાનો ઇનકાર કર્યો હતો, જ્યારે એશિયા કપ હોકી 28 સપ્ટેમ્બરથી રાજગીરમાં શરૂ થવાની છે.
પાકિસ્તાન માટે ભારતની સ્પોર્ટ્સ પોલિસી
પાકિસ્તાન માટે ભારતની સ્પોર્ટ્સ પોલિસી એ વાત પર પણ ભાર મૂકે છે કે ભારત હવે આંતરરાષ્ટ્રીય રમતગમત કાર્યક્રમો માટે એક વિશ્વસનીય સ્થળ તરીકે ઉભરી રહ્યું છે. આ અંતર્ગત, ખેલાડીઓ, ટીમ અધિકારીઓ, ટેકનિકલ સ્ટાફ અને આંતરરાષ્ટ્રીય રમતગમત સંગઠનોના અધિકારીઓ માટે વિઝા પ્રક્રિયા સરળ બનાવવામાં આવશે. ભારતને આંતરરાષ્ટ્રીય રમતગમત કાર્યક્રમોનું આયોજન કરવા માટે એક પસંદગીનું સ્થળ બનાવવાના ઉદ્દેશ્ય સાથે આ બધી શ્રેણીઓ માટે વિઝા પ્રક્રિયા સરળ બનાવવામાં આવશે.
