કોહલીએ આંતરરાષ્ટ્રીય ક્રિકેટમાં પૂરા કર્યા 12 વર્ષ, જાણો કેવી રહી તેની સફર

નવી દિલ્હીઃ ટીમ ઈન્ડિયાના કેપ્ટન વિરાટ કોહલીએ મંગળવારે આંતરરાષ્ટ્રીય ક્રિકેટમાં પોતાના 12 વર્ષ પૂરા કરી લીધા છે. કોહલીએ 18 ઓગસ્ટ 2008ના શ્રીલંકા વિરુદ્ધ વનડે રમીને આંતરરાષ્ટ્રીય ક્રિકેટમાં પર્દાપણ કર્યું હતું. તે પોતાની પ્રથમ વનડે મેચમાં 12 રન બનાવી શક્યો હતો. પરંતુ કોહલીએ સમયની સાથે ખુદને આંતરરાષ્ટ્રીય સ્તર પર સ્થાપિત કર્યો અને હાલના સમયમાં તેની ગણના વિશ્વના મહાન બેટ્સમેનોમાં થાય છે. 

વિરાટ કોહલીએ એમએસ ધોનીની આગેવાનીમાં પોતાનું પર્દાપણ કર્યું હતું. પર્દાપણ મેચમાં કોહલીએ ગૌતમ ગંભીર (0)ની સાથે ઈનિંગનો પ્રારંભ કર્યો હતો. તે મેચમાં ભારતની બેટિંગ ધરાશાયી થઈ ગઈ હતી. ટીમ ઈન્ડિયા તરફથી યુવરાજ સિંહે સૌથી વધુ 23 રન બનાવ્યા અને ટીમ માત્ર 146 રનમાં ઓલઆઉટ થઈ ગઈ હતી. 

પર્દાપણમાં ફ્લોપ રહ્યો હતો કોહલી
કોહલીએ પોતાની પર્દાપણ મેચમાં ભારત તરફથી પ્રથમ બાઉન્ડ્રી લગાવી હતી અને તે પણ ચામિંડા વાસના બોલ પર. કોહલીએ 22 બોલ પર 12 રન બનાવ્યા અને ફાસ્ટ બોલર નુવાન કુલસેકરાએ તેને એલબી આઉટ કર્યો હતો. દાંબુલામાં રમાયેલી આ મેચ ભારતે 8 વિકેટે ગુમાવી હતી અને શ્રીલંકાએ પાંચ મેચોની સિરીઝમાં 1-0ની લીડ મેળવી લીધી હતી. 

ઓસ્ટ્રેલિયાનો પ્રવાસઃ કરિયરનો 'ટર્નિંગ પોઈન્ટ'
કોહલીના કરિયરના ટર્નિંગ પોઈન્ટની વાત કરીએ તો તે 2011-2012ના ઓસ્ટ્રેલિયાના પ્રવાસ પર આવ્યો. પરંતુ હવે 4 ટેસ્ટ મેચોની સિરીઝમાં કાંગારૂએ ટીમ ઈન્ડિયાને ક્લીન સ્વીપ કરી, પરંતુ એડિલેડમાં રમાયેલી છેલ્લી ટેસ્ટમાં કોહલીએ સદી ફટકારી. જ્યારે પર્થમાં રમાયેલી ત્રીજી ટેસ્ટમાં તે 44 અને 75 રન બનાવવામાં સફળ રહ્યો હતો. આ ઈનિંગની મદદથી વિરાટે ઓસ્ટ્રેલિયાના ખેલાડીઓની નજરમાં અલગ ઓળખ બનાવી લીધી.