પાકિસ્તાની ક્રિકેટરને '804' નંબરવાળી કેપ પહેરવા બદલ સજા...ઈમરાન ખાન સાથે જોડાયેલો છે મામલો

Pakistan : પાકિસ્તાન ક્રિકેટમાં હાલ હાહાકાર મચી ગયો છે. તેનું મુખ્ય કારણ ટીમનું સતત શરમજનક પ્રદર્શન છે. પરંતુ આ દરમિયાન ક્રિકેટ સિવાયના એક સમાચાર આવી રહ્યા છે. પાકિસ્તાનના પૂર્વ કેપ્ટન અને પૂર્વ વડાપ્રધાન ઈમરાન ખાનને સમર્થન આપવા બદલ એક પાકિસ્તાની ક્રિકેટરને મોટો દંડ ફટકારવામાં આવ્યો છે.

હકીકતમાં પાકિસ્તાન ક્રિકેટ બોર્ડ (PCB)એ તેના 8 ખેલાડીઓને આચાર સંહિતાનું ઉલ્લંઘન કરવા બદલ દોષી ઠેરવ્યા છે અને તેમને દંડ ફટકાર્યો છે. તેમાં ઓલરાઉન્ડર આમિર જમાલનો પણ સમાવેશ થાય છે, જેના પર 1.3 મિલિયન પાકિસ્તાની રૂપિયાનો દંડ ફટકારવામાં આવ્યો છે.

ઈમરાન ખાન સાથે જોડાયેલ છે 804 નંબર 

ભારતીય રૂપિયામાં આ રકમ અંદાજે 4 લાખ રૂપિયા છે. જમાલને દંડ ફટકારવાનું કારણ તેની પહેરેલી કેપ નંબર '804' છે. પાકિસ્તાની મીડિયા રિપોર્ટ અનુસાર જમાલની ટોપી પર લખાયેલ નંબર '804' ઈમરાન ખાનની જેલની ઓળખ સાથે સંબંધિત છે. તેમજ તેને ઈમરાન ખાન સાથે એકતાનું પ્રતિક માનવામાં આવી રહ્યું છે. 2023થી અટકાયતમાં રહેલા ઈમરાનને જાન્યુઆરી 2025માં 14 વર્ષની નવી સજા થઈ હતી. તે હાલમાં ભ્રષ્ટાચારના અનેક આરોપોમાં રાવલપિંડી જેલમાં બંધ છે.

ઈમરાન જે જેલમાં બંધ છે, તેનો બેજ નંબર પણ '804' છે. 28 વર્ષીય જમાલે મુલ્તાનમાં ઈંગ્લેન્ડ સામેની પ્રથમ ટેસ્ટમાં મેદાન પર ઈન્ટરવ્યુ દરમિયાન આ કેપ પહેરી હતી. જેના કારણે તે આચારસંહિતા ભંગનો દોષી સાબિત થયો છે.

આ ખેલાડીઓને પણ દંડ ફટકારવામાં આવ્યો હતો

આમિર ઉપરાંત અન્ય ત્રણ ખેલાડીઓને પણ 5,00,000 પાકિસ્તાની રૂપિયાનો દંડ ફટકારવામાં આવ્યો છે. ત્રણેય પર નવેમ્બર 2024માં ઓસ્ટ્રેલિયા પ્રવાસ દરમિયાન ટીમ હોટલ મોડી પહોંચવાનો આરોપ છે.

પાકિસ્તાને તેના નવા T20 કેપ્ટન સલમાન આગા, સૈમ અયુબ, અબ્દુલ્લા શફીક અને અબ્બાસ આફ્રિદીને વર્ષની શરૂઆતમાં દક્ષિણ આફ્રિકા પ્રવાસ દરમિયાન કર્ફ્યુના નિયમોનું ઉલ્લંઘન કરવા બદલ દંડ પણ ફટકાર્યો છે.