 "IPL 2025 વચ્ચે આ ટીમ પર લાગ્યો ફરી મેચ ફિક્સિંગનો આરોપ, રિપોર્ટમાં ચોંકાવનારો દાવો")
)
IPL Match Fixing : IPL 2025ની 36મી મેચ રાજસ્થાન રોયલ્સ અને લખનૌ સુપર જાયન્ટ્સ વચ્ચે જયપુરના સવાઈ માનસિંહ સ્ટેડિયમમાં રમાઈ હતી. આ રોમાંચક મેચમાં રાજસ્થાન રોયલ્સને 2 રનથી હારનો સામનો કરવો પડ્યો હતો પરંતુ આ હાર કરતાં પણ વધુ આ હાર પાછળનો વિવાદ ચર્ચામાં છે. રાજસ્થાન ક્રિકેટ એસોસિએશન એડ-હોક સમિતિના સંયોજક જયદીપ બિહાનીએ હારને શંકાસ્પદ ગણાવી છે અને રાજસ્થાન રોયલ્સ સામે મેચ ફિક્સિંગના સનસનાટીભર્યા આરોપો લગાવ્યા છે.
છેલ્લી ઓવરમાં રમત પલટાઈ
181 રનના લક્ષ્યનો પીછો કરવા ઉતરેલી રાજસ્થાન રોયલ્સે શાનદાર શરૂઆત કરી હતી. યશસ્વી જયસ્વાલ અને 14 વર્ષીય વૈભવ સૂર્યવંશીએ પ્રથમ વિકેટ માટે 85 રન જોડ્યા હતા. છેલ્લી ત્રણ ઓવરમાં માત્ર 25 રનની જરૂર હતી અને ટીમની 8 વિકેટ બાકી હતી. અંતિમ ઓવરમાં 9 રનની જરૂર હતી ત્યારે એલએસજીના ઝડપી બોલર આવેશ ખાને એક શાનદાર યોર્કર બોલથી રમતને ફેરવી નાખી હતી. રાજસ્થાન 178 રનમાં ઓલઆઉટ થઈ ગયું હતું અને મેચ 2 રનથી હારી ગયું હતું.
આ હાર રાજસ્થાન માટે આઘાતજનક હતી કારણ કે હોમ ગ્રાઉન્ડ પર આટલી નજીકની મેચમાં જીતની અપેક્ષાઓ વધુ હતી. પરંતુ આ હારથી પ્રશ્નોનું એવું તોફાન ઊભું થયું કે ક્રિકેટપ્રેમીઓ અચંબામાં પડી ગયા.
RCA કન્વીનરનો ગંભીર આરોપ
જયદીપ બિહાનીએ એક ઈન્ટરવ્યુમાં રાજસ્થાન રોયલ્સની આ હાર પર સવાલ ઉઠાવ્યા હતા. તેણે કહ્યું કે તેમના હોમ ગ્રાઉન્ડ પર છેલ્લી ઓવરમાં માત્ર 9 રનની જરૂર હતી પરંતુ તેમ છતાં તેઓ હારી ગયા. આ સમજની બહાર છે અને કંઈક તો ગડબડ છે. રાજસ્થાન રોયલ્સના ઈતિહાસનો ઉલ્લેખ કરતા બિહાનીએ યાદ અપાવ્યું કે 2013માં ટીમના કેટલાક ખેલાડીઓ સ્પોટ ફિક્સિંગમાં સામેલ હતા. આ સિવાય ફ્રેન્ચાઈઝીના માલિક રાજ કુન્દ્રા પર સટ્ટાબાજીનો આરોપ હતો, જેના કારણે રાજસ્થાન રોયલ્સને 2016 અને 2017ની આઈપીએલ સીઝનમાંથી સસ્પેન્ડ કરવામાં આવી હતી.
બિહાનીએ આ હારની તપાસની માંગ કરી છે. તેણે ભારતીય ક્રિકેટ કંટ્રોલ બોર્ડ (BCCI) અને અન્ય તપાસ એજન્સીઓને આ મામલાની સંપૂર્ણ તપાસ કરવા વિનંતી કરી. તેમનું કહેવું છે કે આવી હારથી માત્ર ટીમની પ્રતિષ્ઠાને ઠેસ પહોંચતી નથી પરંતુ રાજસ્થાનના યુવા ક્રિકેટરોના મનોબળ પર પણ ખરાબ અસર પડે છે.
મેચ સુપર ઓવર સુધી ચાલી હતી
આ પહેલીવાર નથી જ્યારે રાજસ્થાન રોયલ્સ આટલી નજીકની મેચ હારી હોય. અગાઉ દિલ્હી કેપિટલ્સ (DC) સામે પણ, ટીમને છેલ્લી ઓવરમાં 9 રનની જરૂર હતી અને તેની 7 વિકેટ બાકી હતી. પરંતુ તે મેચ પણ સુપર ઓવરમાં ગઈ અને રાજસ્થાનને હારનો સામનો કરવો પડ્યો. તેમની સતત ચોથી હાર બાદ રાજસ્થાન રોયલ્સ હવે IPL 2025 પોઈન્ટ ટેબલમાં આઠમા ક્રમે છે, હવે તેની પાસે 8 મેચમાંથી માત્ર 2 જીત અને 4 પોઈન્ટ છે.
