વાનખેડેમાં રોહિતનો સુપરહિટ શો, ચકનાચૂર થયો ગબ્બરનો મોટો રેકોર્ડ, હવે કિંગ કોહલીનો વારો!

Rohit Sharma MI vs CSK: ઘણી મેચોમાં સારી શરૂઆત કરી હોવા છતાં પોતાની વિકેટ ગુમાવી રહેલા રોહિત શર્મા વાનખેડે સ્ટેડિયમમાં ફરીથી ફોર્મમાં આવી ગયા છે. ચેન્નાઈ સુપર કિંગ્સ સામે રમાયેલી મેચમાં હિટમેને પોતાના બેટથી તબાહી મચાવી દીધી હતી. 45 બોલમાં પોતાની ઈનિંગમાં મુંબઈ ઈન્ડિયન્સના પૂર્વ કેપ્ટને 76 રનની શાનદાર ઈનિંગ રમી અને ટીમને જીત તરફ દોરી ગયો હતો. IPL 2025માં રોહિતના બેટમાંથી આ પહેલી અડધી સદી હતી. આ ઇનિંગ સાથે હિટમેને ઘણા મોટા રેકોર્ડ પણ તોડી નાખ્યા છે. રોહિત આ ખાસ મામલે શિખર ધવન કરતા પણ આગળ નીકળી ગયો છે.

વાનખેડેના મેદાનમાં છવાયો હિટમેનનો જાદુ
ચેન્નાઈએ આપેલા 177 રનના ટાર્ગેટનો પીછો કરતા મુંબઈ ઈન્ડિયન્સને રોહિત શર્માએ રયાન રિકેલ્ટન સાથે મળીને મજબૂત શરૂઆત અપાવી હતી. બંનેએ પ્રથમ વિકેટ માટે 6.4 ઓવરમાં 63 રન જોડ્યા હતા. રિકલ્ટન 19 બોલમાં 24 રન બનાવીને આઉટ થયો હતો. 

જો કે, હિટમેને બીજા છેડેથી વિસ્ફોટક બેટિંગ ચાલુ રાખી અને સિઝનની પ્રથમ અડધી સદી ફટકારી હતી. રોહિતે 45 બોલમાં 76 રનની શાનદાર ઇનિંગ રમી હતી. આ ઇનિંગ દરમિયાન રોહિતે 4 ફોર અને 6 ગગનચુંબી સિક્સર પણ ફટકારી હતી. રોહિતે સૂર્યકુમાર યાદવ સાથે મળીને બીજી વિકેટ માટે અણનમ સદીની ભાગીદારી કરી હતી. સૂર્યાએ 30 બોલમાં 68 રન બનાવ્યા હતા.

ગબ્બરથી આગળ નીકળ્યો હિટમેન
રોહિત શર્મા હવે IPL ઈતિહાસમાં સૌથી વધુ રન બનાવનાર બેટ્સમેનોની યાદીમાં બીજા સ્થાને પહોંચી ગયો છે. ઇન્ડિયન પ્રીમિયર લીગમાં રોહિતના નામે હવે 6,786 રન છે. જ્યારે, ધવને આઈપીએલમાં રમતા 6,769 રન બનાવ્યા છે. હવે આ યાદીમાં માત્ર વિરાટ કોહલી જ રોહિતથી આગળ છે. 

કિંગ કોહલી IPLમાં સૌથી વધુ રન બનાવનાર બેટ્સમેન છે અને તેણે અત્યાર સુધીમાં 8,326 રન બનાવ્યા છે. રોહિત આઈપીએલના ઈતિહાસમાં સૌથી વધુ વખત મેન ઓફ ધ મેચ બનનાર ભારતીય ખેલાડી બન્યો છે. તેણે આ મામલે વિરાટને પાછળ છોડી દીધો છે. રોહિતને ચેન્નાઈ સામે 20મી વખત મેન ઓફ ધ મેચનો એવોર્ડ આપવામાં આવ્યો હતો.