 "આ Boycottની અસર તો નથી ને ? નથી વેચાઈ રહી ભારત vs પાકિસ્તાન મેચની ટિકિટો")
India vs Pakistan Tickets : એશિયા કપમાં ભારત અને પાકિસ્તાન વચ્ચે 14 સપ્ટેમ્બરે મેચ રમાશે. સામાન્ય રીતે ભારત-પાકિસ્તાન મેચને લઈને ચાહકોમાં જબરદસ્ત ક્રેઝ જોવા મળતો હોય છે, પરંતુ આ વખતે આવું જોવા મળી રહ્યું નથી. કારણ કે જ્યારે પણ ભારત-પાકિસ્તાન મેચ હોય છે, ત્યારે ટિકિટો થોડી મિનિટોમાં વેચાઈ જાય છે, પરંતુ આ વખતે એવું બન્યું નથી.
દુબઈ ઈન્ટરનેશનલ ક્રિકેટ સ્ટેડિયમમાં યોજાનારી મેચ માટે દર્શકોમાં ક્રેઝ જોવા મળી રહ્યો નથી. ટિકિટો હજુ પણ ઉપલબ્ધ છે અને લોકો ખરીદી રહ્યા નથી. 11 સપ્ટેમ્બર સાંજ સુધી અડધાથી વધુ ટિકિટો ઉપલબ્ધ હતી. ચેમ્પિયન્સ ટ્રોફી 2023માં આ જ મેદાન પર રમાયેલી છેલ્લી મેચની બધી ટિકિટો માત્ર ચાર મિનિટમાં વેચાઈ ગઈ હતી.
ટિકિટોનું ધીમું વેચાણ
ગુરુવારે રાત્રે 9 વાગ્યા સુધીમાં દુબઈ સ્ટેડિયમના લગભગ 50% સ્ટેન્ડમાં ટિકિટો ઉપલબ્ધ હતી. આ ટિકિટોની શરૂઆતની કિંમત 99 US ડોલર (રૂપિયા 8742) હતી, જ્યારે પ્રીમિયમ સીટોની કિંમત 4,534 US ડોલર (લગભગ 4 લાખ) હતી. ટિકિટનું વેચાણ 29 ઓગસ્ટના રોજ સત્તાવાર ભાગીદાર પ્લેટિનમલિસ્ટ દ્વારા શરૂ થયું હતું. જો કે, એશિયા કપની ગ્રુપ-સ્ટેજ મેચો માટે 13 US ડોલર (રૂપિયા 1148)ની શરૂઆતની કિંમતવાળી ટિકિટો વેચાઈ ગઈ છે. આ મેચ સાથે લગભગ 14,000 દિરહામ (રૂપિયા 3.36 લાખ)માં સાત મેચોનું ખાસ પેકેજ પણ ઓફર કરવામાં આવ્યું હતું.
Boycott અપીલની અસર ?
આ મેચનો સમય પહેલગામ આતંકવાદી હુમલા અને ભારતના 'ઓપરેશન સિંદૂર' પછી આવ્યો છે. ભારતે પાકિસ્તાન અને પાકિસ્તાન કબજા હેઠળના કાશ્મીરમાં આતંકવાદી ઠેકાણાઓને નિશાન બનાવ્યા હતા. કેટલાક ભારતીય ક્રિકેટરો અને નિષ્ણાતો દ્વારા બહિષ્કારની માંગ કરવામાં આવી છે અને બંને દેશોએ બહુરાષ્ટ્રીય ટુર્નામેન્ટમાં નિયમિતપણે એકબીજાનો સામનો કરવો જોઈએ કે કેમ તે અંગે ચર્ચા તીવ્ર બની છે.
કપિલ દેવે મેચનું સમર્થન કર્યું
ભૂતપૂર્વ ભારતીય કેપ્ટન કપિલ દેવે શાંતિ જાળવવા અને ક્રિકેટ પર ધ્યાન કેન્દ્રિત કરવાની અપીલ કરી અને કહ્યું, "બસ જાઓ અને જીતો. જેમનું કામ રમવાનું છે તેમણે ફક્ત રમવા પર ધ્યાન કેન્દ્રિત કરવું જોઈએ. બીજું કંઈ કહેવાની જરૂર નથી. તેને મોટો મુદ્દો ન બનાવો. સરકાર પોતાનું કામ કરશે અને ખેલાડીઓએ પોતાનું કામ કરવું જોઈએ.'' ભારતીય ક્રિકેટ કંટ્રોલ બોર્ડ (BCCI)એ ફરીવાર કહ્યું છે કે તે કેન્દ્ર સરકારની નીતિનું પાલન કરે છે અને ફક્ત બહુરાષ્ટ્રીય ટુર્નામેન્ટમાં જ પાકિસ્તાન સાથે રમે છે.
)