 "6, 6, 6, 6, 6, 6, 6, 6, 6, 6, 6... 2 ઓવરમાં 11 સિક્સ ફટકારીને ભારતીય બેટ્સમેને રચ્યો ઈતિહાસ")
આ અદ્ભુત બેટિંગ પ્રદર્શન કેરળ ક્રિકેટ લીગની 19મી મેચમાં જોવા મળ્યું. આ મેચ અદાણી તિરુવનંતપુરમ રોયલ્સ અને કાલિકટ ગ્લોસ્ટર્સ વચ્ચે તિરુવનંતપુરમના ગ્રીનફિલ્ડ ઇન્ટરનેશનલ સ્ટેડિયમમાં રમાઈ હતી, જેમાં ગ્લોસ્ટર્સ ટીમે પહેલા બેટિંગ કરીને 6 વિકેટ ગુમાવીને 186 રન બનાવ્યા હતા. આ ઇનિંગમાં, 28 વર્ષીય બેટ્સમેન તરફથી અદ્ભુત બેટિંગ જોવા મળી.
કાલિકટ ગ્લોસ્ટર્સ ટીમ પહેલા બેટિંગ કરવા માટે ઉતરી. 13 ઓવર પછી ટીમનો સ્કોર 76/3 હતો. 14મી ઓવરના પહેલા બોલ પર નિખિલે સુરેશ સચિનને આઉટ કર્યો. આ પછી સલમાન નિજર ક્રીઝ પર આવ્યો, જેણે સિક્સરનો વરસાદ કર્યો. જોકે, 18મી ઓવર સુધી સલમાને 13 બોલનો સામનો કરીને ફક્ત 17 રન બનાવ્યા હતા. ટીમ 115/6નો સન્માનજનક સ્કોર બનાવવા માટે પણ સંઘર્ષ કરી રહી હતી, પરંતુ આ તોફાન પહેલાની શાંતિ હતી.
છેલ્લી બે ઓવરમાં સિક્સરનો વરસાદ
છેલ્લી બે ઓવરમાં સલમાનનું જબરદસ્ત ફોર્મ જોવા મળ્યું, તેણે 12 બોલમાં 11 છગ્ગા ફટકાર્યા. ક્રિકેટ ઇતિહાસમાં ભાગ્યે જ જોવા મળે છે કે કોઈ બેટ્સમેન બોલરોને આટલી નિર્દયતાથી પછાડે. 28 વર્ષીય સલમાને 19મી ઓવરના પહેલા 5 બોલ પર છગ્ગા ફટકાર્યા અને છેલ્લા બોલ પર સિંગલ લઈને સ્ટ્રાઈક પોતાની પાસે રાખી. આ પછી ઇનિંગની છેલ્લી ઓવરમાં વધુ ઉગ્ર ફોર્મ બતાવતા આ બેટ્સમેને 6 છગ્ગા ફટકાર્યા. જોકે, આ સળંગ નહોતા. પહેલા બોલે છગ્ગા પછી, બીજો બોલ વાઈડ હતો. ત્રીજો બોલ નો બોલ હતો, જેના પર 2 રન અને પછી 5 છગ્ગા ફટકાર્યા હતા.
26 બોલમાં અણનમ 86 રન બનાવ્યા
સલમાને આ મેચમાં 26 બોલમાં 86 રનની જ્વલંત ઇનિંગ રમી. રસપ્રદ વાત એ છે કે આ ઇનિંગમાં તેના બેટથી એક પણ ફોર નીકળી નહોતી. તેણે 330ની ઘાતક સ્ટ્રાઇક રેટથી હવામાં ફાયરિંગ કરતા 12 છગ્ગા ફટકાર્યા. છેલ્લી બે ઓવરમાં જે બન્યું તે બાસિલ થંપી અને અભિજીત પ્રવીણે ક્યારેય વિચાર્યું પણ નહીં હોય. આ બે બોલરો હતા જેમના 12 બોલ પર સલમાને 11 છગ્ગા ફટકારવાની સિદ્ધિ મેળવી હતી. અભિજીતે છેલ્લી ઓવર ફેંકી જેમાં તેણે 40 રન આપ્યા. તો 19મી ઓવરમાં 31 રન બન્યા.
સલમાન નિઝાર કોણ છે ?
સલમાન નિઝાર એક ભારતીય ક્રિકેટર છે જે ઘરેલુ ક્રિકેટમાં કેરળનું પ્રતિનિધિત્વ કરે છે. તે ડાબોડી બેટ્સમેન અને રાઈટ હેન્ડ ઓફ સ્પિનર છે. અંડર-14, અંડર-16 અને અંડર-23 સ્તરે કેરળનું પ્રતિનિધિત્વ કર્યા પછી, સલમાને 6 ફેબ્રુઆરી 2015ના રોજ આસામ સામે 2014-15 રણજી ટ્રોફીમાં કેરળ માટે ફર્સ્ટ-ક્લાસ ડેબ્યૂ કર્યું. તેણે 25 ફેબ્રુઆરી 2017ના રોજ ત્રિપુરા સામે 2016-17 વિજય હજારે ટ્રોફીમાં કેરળ માટે લિસ્ટ એ ડેબ્યૂ કર્યું. સલમાને 8 જાન્યુઆરી 2018ના રોજ હૈદરાબાદ સામે 2017-18 ઝોનલ ટી20 લીગમાં કેરળ માટે ટી20 ડેબ્યૂ કર્યું. ટી20માં તેનો શ્રેષ્ઠ સ્કોર અણનમ 99 રન છે.
)