 "અસંભવ ! ક્રિકેટ ઇતિહાસની સૌથી મોટી અજાયબી...આ 3 બોલરોએ T20માં તમામ 4 ઓવર મેડન ફેંકી")
)
Unique Cricket Records : ક્રિકેટમાં કોઈપણ સમયે કંઈપણ થઈ શકે છે. ક્રિકેટ એ અનિશ્ચિતતા અને રોમાંચની રમત છે. T20 ક્રિકેટમાં કોઈ પણ બોલર માટે 4 મેડન ઓવર નાખવાનું વિચારવું પણ મુશ્કેલ હોય છે અને મોટાભાગના લોકોને આ મજાક લાગી શકે છે, પરંતુ 20-20 ઓવરના આ ફોર્મેટમાં આ અશક્ય લાગતો રેકોર્ડ પણ બની ગયો છે. વિશ્વમાં એવા ત્રણ બોલર છે જેમણે T20 આંતરરાષ્ટ્રીય ક્રિકેટમાં તેમના ક્વોટાની તમામ 4 મેડન ઓવર ફેંકી છે.
સાદ બિન ઝફર (કેનેડા)
કેનેડિયન લેફ્ટ આર્મ સ્પિનર સાદ બિન ઝફરે 14 નવેમ્બર 2021ના રોજ પનામા સામે રમાયેલી ICC મેન્સ T20 વર્લ્ડ કપ અમેરિકા રિજન ક્વોલિફાયર મેચમાં 4 ઓવરના તેના ક્વોટાની તમામ 4 ઓવરો મેડન નાખી હતી. સાદ બિન ઝફરે કોઈ રન આપ્યા વિના 4 મેડન ઓવર ફેંકી હતી અને પનામા વિરુદ્ધ 4 ઓવરમાં 2 વિકેટ પણ લીધી હતી. આ મેચમાં પ્રથમ બેટિંગ કરતા કેનેડાની ટીમે 20 ઓવરમાં 1 વિકેટે 245 રન બનાવ્યા હતા અને પનામાને 246 રનનો ટાર્ગેટ આપ્યો હતો. જવાબમાં પનામાની ટીમ 17.2 ઓવરમાં 37 રનમાં ઓલઆઉટ થઈ ગઈ હતી અને કેનેડાએ 208 રનથી મેચ જીતી લીધી હતી.
લોકી ફર્ગ્યુસન (ન્યુઝીલેન્ડ)
ન્યુઝીલેન્ડના ફાસ્ટ બોલર લોકી ફર્ગ્યુસને 17 જૂન 2024ના રોજ પાપુઆ ન્યુ ગીની સામે રમાયેલી T20 વર્લ્ડ કપ મેચમાં તેના 4 ઓવરના ક્વોટાની તમામ 4 ઓવર મેડન નાખી હતી. લોકી ફર્ગ્યુસને પાપુઆ ન્યુ ગીની સામે 4 ઓવરમાં કોઈ રન આપ્યા વિના 3 વિકેટ પણ પોતાના નામે કરી. આ મેચમાં પાપુઆ ન્યુ ગિનીની ટીમ 19.4 ઓવરમાં 78 રનમાં ઓલઆઉટ થઈ ગઈ હતી. જવાબમાં ન્યૂઝીલેન્ડની ટીમે માત્ર 12.2 ઓવરમાં જ ટાર્ગેટ હાંસલ કરી લીધો હતો. ન્યુઝીલેન્ડે 46 બોલ બાકી રહેતા 7 વિકેટે મેચ જીતી લીધી હતી.
આયુષ શુક્લા (હોંગકોંગ)
હોંગકોંગના મધ્યમ ઝડપી બોલર આયુષ શુક્લાએ 31 ઓગસ્ટ 2024ના રોજ મંગોલિયા સામેની ICC મેન્સ T20 વર્લ્ડ કપ એશિયા ક્વોલિફાયર-A મેચમાં 4 ઓવરના તેના ક્વોટાની તમામ 4 ઓવર મેડન નાખી હતી. આયુષ શુક્લાએ 4 ઓવરમાં કોઈ રન આપ્યા વિના 4 મેડન ઓવર ફેંકીને 1 વિકેટ પણ લીધી હતી. આ મેચમાં મંગોલિયાની ટીમ 14.2 ઓવરમાં 17 રનમાં ઓલઆઉટ થઈ ગઈ હતી. જવાબમાં હોંગકોંગની ટીમે માત્ર 1.4 ઓવરમાં જ ટાર્ગેટ હાંસલ કરી લીધો હતો. હોંગકોંગે 110 બોલ બાકી રહેતા 9 વિકેટે મેચ જીતી લીધી હતી.
