અહીં જમીનમાંથી મળ્યો 8,64,86,04,800 રૂપિયાના સોનાના સિક્કાનો ખજાનો, જોઈને ઉડી ગયા બધાના હોશ!

Rediscovery of a Hidden Treasure in Europe: યુરોપમાંથી એક અનોખી શોધ સામે આવી છે. અહીં 50 વર્ષથી વધુ સમયથી જમીનમાં દટાયેલા કિંમતી સોનાના સિક્કાઓનો છુપાયેલો ભંડાર મળી આવ્યો છે. તેની કિંમત હવે 10 કરોડ યુએસ ડોલર (લગભગ 16 કરોડ ઓસ્ટ્રેલિયન ડોલર)થી વધારે એટલે કે 8,64,86,04,800 ભારતીય રૂપિયા છે. આ દુર્લભ ખજાનો 'ટ્રાવેલર્સ કલેક્શન' તરીકે ઓળખાય છે. તે જ સમયે, નિષ્ણાતોએ તેને 'હરાજી માટે અત્યાર સુધીનો સૌથી મૂલ્યવાન સિક્કા સંગ્રહ' ગણાવ્યો છે, જેમાં એક રસપ્રદ વાર્તા પણ છુપાયેલી છે. 

સોનાના સિક્કાઓના છુપાયેલા ખજાનાની શોધ અને હરાજી
નિષ્ણાતોએ જણાવ્યું કે, આ સિક્કા 50 વર્ષ પહેલાં જમીન નીચે છુપાવવામાં આવ્યા હતા. જો કે, 5 દાયકા પછી તેઓ ફરીથી શોધાયા છે. હાલમાં ખજાનો બેન્કમાં સુરક્ષિત રાખવા માટે ટ્રાન્સફર કરવામાં આવ્યો છે અને આ સિક્કાઓનો સંગ્રહને ન્યુમિસ્મેટિકા આર્સ ક્લાસિકા (NAC)માં 20 મે 2025થી શરૂ થનારી હરાજીની સિરીઝમાં ઓફર કરવામાં આવશે. ખાસ હરાજીના ઉદ્ધાટનમાં ચાર્લ્સ II થી લઈ જ્યોર્જ VI સુધીના રાજાઓના શાસનકાળના બ્રિટિશ મશીન-સ્ટ્રાઈક સિક્કાઓ દર્શાવવામાં આવશે. NACના ડિરેક્ટર આર્ટુરો રુસો કહે છે કે, સંગ્રહમાં રહેલા ઘણા સિક્કા 80 વર્ષથી વધુ સમયથી જોવા મળ્યા નથી અને કેટલાક અગાઉ ક્યારેય સત્તાવાર ન્યુમિસ્મેટિક આર્કાઇવ્સમાં નોંધાયેલા નથી.

ટ્રાવેલર્સ કલેક્શનમાં કેટલીક સૌથી નોંધપાત્ર વસ્તુઓ અજોડ મૂલ્ય અને ઐતિહાસિક મહત્વ ધરાવતા ઘણા સોનાના સિક્કા છે. જેમાંથી એક છે 1929નો 100 ડ્યુકેટનો સોનાનો સિક્કો, જે હેબ્સબર્ગના ફર્ડિનેન્ડ III માટે બનાવવામાં આવ્યો હતો. તેનું વજન 348.4 ગ્રામ છે અને તેની અંદાજિત કિંમત આશરે 1.35 મિલિયન યુએસ ડોલર (આશરે 11,32,90,000 રૂપિયા) છે. બીજી ખાસ વાત એ છે કે 1621માં પોલિશ રાજા સિગિસ્મંડ III માટે બનાવવામાં આવેલ 70 ડ્યુકેટનો સોનાનો સિક્કો, જેનું વજન 243 ગ્રામ છે અને તેની કિંમત લગભગ 471,700 યુએસ ડોલર (અંદાજે 3,98,99,544.83 ભારતીય રૂપિયા ) છે.

ટ્રાવેલર કલેક્શનનો ઇતિહાસ અને જમીન નીચે છુપાયેલો ખજાનો
ટ્રાવેલર કલેક્શનનો ઇતિહાસ 1929ની વોલ સ્ટ્રીટ દુર્ઘટના પછી શરૂ થાય છે. એક યુરોપિયન કલેક્ટર તથા તેની પત્ની યુરોપ અને અમેરિકાના દુર્લભ અને સૌથી મહત્વપૂર્ણ સિક્કાઓની શોધમાં નીકળ્યા. ઇતિહાસ, દુર્લભતા અને સુંદરતાથી પ્રેરિત થઈને તેમણે કાળજીપૂર્વક એક વિવિધ સંગ્રહ બનાવ્યો. જેમાં દરેક સંપાદનનું સંપૂર્ણ દસ્તાવેજીકરણ કરવામાં આવ્યું હતું.

જ્યારે બીજા વિશ્વયુદ્ધ (World War II)નો ખતરો મંડરાઈ રહ્યો હતો અને નાઝી સેનાએ યુરોપ પર કબજો કરવાનું શરૂ કર્યું, ત્યારે કલેક્ટરે પોતાના કિંમતી ખજાનાની સુરક્ષા માટે આ નિર્ણય લીધો. તેમણે સિક્કાઓને સિગાર બોક્સ અને એલ્યુમિનિયમ સિલિન્ડરોમાં રાખીને તેને સુરક્ષિત રાખવા માટે તેને જમીનમાં દાટી દીધા. અહીં સૌથી આશ્ચર્યજનક વાત એ છે કે આ પછી કલેક્ટર રેકોર્ડમાંથી ગાયબ થઈ ગયા અને તેમની સાથે દટાયેલા ખજાનાનું સ્થાન દાયકાઓ સુધી અજાણ રહ્યું.

તોમન અને સિક્કાનો એક દુર્લભ ખજાનો
ટ્રાવેલર્સ કલેક્શનમાં પાંચ તોમાનનો અતિ દુર્લભ સંગ્રહ પણ શામેલ છે. જેને 18મી સદીના અંતમાં અને 19મી સદીની શરૂઆતમાં આગા મોહમ્મદ ખાન કજર દ્વારા તેહરાન અને ઇસ્ફહાનમાં બનાવવામાં આવ્યા હતા. જાણવા મળી રહ્યું છે કે, સિક્કાઓના ફક્ત પાંચ સંપૂર્ણ સેટ બચ્યા છે. જેમાંથી એક યુકેના ઓક્સફર્ડમાં એશમોલિયન મ્યુઝિયમમાં છે. આ સંગ્રહમાંથી એક મહાન વસ્તુ 50 તોમન સિક્કો છે, જે દુર્લભ સેટમાંનો એક છે. આની પણ હરાજી કરવામાં આવશે.

ખાસ કરીને ટ્રાવેલર્સ કલેક્શનમાં 100થી વધુ પ્રદેશોના સિક્કાઓનો સમાવેશ થાય છે, જે પ્રાચીન સમાજોથી લઈને આજના દિવસ સુધીના ઇતિહાસને આવરી લે છે. નિષ્ણાતો ખાસ કરીને તેની વિશાળ વિવિધતા, ઉત્તમ ગુણવત્તા અને મોટાભાગની વસ્તુઓની શ્રેષ્ઠ સુરક્ષાથી પ્રભાવિત થયા છે. NAC દ્વારા જારી કરાયેલી પ્રેસ રિલીઝ એ હકીકત તરફ ધ્યાન દોરે છે કે 'ઘણા પ્રકારના સિક્કા ક્યારેય જાહેર હરાજીમાં ઓફર કરવામાં આવ્યા નથી, જે સંગ્રહમાં રહેલા ઘણા સિક્કાઓની વિશિષ્ટતા અને મહત્વ પર ભાર મૂકે છે.