પૃથ્વીના ઈતિહાસમાં ઓગસ્ટ-2025 ત્રીજો સૌથી ગરમ મહિનો! શું આ છે પૃથ્વીના ખતરાની ઘંટડી? રિપોર્ટમાં મોટો દાવો

August third-hottest globally on record: દિવાળી આવતા જ વાતાવરણમાં ઠંડક પ્રસરી જાય છે. પણ આ વર્ષે ઓક્ટોબર મહિનામાં પણ ગરમીનો અહેસાસ થઈ રહ્યો છે. આ ગ્લોબલ વોર્મિંગની અસર છે. તાજેતરમાં, યુરોપિયન એજન્સી કોપરનિક્સ ક્લાઈમેટ ચેન્જ સર્વિસના એક રિપોર્ટમાં પણ આ જ વાત સામે આવી છે. આ રિપોર્ટ અનુસાર, ઓગસ્ટ 2025 માનવ ઈતિહાસનો ત્રીજો સૌથી ગરમ મહિનો હતો. ચાલો આ વિશે વધુ વિગતવાર જોઈએ.

ઓગસ્ટ 2025: ગરમીનો નવો રેકોર્ડ
ઓગસ્ટ 2025માં પૃથ્વી પરનું સરેરાશ તાપમાન 16.6 ડિગ્રી સેલ્સિયસ નોંધાયું હતું. આ આંકડો 1991થી 2020ના સરેરાશ તાપમાન કરતાં 0.49 ડિગ્રી વધારે છે. આ ઓગસ્ટ મહિનો 2023 અને 2024 પછીનો ત્રીજો સૌથી ગરમ ઓગસ્ટ હતો. આશ્ચર્યની વાત એ છે કે, સતત ત્રણ વર્ષથી ઓગસ્ટ મહિનામાં ગરમીના નવા રેકોર્ડ બની રહ્યા છે. 2024નો ઓગસ્ટ મહિનો અત્યાર સુધીનો સૌથી ગરમ ઓગસ્ટ હતો, અને 2025નો ઓગસ્ટ તેનાથી માત્ર 0.22 ડિગ્રી જ ઓછો ગરમ હતો.

ગ્લોબલ વોર્મિંગની ગંભીર અસરો
આબોહવા પરિવર્તન એટલે કે ક્લાઈમેટ ચેન્જની ગંભીર અસરો હવે સમગ્ર વિશ્વમાં જોવા મળી રહી છે. ઔદ્યોગિક ક્રાંતિ પહેલાંના સમયની સરખામણીમાં, હવે પૃથ્વીના સરેરાશ તાપમાનમાં 1.29 ડિગ્રીનો વધારો નોંધાઈ ચૂક્યો છે. આ ઉપરાંત, ઓગસ્ટ 2025માં સમુદ્રની સપાટી પરનું સરેરાશ તાપમાન 20 ડિગ્રી સેલ્સિયસ નોંધાયું હતું. પેરિસ કરારમાં પૃથ્વીના સરેરાશ તાપમાનને 1.5 ડિગ્રી સેલ્સિયસ કરતાં ઓછું રાખવાનો લક્ષ્યાંક હતો, પરંતુ તે લક્ષ્યાંક પહેલેથી જ પાર થઈ ગયો છે. આ ગ્લોબલ વોર્મિંગનો મુખ્ય કારણ ગ્રીનહાઉસ ગેસનું ઉત્સર્જન છે. દુનિયાભરના દેશો વચ્ચે આ ઉત્સર્જન ઘટાડવા માટે કરારો થાય છે, પરંતુ તેનો યોગ્ય રીતે અમલ થતો નથી.

યુરોપમાં હીટવેવ અને વિનાશ
ઓગસ્ટ 2025માં યુરોપના ઘણા દેશોમાં ભયંકર લૂ (હીટવેવ)નો અનુભવ થયો. યુરોપનું સરેરાશ તાપમાન 19.46 ડિગ્રી સેલ્સિયસ નોંધાયું હતું. આ ગરમીના કારણે જંગલોમાં ભીષણ આગ લાગી હતી, જેના પરિણામે 1100 લોકોનાં મોત થયા હતા. પશ્ચિમ યુરોપ, દક્ષિણ-પૂર્વ યુરોપ અને તુર્કી જેવા દેશો સૌથી વધુ પ્રભાવિત થયા હતા.

યુરોપિયન એજન્સી કોપરનિક્સ ક્લાઈમેટ ચેન્જ સર્વિસના વડા સામંથા બર્ગેસે પણ આ વાતની પુષ્ટિ કરી છે કે જૂનથી ઓગસ્ટની ગરમી માનવ ઈતિહાસની ત્રીજી સૌથી ભયાનક ગરમી હતી. આ બધા આંકડા અને ઘટનાઓ સ્પષ્ટપણે દર્શાવે છે કે આપણે ગ્લોબલ વોર્મિંગની ગંભીર અસરોનો સામનો કરી રહ્યા છીએ. જો આ પરિસ્થિતિને અટકાવવામાં નહીં આવે, તો ભવિષ્યમાં આના કરતાં પણ વધુ ગંભીર પરિણામો જોવા મળી શકે છે.