 "ભારતથી વધુ ચીન ખરીદે છે રશિયા પાસેથી તેલ, તો પછી કેમ ન લગાવ્યો ટેરિફ? આવી ગયો અમેરિકાનો જવાબ")
)
US on China India Tariff: રશિયા પાસેથી તેલ ખરીદવા બદલ અમેરિકાના રાષ્ટ્રપતિએ તાજેતરમાં ભારત પર 25 ટકાનો વધારાનો ટેરિફ લગાવ્યો છે. જો કે, ચીન પણ રશિયા પાસેથી તેલ ખરીદે છે, પરંતુ અમેરિકાએ ચીન પર વધારાનો ટેરિફ લગાવ્યો નથી. ટીકાકારો પૂછી રહ્યા છે કે, જ્યારે ચીન રશિયા પાસેથી સૌથી મોટો તેલ ખરીદનાર દેશ છે ત્યારે તેના પર આવા ટેક્સ કેમ લાદવામાં આવ્યા નથી. અમેરિકાના વિદેશ મંત્રીએ હવે આ અંગે એક નિવેદન બહાર પાડ્યું છે.
સ્પષ્ટતા આપતાં અમેરિકાના વિદેશ મંત્રી માર્કો રુબિયોએ કહ્યું કે, જો ચીન પર પણ કડક પ્રતિબંધો લાદવામાં આવે છે, તો દુનિયાભરમાં ઊર્જા (તેલ-ગેસ)ના ભાવ વધશે અને બજારમાં મોટી ગડબડ થઈ શકે છે. ફોક્સ બિઝનેસને આપેલા ઇન્ટરવ્યુમાં રુબિયોએ સ્વીકાર્યું કે, ચીન પર અમેરિકાએ કોઈ નવા પ્રતિબંધો લગાવ્યા નથી, જ્યારે ભારત પર પહેલાથી જ 25% ટેક્સની ઉપર વધુ 25% ટેક્સ લાદવામાં આવ્યો છે. આનાથી ભારત અને અમેરિકા વચ્ચેના સંબંધોમાં તણાવ પેદા થયો છે. ટ્રમ્પે તો એમ પણ કહ્યું છે કે, ભારતનું અર્થતંત્ર 'મૃત' છે.
ચીન પર શું બોલ્યા વિદેશ મંત્રી રુબિયો
જ્યારે ભારતે અમેરિકા દ્વારા લાદવામાં આવેલા આ ટેક્સોને અન્યાયી ગણાવ્યા છે અને કહ્યું કે, તે તેના દેશના હિતો અને આર્થિક સુરક્ષાના રક્ષણ માટે જરૂરી પગલાં લેશે. આ અંગે રુબિયોએ કહ્યું કે, 'જો ચીન પર તેલ ખરીદવાને લઈ પ્રતિબંધો લાદવામાં આવે છે, તો ચીન તે તેલને રિફાઈન કરીને વૈશ્વિક બજારમાં વેચે છે. આ કારણે અન્ય દેશોએ પણ મોંઘુ તેલ ખરીદવું પડશે અથવા નવો વિકલ્પ શોધવો પડશે.'
સૌથી વધુ ટેરિફ ભારત-બ્રાઝિલ પર
અમેરિકાએ ભારત પર 25 ટકા વધારાનો ટેરિફ લગાવ્યો હતો, જ્યાર બાદ હવે કુલ ટેરિફ 50 ટકા થઈ ગયો છે. આ ટેરિફ 2025માં ડોનાલ્ડ ટ્રમ્પના રાષ્ટ્રપતિ તરીકે લાદવામાં આવ્યો છે. તેનું મુખ્ય કારણ રશિયા પાસેથી તેલની ખરીદી છે. અમેરિકા દ્વારા કોઈપણ દેશ પર લાદવામાં આવેલ આ સૌથી વધુ ટેરિફ છે. ભારત સિવાય બ્રાઝિલ એકમાત્ર એવો દેશ છે જેના પર અમેરિકાએ 50 ટકા ટેરિફ લગાવ્યો છે.
