Hurricane Kiko: આવી રહ્યું છે ભયંકર તોફાન, 215KM ની ઝડપે આવશે તબાહી, હવામાન વિભાગનું એલર્ટ

તોફાન કિકોએ અમેરિકાને ખુબ ટેન્શનમાં નાખ્યું છે. હવામાન વિભાગે ચેતવણી આપી છે કે પ્રશાંત મહાસાગરમાં ઉઠેલું હરિકેન કિકો(Hurricane Kiko) એકવાર ફરીથી તેજી પકડીને કેટેગરી 4નું ખતરનાક તોફાન બની ગયું છે અને આગામી કેટલાક દિવસોમાં તેની અસર હવાઈ ટાપુઓ પર પડી શકે છે. જ્યારે પોસ્ટ ટ્રોપિકલ સાઈક્લોન લોરેનાએ મેક્સિકોના બાજા કેલિફોર્નિયા પ્રાયદ્વિપને ભારે વરસાદથી તરબોળ કરી નાખ્યું છે. 

હવામાન કેન્દ્રના જણાવ્યાં મુજબ તોફાન કિકોની મહત્તમ સ્પીડ 215 કિમી પ્રતિ કલાક  (130 માઈલ પ્રતિ કલાક) છે અને તેમાં શુક્રવારે મોડી રાત સુધી વધુ શક્તિશાળી બને તેવી શક્યતા છે. હાલ આ તોફાન હિલો, હવાઈથી 1,195 માઈલ (1925 કિમી) પૂર્વ દક્ષિણપૂર્વમાં હતું અને પશ્ચિમ-ઉત્તર પશ્ચિમ દિશામાં 17 કિમી પ્રતિ કલાકની ઝડપથી આગળ વધી રહ્યું હતું. 

હવામાન વૈજ્ઞાનિકોનું કહેવું છે કે રવિવારથી જ હવાઈના કેટલાક વિસ્તારોમાં ઊંચી લહેરો ને ખતરનાક રિપ કરન્ટ જોવા મળી શકે છે. જો કે હજુ સુધી કોઈ ટાપુ પર સીધી ચેતવણી જાહેર કરાઈ નથી. પરંતુ લોકોને સતર્ક રહેવાની સલાહ અપાઈ છે. 

મેક્સિકોના લોરેનામાં કહેર
બીજી બાજુ પોસ્ટ ટ્રોપિકલ સાઈક્લોન લોરેનાએ મેક્સિકોના બાજા કેલિફોર્નિયા પ્રાયદ્વિપમાં ભારે વરસાદ વરસાવ્યો છે. શુક્રવારે સવાર સુધી લોરેનાની ઝડપ ઘટીને 56 કિમી પ્રતિ કલાક (35 માઈલ પ્રતિ કલાક) રહી  ગઈ હ તી અને તે કાબો સેન લાજારોથી 170 માઈલ પશ્ચિમમાં લગભગ સ્થિર હતું. 

હવામાન વિભાગે જણાવ્યું કે લોરેના ધીરે ધીરે નબળુ થઈને રવિવાર સુધી ખતમ થઈ જશે. પરંતુ ત્યાં સુધી તે બાજા કેલિફોર્નિયા સુર, બાજા કેલિફોર્નિયા, સોનોરા અને સિનાલોઆ રાજ્યોમાં 30 સેન્ટીમીટર સુધી વરસાદ લાવી શકે છે. આ વિસ્તારોમાં ફ્લેશ ફલડિંગ અને ભૂસ્ખલનનું જોખમ છે. 

અમેરિકામાં કેટલી અસર
લોરેનાની અસર એરિઝોના અને ન્યૂ મેક્સિકો સુધી પહોંચી છે. જ્યાં 10 સેન્ટીમીટર સુધી વરસાદ પડ્યો છે અને શનિવાર સુધી સ્થાનિક પૂરની શક્યતા રહેશે. હવામાન વિભાગે  કહ્યું કે કિકો જેવા તોફાન કેટેગરી 3 કે તેનાથી ઉપર પહોંચતા જ 'મેજર હરિકેન' માનવામાં આવે છે. કિકો પહેલા પણ આ અઠવાડિયે કેટેગરી 4 સુધી પહોંચ્યું હતું. પરંતુ શનિવારથી તેના ધીરે ધીરે નબળું પડવાની શક્યતા જતાવવામાં આવી છે.