ટ્રમ્પ-ઝેલેન્સ્કીની મુલાકાતનું શું આવ્યું પરિણામ? 10 પોઈન્ટમાં જાણો મહત્વની બેઠકની એક એક વાત

અમેરિકાના રાષ્ટ્રપતિ ડોનાલ્ડ ટ્રમ્પે વ્હાઈટ હાઉસમાં યુક્રેનના રાષ્ટ્રપતિ વોલોદિમિર ઝેલેન્સ્કી અને યુરોપના મોટા નેતાઓ સાથે એક મહત્વની બેઠક કરી. બેઠકનો હેતુ એ હતો કે રશિયા-યુક્રેન જંગ કેવી રીતે રોકવામાં આવે. બંને દેશો વચ્ચે શાંતિ કેવી રીતે સ્થપાય. કઈ રીતે આ મામલાનું સમાધાન કાઢવામાં આવે. 10 પોઈન્ટમાં જાણો આ બેઠકનું શું આવ્યું પરિણામ. 

1. ટ્રમ્પ ઝેલન્સ્કીની મુલાકાત
અમેરિકી રાષ્ટ્રપતિ ડોનાલ્ડ ટ્રમ્પે વ્હાઈટ હાઉસમાં યુક્રેનના રાષ્ટ્રપતિ વોલોદિમિર ઝેલેન્સ્કી અને  યુરોપીયન નેતાઓ સાથે મુલાકાત કરી. આ બેઠકનો હેતુ રશિયા-યુક્રેન યુદ્ધને ખતમ કરવા માટે શાંતિવાર્તા શરૂ ક રવાનો હતો. યુરોપીયન નેતાઓએ ટ્રમ્પના શાંતિ પ્રયત્નોના ખુબ વખાણ કર્યા. બેઠકમાં બ્રિટનના પીએમ કીર સ્ટાર્મર, ફ્રાન્સના રાષ્ટ્રપતિ ઈમેન્યુઅલ મેક્રોન, જર્મનીના ચાન્સેલર ફ્રેડરિક મર્જ, ઈટલીના પ્રધાનમંત્રી જ્યોર્જિયા મેલોની, યુરોપીયન સંઘના અધ્યક્ષ ઉર્સુલા વોન ડેર લેયેન, ફિનલેન્ડના રાષ્ટ્રપતિ અલેક્ઝેન્ડર સ્ટબ અને નાટો મહાસચિવ માર્ક રટ્ટે સામેલ હતા. 

2. ત્રિપક્ષીય બેઠકની યોજના
ટ્રમ્પે કહ્યું કે તેઓ રશિયાના રાષ્ટ્રપતિ વ્લાદિમિર પુતિન અને ઝેલેન્સ્કીની મુલાકાતની વ્યવસ્થા કરી રહ્યા છે. ટ્રમ્પે જણાવ્યું કે તેમણે બેઠક બાદ પુતિન સાથે ફોન પર વાત કરી અને ઝેલેન્સ્કી પુતિનની બેઠકની વ્યવસ્થા શરૂ ક રી છે. જો કે રશિયાએ હજુ સુધી આ બેઠકની સ્વીકૃતિ આપી નથી. આ બેઠક યુદ્ધને ખતમ કરવાની દિશામાં એક મહત્વનું પગલું ગણાય છે. એટલે કે હવે પુતિન અને ઝેલેન્સ્કીની મુલાકાત બાદ ટ્રમ્પ બંને નેતાઓ સાથે એક ત્રિપક્ષીય બેઠક કરશે. જેને તેમણે યુદ્ધ રોકવાનું પ્રાથમિક પગલું ગણાવ્યું છે. 

3. સુરક્ષા ગેરંટી પર સહમતિ
બેઠકમાં યુક્રેન માટે સુરક્ષા ગેરંટી પર ખુબ ભાર રહ્યો. ટ્રમ્પે કહ્યું કે અમેરિકા અને યુરોપીયન દેશ મળીને યુક્રેનને સુરક્ષા આપશે. જેથી કરીને રશિયા ભવિષ્યમાં ફરીથી હુમલો ન કરી શકે. આ ગેરંટી નાટો જેવા માળખાની જેમ હશે. 

4. યુદ્ધવિરામ વિરુદ્ધ શાંતિ સમજૂતિ
યુરોપીયન નેતા તત્કાળ યુદ્ધવિરામ ઈચ્છતા હતા. પરંતુ ટ્રમ્પે સ્થાયી શાંતિ સમજૂતિ પર ભાર મૂક્યો. તેમણે કહ્યું કે તેઓ પહેલા પણ યુદ્ધવિરામ વગર અને સંઘર્ષનો ઉકેલ લાવી ચૂક્યા છે. ઝેલેન્સ્કીએ પણ બિનશરતી મુલાકાતની વાત કરી. 

5. ઝેલેન્સિકીનું આકરું વલણ
ઝેલેન્સ્કીએ સ્પષ્ટ કહ્યું કે યુક્રેન પોતાના ક્ષેત્રીય અખંડિતતા સાથે સમજૂતિ નહીં કરે. તેમણે ક્રીમિયા અને ડોનબાસ જેવા વિસ્તારો રશિયાને સોંપવાના ટ્રમ્પના જૂના સૂચનને ફગાવી દીધું. 

6. યુરોપીયન નેતાઓનું સમર્થન
બેઠકમાં ફ્રાન્સ, જર્મની, બ્રિટન, ઈટાલી, ફિનલેન્ડ, યુરોપીયન યુનિયન, અને નાટોના નેતાઓ સામેલ હતા. તેમણે ઝેલેન્સ્કીનું સમર્થન કર્યું અને ટ્રમ્પની શાંતિ પહેલના વખાણ કર્યા. ઈટાલીના પ્રધાનમંત્રી મેલોનીએ કહ્યું કે ટ્રમ્પના કારણે રશિયા વાતચીત કરવા તૈયાર થયું. 

7. પુતિનની ટ્રમ્પ સાથે વાત
ટ્રમ્પે જણાવ્યું કે તેમણે પુતિન સાથે ફોન પર વાત કરી અને મુલાકાતની વ્યવસ્થા શરૂ કરી. જો કે પુતિનના સલાહકારે ત્રિપક્ષીય બેઠકની સંભાવનાથી ઈન્કાર કર્યો જેનાથી અનિશ્ચિતતા વર્તાઈ રહી છે.

8. ક્ષેત્રીય વિવાદ વણઉકેલ્યો
રશિયા દ્વારા કબજાવવામાં આવેલા યુક્રેનના વિસ્તારો જેમ કે ડોનબાસ, ક્રીમિયાનું ભવિષ્ય હજુ પણ અંધારામાં છે. પુતિને ડોનબાસ છોડવાની શરત મૂકી જેને ઝેલેન્સ્કીએ ફગાવી. 

9. રશિયાના હુમલાની ટીકા
બેઠકની બરાબર પહેલા રશિયાએ ખાર્કિવ, અને જાપોરિઝિયા પર હુમલા કર્યા. જેમાં 10 લોકો માર્યા ગયા. ઝેલેન્સ્કીએ આ હુમલાઓને ક્રૂર  ગણાવ્યા અને શાંતિની જરૂરિયાત પર ભાર મૂક્યો. 

10 હવે આગળ શું
ઝેલેન્સ્કીએ કહ્યું કે આગામી 10 દિવસમાં સુરક્ષાની ગેરંટીની રૂપરેખા તૈયાર થઈ શકે છે. ટ્રમ્પે ઉપરાષ્ટ્રપતિ જે ડી વેન્સ, વિદેશ મંત્રી માર્કો રૂબિયો અને વિશેષ દૂત સ્ટીવ વિટકોફને આગળની મુલાકાત અંગે જવાબદારી સોંપી છે. ટ્રમ્પ અને ઝેલેન્સ્કીની આ મુલાકાત શાંતિની દિશામાં એક સકારાત્મક પગલું છે પરંતુ યુદ્ધવિરામ અને ક્ષેત્રીય વિવાદ જેવા મુદ્દાઓ પર સહમતિ બાકી છે. યુરોપીયન નેતાઓનું સમર્થન અને ટ્રમ્પની મધ્યસ્થતાથી આશા જાગી છે. પરંતુ પુતિનનું વલણ હજુ સ્પષ્ટ નથી. પુતિનની જીદ છે કે યુક્રેન નતમસ્તક થઈને જે ઈચ્છું તે આપે, યુક્રેન તેના માટે તૈયાર નથી.