ઈરાન અને ઈઝરાયલ વચ્ચે સંઘર્ષ વધશે તો આ વસ્તુઓ થશે મોંઘી, જાણો ભારત આ દેશોમાંથી શું કરે છે આયાત ?

Iran Israel Conflict : સમગ્ર વિશ્વની નજર ઈરાન અને ઈઝરાયલ વચ્ચે તાજેતરમાં થયેલા લશ્કરી મુકાબલા પર ટકેલી છે. મધ્ય પૂર્વના બે શક્તિશાળી દેશો વચ્ચે વધતા તણાવ બાદ ક્રૂડ ઓઈલના ભાવમાં ઉછાળો આવ્યો છે. એટલું જ નહીં, ઈઝરાયલના હુમલા બાદ શેરબજાર પર પણ ખરાબ અસર પડી છે અને રોકાણકારોના કરોડો રૂપિયા ડૂબી ગયા છે. આ યુદ્ધ વધુ આગળ વધવાની શક્યતા છે, જેના કારણે વિશ્વભરના દેશો તણાવમાં છે.

જો ઈરાન અને ઈઝરાયલ વચ્ચે યુદ્ધ શરૂ થાય છે, તો સપ્લાય ચેઈન પર અસર થશે, જેના કારણે અનેક વસ્તુઓ મોંઘી થવાની શક્યતા છે. ત્યારે  જાણી લઈએ કે મધ્ય પૂર્વમાં વધતા તણાવ અને ઈઝરાયલ અને ઈરાન વચ્ચેના યુદ્ધની ભારત પર શું અસર પડશે ? ભારત આ બે દેશોમાંથી કઈ વસ્તુઓ મંગાવે છે અને કઈ વસ્તુઓ મોંઘી થવાની શક્યતા છે ?

ભારત ઈઝરાયલ પાસેથી શું મંગાવે છે ?

ભારત અને ઈઝરાયલ વચ્ચે લાંબા સમયથી વેપાર સંબંધો છે. આંકડાઓની વાત કરીએ તો, નાણાકીય વર્ષ 2024-25માં, ભારતે ઇઝરાયલને 2.1 બિલિયન ડોલરની કિંમતની વસ્તુઓની નિકાસ કરી છે, જ્યારે 1.6 બિલિયન ડોલરની કિંમતની વસ્તુઓની આયાત કરવામાં આવી છે. ભારત સંરક્ષણ ક્ષેત્ર સંબંધિત મોટાભાગની વસ્તુઓ ઇઝરાયલથી આયાત કરે છે અને આ દેશ ભારતનો 32મો સૌથી મોટો વેપારી ભાગીદાર છે. ભારત ઇઝરાયલથી રડાર, સર્વેલન્સ, કોમ્બેટ ડ્રોન, મિસાઇલ સહિત લશ્કરી હાર્ડવેરની આયાત કરે છે. આ ઉપરાંત, મોતી, કિંમતી પથ્થરો, ઇલેક્ટ્રિકલ, ઇલેક્ટ્રોનિક્સ સાધનો, ખાતરો, રાસાયણિક ઉત્પાદનો પણ આયાત કરવામાં આવે છે.

ભારત ઇરાનથી શું આયાત કરે છે ?

નાણાકીય વર્ષ 2024-25માં, ભારતે ઇરાનને 1.2 બિલિયન ડોલરની નિકાસ કરી છે અને 441.9 મિલિયન ડોલરની કિંમતની વસ્તુઓની આયાત કરી છે. ભારત ઇરાનથી ક્રૂડ ઓઇલ, ડ્રાયફ્રૂટ્સ, રસાયણો, કાચના વાસણોની આયાત કરે છે. આ ઉપરાંત, ભારતમાંથી બાસમતી ચોખા, ચા, કોફી અને ખાંડની નિકાસ કરવામાં આવે છે.

આ વસ્તુઓના ભાવ વધશે

નિષ્ણાતો કહે છે કે ઇઝરાયલ અને ઈરાન વચ્ચે વધતા સંઘર્ષને કારણે, ક્રૂડ ઓઇલના ભાવમાં મોટો ઉછાળો આવી શકે છે, જે સમગ્ર સપ્લાય ચેઇનને અસર કરશે અને આયાત-નિકાસ મોંઘી થશે. આ ઉપરાંત, મધ્ય પૂર્વમાં વધતા તણાવને કારણે, ફ્લાઇટ ભાડા પણ વધી શકે છે. પાકિસ્તાની હવાઈ ક્ષેત્ર બંધ થવાને કારણે, ભારતીય એરલાઇન્સ ખાડી દેશોમાં મુસાફરી કરે છે. યુદ્ધ દરમિયાન, આ એરલાઇન્સે બીજો રસ્તો શોધવો પડશે.