 "બાળકો માટે સરકારનો સૌથી કડક નિર્ણય, માર્ચ 2026થી મોબાઈલ પર મૂકવામાં આવશે પ્રતિબંધ! જાણો તેની પાછળના કારણો")
Mobile Ban in Schools: આજના ડિજિટલ યુગમાં બાળકોના હાથમાં સ્માર્ટફોન હોવો એક સામાન્ય બાબત બની ગઈ છે. ધીમે-ધીમે બાળકોમાં સ્માર્ટફોનની આદત વધી રહી છે. આ આદત તેમના શારીરિક અને માનસિક સ્વાસ્થ્ય તેમજ તેમના સામાજિક અને શૈક્ષણિક વિકાસને અવરોધે છે. આ ઉપરાંત આજકાલ ઘણી શાળાઓમાં બાળકોને સ્માર્ટફોન લાવવાની મંજૂરી આપવામાં આવી છે. આ દરમિયાન એક દેશે એવો કાયદો પસાર કર્યો છે કે, જ્યાં હવે બાળકો શાળાઓમાં ફોનનો ઉપયોગ કરી શકશે નહીં. ચાલો જાણીએ આ નિર્ણય અને તેની પાછળના કારણો વિશે...
સ્માર્ટફોનની આદતને કાબુમાં લેવા માટે પહેલ
દક્ષિણ કોરિયામાં એક નવો કાયદો પસાર કરવામાં આવ્યો છે. આ કાયદા હેઠળ માર્ચ 2026થી શાળાઓમાં ક્લાસ દરમિયાન બાળકો મોબાઇલ ફોન અને અન્ય સ્માર્ટ ડિવાઈસનો ઉપયોગ કરી શકશે નહીં. બાળકો અને કિશોરોમાં સ્માર્ટફોનની વધતી આદતને રોકવા માટે આ પગલું લેવામાં આવ્યું છે. આ કાયદા પછી દક્ષિણ કોરિયા એવા ગણ્યાગાંઠ્યા દેશોમાં સામેલ થઈ ગયું છે જ્યાં કડક કાયદા દ્વારા મોબાઇલ પર પ્રતિબંધ મૂકવામાં આવ્યો છે. જો કે, અપંગ વિદ્યાર્થીઓને હજુ પણ અભ્યાસ માટે ડિજિટલ ડિવાઈસનો ઉપયોગ કરવાની મંજૂરી આપવામાં આવશે.
અભ્યાસ પર સ્માર્ટફોનની ખરાબ અસર
આ કાયદો માર્ચ 2026થી અમલમાં આવશે, જેના કારણે શાળાઓ અને શિક્ષણ અધિકારીઓને તેની તૈયારી કરવા અને જરૂરી પ્રોટોકોલ બનાવવા માટે ઘણા મહિનાઓનો સમય મળશે. કાયદા ઘડનારાઓ, વાલીઓ અને શિક્ષકો માને છે કે, સ્માર્ટફોનનો ઉપયોગ વિદ્યાર્થીઓના અભ્યાસ પર ખરાબ અસર કરી રહ્યો છે અને તેમનો સમય બગડી રહ્યો છે. જો કે, કેટલાક વિદ્યાર્થીઓ આ નિર્ણય સાથે સહમત નથી. તેઓ તેનો અમલ કેવી રીતે થશે, તેના પરિણામો શું હશે અને શું તે ખરેખર મોબાઇલની આદતના મૂળ કારણને દૂર કરવામાં સક્ષમ હશે તે અંગે પ્રશ્નો ઉભા કરી રહ્યા છે.
શું કહે છે સર્વે રિપોર્ટ
સર્વે અનુસાર દક્ષિણ કોરિયા દુનિયાના સૌથી વધુ ડિજિટલી કનેક્ટેડ દેશોમાંથી એક છે. અમેરિકાના પ્યુ રિસર્ચ સેન્ટર (Pew Research Center) અનુસાર, વર્ષ 2022-23માં 27 દેશો પર કરવામાં આવેલા સર્વેમાં દક્ષિણ કોરિયામાં 99% લોકો ઓનલાઈન હતા અને 98% લોકો પાસે સ્માર્ટફોન હતો. આ આંકડો અન્ય તમામ દેશોમાં સૌથી વધુ હતો.
અભ્યાસ પર પ્રતિબંધની સકારાત્મક અસર
દક્ષિણ કોરિયા ઉપરાંત ફ્રાન્સ, ફિનલેન્ડ, ઇટલી, નેધરલેન્ડ અને ચીન જેવા દેશોની શાળાઓમાં ફોન પર પ્રતિબંધ છે. જો કે, દરેક દેશમાં તેના નિયમો અલગ છે. જો આપણે ફ્રાન્સનું ઉદાહરણ લઈએ, તો અહીં પ્રતિબંધ મુખ્યત્વે નાના બાળકો પર લાગુ પડે છે. આ ઉપરાંત ઓસ્ટ્રેલિયાએ તાજેતરમાં કિશોરો માટે સોશિયલ મીડિયા પર પહેલાથી જ લગાડવામાં આવેલા પ્રતિબંધને લંબાવ્યો છે. એક સ્ટડી અનુસાર જુલાઈમાં નેધરલેન્ડ્સની શાળાઓમાં મોબાઇલ ફોન પર પ્રતિબંધથી વિદ્યાર્થીઓનું અભ્યાસમાં ધ્યાન સુધરી ગયું છે.
સાયબર ધમકી અને સ્વાસ્થ્ય પર અસર
સરકારી માહિતી અનુસાર, દક્ષિણ કોરિયાના 5.1 કરોડ લોકોમાંથી લગભગ એક ચતુર્થાંશ લોકો તેમના ફોનનો વધુ પડતો ઉપયોગ કરે છે. કિશોરોમાં આ આંકડો 43% સુધી પહોંચી જાય છે. માતાપિતાને પણ સાયબર ધમકીનો ડર છે. બિલ રજૂ કરનારા વિપક્ષી સાંસદ ચો જંગ-હુને કહ્યું કે, આ વાતના વૈજ્ઞાનિક અને મેડિકલ પુરાવા છે કે સ્માર્ટફોનનો વધુ પડતો ઉપયોગ મગજના વિકાસ અને ભાવનાત્મક વિકાસને નુકસાન પહોંચાડે છે.
)