ટ્રમ્પે 4 વાર કર્યો ફોન, PM મોદીએ ન આપ્યો જવાબ ! અમેરિકાને લાગ્યા મરચા, વિદેશી અખબારનો મોટો દાવો

India US Trade Dispute: ભારત અને અમેરિકા વચ્ચે વધતા તણાવ વચ્ચે એક મોટો ખુલાસો થયો છે. જર્મન અખબાર Frankfurter Allgemeines Zeitung (F.A.Z.) એ એક મોટો દાવો કર્યો છે. F.A.Z એ કહ્યું છે કે, જ્યારે અમેરિકાના રાષ્ટ્રપતિ ડોનાલ્ડ ટ્રમ્પે વડા પ્રધાન નરેન્દ્ર મોદીને ચાર વખત ફોન કર્યો, ત્યારે તેમણે(PM મોદી) કોઈ જવાબ આપ્યો ન હતો. અહેવાલ મુજબ, ટ્રમ્પની ધમકીઓ, દબાણ અને રશિયા પાસેથી તેલ ખરીદવાની ફરિયાદો અને ટેરિફ વિવાદ ભારતને અસર કરી રહ્યા નથી, જ્યારે આ વ્યૂહરચના ઘણા અન્ય દેશો પર સંપૂર્ણ રીતે કામ કરી રહી છે.

જર્મન રિપોર્ટમાં શું દાવો કરવામાં આવ્યો હતો?

F.A.Z. એ દાવો કર્યો છે કે જો જર્મન ભાષાના રિપોર્ટનું મશીન ટ્રાન્સલેશન સાચું છે, તો ટ્રમ્પે તાજેતરના અઠવાડિયામાં પીએમ મોદીને ચાર ફોન કોલ્સ કર્યા હતા. પરંતુ પીએમ મોદીએ ટ્રમ્પનો જવાબ આપવાનો ઇનકાર કર્યો હતો. જોકે, રિપોર્ટમાં કથિત રીતે કયા દિવસે કોલ કરવામાં આવ્યા હતા, તેનો ચોક્કસ ઉલ્લેખ નથી. તે જ સમયે, ભારતીય અધિકારીઓએ હજુ સુધી આ કોલ પર કોઈ ટિપ્પણી કરી નથી.

રિપોર્ટમાં કહેવામાં આવ્યું છે કે મોદીનું વર્તમાન વલણ ઊંડી હતાશા અને વ્યૂહાત્મક સતર્કતા બંનેને પ્રતિબિંબિત કરે છે. રિપોર્ટ અનુસાર, મોદી અમેરિકન કૃષિ વ્યવસાય માટે ભારતનું બજાર ખોલવા માટે ટ્રમ્પના દબાણનો વિરોધ કરી રહ્યા છે. રિપોર્ટમાં રશિયન તેલ ખરીદવાના ભારતના વલણ પર પણ પ્રકાશ પાડવામાં આવ્યો છે. ટ્રમ્પ દાવો કર્યો છે કે તે પુતિનના યુદ્ધ મશીનને ભંડોળ પૂરું પાડી રહ્યા છે. આનો અર્થ રશિયાનું યુક્રેન પર આક્રમણ છે.

શું ભારતને ટેરિફ મુક્તિ નહીં મળે?

જો પરિસ્થિતિ નહીં બદલાય, તો ભારતે અમેરિકામાં નિકાસ પર 50 ટકા સુધી ટેરિફ ચૂકવવો પડી શકે છે. વેપાર અસંતુલનને કારણે 25 ટકા અને રશિયા પાસેથી તેલ ખરીદવાને કારણે 25 ટકા ભારતને ચુકવવા પડી શકે છે. રિપોર્ટમાં ટ્રમ્પના સલાહકાર પીટર નાવારોને ટાંકીને કહેવામાં આવ્યું છે કે, તેમને નથી લાગતું કે મારા બોસ (ટ્રમ્પ) તેમને વધુ છૂટ આપશે.

'પીએમ મોદી મીડિયા સ્ટંટનો ભાગ બનવા માંગતા નથી'

રિપોર્ટમાં વધુમાં કહેવામાં આવ્યું છે કે વડા પ્રધાન મોદી ટ્રમ્પના મીડિયા સ્ટંટનો ભાગ બનવા માંગતા નથી. તાજેતરમાં, વિયેતનામના કિસ્સાનો ઉલ્લેખ કરવામાં આવ્યો હતો, જ્યાં ટ્રમ્પે સોશિયલ મીડિયા પર વેપાર સોદાની જાહેરાત કરી હતી, જ્યારે વાસ્તવમાં આવી કોઈ ડીલ થઈ ન હતી. તે જ સમયે, નિષ્ણાત માર્ક ફ્રેઝિયરને ટાંકીને, રિપોર્ટમાં કહેવામાં આવ્યું છે કે ઇન્ડો-પેસિફિક ક્ષેત્રમાં સંકલનની અમેરિકન ખ્યાલ, જેમાં ચીનને નિયંત્રિત કરવામાં ભારતની મુખ્ય ભૂમિકા છે, તે તૂટવા લાગી છે.

ભારતને શું નુકસાન થશે?

ભારતીય નિકાસનો પાંચમો ભાગ અમેરિકા જાય છે અને FAZ એ દાવો કર્યો છે કે નવા ટેરિફ ભારતના આર્થિક વિકાસને અંદાજિત 6.5 ટકાથી ઘટાડીને 5.5 ટકા કરી શકે છે. જ્યારે, ભારતીય લોકોની ટ્રમ્પ સામેની ભાવના ઝડપથી બદલાઈ ગઈ છે, જે જૂનમાં હાથ ધરવામાં આવેલા પ્યુ રિસર્ચ સર્વેથી વિપરીત છે. તેમાં જાણવા મળ્યું છે કે દરેક બીજો ભારતીય ટ્રમ્પ પર વિશ્વાસ કરે છે, જે વૈશ્વિક સ્તરે પાંચમા ક્રમનો સૌથી મોટો રેટિંગ છે.

ટ્રમ્પનો પાકિસ્તાન પ્રત્યેનો ઝુકાવ?

ટ્રમ્પના ભારતમાં રિયલ એસ્ટેટ પ્રોજેક્ટ્સ સારી રીતે વેચાયા હોવા છતાં, તાજેતરના ઓપરેશન સિંદૂર પછી ભારત અને પાકિસ્તાન વચ્ચે શાંતિ સ્થાપિત કરવાના તેમના દાવાથી ભારતીય સોશિયલ મીડિયા પર આક્રોશ ફેલાયો છે. એટલું જ નહીં, તેમણે દાવો કર્યો હતો કે ભારત એક દિવસ પાકિસ્તાન પાસેથી તેલ ખરીદી શકે છે. તેમના આ દાવાથી ભારતીય સોશિયલ મીડિયા પર પણ આક્રોશ ફેલાયો છે. અહેવાલ મુજબ, પાકિસ્તાનના આર્મી ચીફ અસીમ મુનીર સાથેના તેમના કથિત વ્હાઇટ હાઉસ લંચને પણ ઉશ્કેરણીજનક માનવામાં આવી રહ્યું છે.

મોદીની નવી વ્યૂહરચના

અહેવાલમાં કહેવામાં આવ્યું છે કે મોદી હવે નવી વ્યૂહરચના અપનાવી રહ્યા છે અને આ સપ્તાહના અંતે તિયાનજિનમાં શાંઘાઈ કોઓપરેશન ઓર્ગેનાઇઝેશન (SCO) સમિટમાં હાજરી આપવાની યોજના બનાવી રહ્યા છે. લેખમાં ફ્રેઝિયરને ટાંકીને કહેવામાં આવ્યું છે કે ભારતના ચીન સાથે સામાન્ય વ્યૂહાત્મક હિતો છે, ખાસ કરીને વૈશ્વિક સંસ્થાઓમાં વધુ પ્રભાવ મેળવવામાં. તેમાં એમ પણ કહેવામાં આવ્યું છે કે ચીની રોકાણ અને ટેકનોલોજી ભારતીય ઉદ્યોગને વધુ વિકસાવવામાં મદદ કરી શકે છે.