અમેરિકાની વધુ એક અવળચંડાઈ...ભારતને લાગી શકે છે મોટો ઝટકો, 1.6 અબજ ડોલર દાવ પર!

Trump Tariff : અમેરિકાએ એક નવી તપાસ શરૂ કરી છે, જે ભારત સહિત ઘણા દેશોને મોટો ઝટકો આપી શકે છે. ઉપરાંત, ભારત અને અમેરિકા વચ્ચેના વેપાર સંબંધો વધુ બગડી શકે છે. અમેરિકા દ્વારા કરવામાં આવેલી આ તપાસ 1.6 બિલિયન ડોલરના ઉદ્યોગને નુકસાન પહોંચાડી શકે છે.

આપણે જે ઉદ્યોગ વિશે વાત કરી રહ્યા છીએ તે સૌર ઉર્જા છે. અમેરિકા ભારત, લાઓસ અને ઇન્ડોનેશિયાથી સૌર પેનલ આયાત કરે છે. અમેરિકાએ હવે આ ક્ષેત્રની તપાસ અને વિશ્લેષણ શરૂ કર્યું છે, જેના વિશે એવી અટકળો છે કે નવા ટેરિફ લાદવામાં આવી શકે છે. ભારત આનાથી ખાસ પ્રભાવિત થશે, કારણ કે અમેરિકાએ પહેલાથી જ ભારત પર 50 ટકા ટેરિફ લાદી દીધો છે.

ચીની કંપનીઓને લઈને તપાસ

અમેરિકન ઇન્ટરનેશનલ ટ્રેડ કમિટી (ITC)એ શુક્રવારે સર્વાનુમતે તપાસ શરૂ કરી, જે આ દાવા પર કેન્દ્રિત છે કે ચીન સમર્થિત કંપનીઓ હાલના ટેરિફ ટાળવા અને અમેરિકન બજારમાં પોતાનું વર્ચસ્વ વધારવા માટે અન્ય દેશોનો ઉપયોગ કરી રહી છે.

ડોનાલ્ડ ટ્રમ્પને ટેરિફ પર મોટો ફટકો, કોર્ટે કહ્યું ગેરકાયદેસર; હવે આગળ શું થશે

અબજો ડોલરનું રોકાણ જોખમમાં

ITCએ દલીલ કરી હતી કે ભારત અને અન્ય દેશોમાંથી ઓછી કિંમતની આયાત વધી રહી છે, જે સ્થાનિક ઉત્પાદનમાં ઘટાડો કરી રહી છે અને સ્વચ્છ ઊર્જામાં અબજો ડોલરના રોકાણને જોખમમાં મૂકી રહી છે. એલાયન્સ ફોર અમેરિકન સોલર મેન્યુફેક્ચરિંગ એન્ડ ટ્રેડના મુખ્ય વકીલ ટિમ બ્રાઇટબિલે જણાવ્યું હતું કે ITC દ્વારા આજનો નિર્ણય અમારી અરજીઓમાં લગાવવામાં આવેલા આરોપોની પુષ્ટિ કરે છે.

તેમણે કહ્યું કે લાઓસ, ઇન્ડોનેશિયા અને ભારતમાં ચીનની માલિકીની અન્ય કંપનીઓ સિસ્ટમને અન્યાયી રીતે અસર કરી રહી છે, જેનાથી અમેરિકન નોકરીઓ અને રોકાણમાં ઘટાડો થઈ રહ્યો છે.

1.6 બિલિયન ડોલકના ઉદ્યોગને નુકસાન

જુલાઈમાં તપાસ માટે અરજી દાખલ કરવામાં આવી હતી, જેમાં ફર્સ્ટ સોલર અને ક્યુસેલ્સ જેવી મોટી સોલાર કંપનીઓનો સમાવેશ થાય છે. તેમના ડેટા અનુસાર, આ ત્રણેય દેશોમાંથી આયાત 2023માં વધીને 1.6 બિલિયન ડોલર થઈ ગઈ છે, જે ગયા વર્ષે ફક્ત 289 મિલિયન ડોલર હતી. એવું માનવામાં આવે છે કે તેમાંથી મોટાભાગની આયાત એવા દેશોમાંથી આવી છે જે પહેલાથી જ યુએસ ટેરિફનો સામનો કરી રહ્યા છે.

ભારતને લાગી શકે છે મોટો ઝટકો 

અરજીમાં આરોપ મૂકવામાં આવ્યો છે કે ભારત અને અન્ય દેશોમાં કામ કરતી ચીની કંપનીઓ સરકારી સબસિડી મેળવી રહી છે અને ઉત્પાદન ખર્ચથી ઓછી કિંમતે ઉત્પાદનો વેચી રહી છે, જેનાથી યુએસ વેપાર કાયદાઓનું ઉલ્લંઘન થઈ રહ્યું છે. જોકે તપાસ ત્રણેય દેશો પર કેન્દ્રિત છે, ભારત, જે પહેલાથી જ વિવિધ ટેરિફ અને વિઝા પ્રતિબંધોને લઈને યુએસ સાથે તણાવમાં છે, તેને હવે બીજો મોટો ઝટકો લાગી શકે છે.

તપાસ ક્યારે પૂર્ણ થઈ શકે છે ?

યુએસ વાણિજ્ય વિભાગ હવે તેની સમાંતર તપાસ ચાલુ રાખશે, જેમાં સબસિડી વિરોધી ટેરિફ અંગેનો પ્રારંભિક નિર્ણય 10 ઓક્ટોબર સુધીમાં અને અંતિમ નિર્ણય 24 ડિસેમ્બર સુધીમાં આવી શકે છે.