દુનિયાની દરેક બાબતમાં વચ્ચે પડતા ટ્રમ્પની પુતિન સાથેની બેઠક બાદ બોલતી કેમ બંધ ? મિટિંગની વાતો કેવી રીતે થઈ લીક ?

Trump Putin Alaska Meeting : અલાસ્કામાં અમેરિકાના રાષ્ટ્રપતિ ડોનાલ્ડ ટ્રમ્પ અને રશિયાના રાષ્ટ્રપતિ વ્લાદિમીર પુતિનની મુલાકાત આખી દુનિયામાં ચર્ચાનો વિષય બની ગઈ છે. ત્રણ કલાક સુધી ચાલેલી આ બંધ બારણે થયેલી મુલાકાત બાદ બંને નેતાઓએ પ્રેસ કોન્ફરન્સમાં પત્રકારોના પ્રશ્નો લેવાનું ટાળતા જોવા મળ્યા. આ પછી બધાના મનમાં એ પ્રશ્ન આવ્યો કે હંમેશા ખુલીને બોલતા ટ્રમ્પ પુતિનની મુલાકાત પર કેમ ચૂપ રહ્યા ? અને વધુ મહત્ત્વની વાત એ છે કે જ્યારે બેઠકની ચર્ચા આટલી ગંભીર હતી, ત્યારે અંદરની બાબતો કેવી રીતે બહાર આવી ? 

CNNમાં પ્રકાશિત અહેવાલ મુજબ, ક્રેમલિનના પ્રવક્તા દિમિત્રી પેસ્કોવે કહ્યું, "બંને નેતાઓએ પોતાના વિચારો એટલી વિગતવાર રજૂ કર્યા કે પ્રશ્નો અને જવાબોની જરૂર જ ના પડી." પરંતુ મનમાં પ્રશ્ન એ રહે છે કે ટ્રમ્પ આ રીતે ચૂપ રહી શકતા નથી. તો પછી આવું મૌન કેમ ?

રશિયાની તાકાત આગળ ટ્રમ્પની ધમકીઓનું સૂરસૂરિયું? ટેરિફ ધમકી પાછી ખેંચી

પ્રશ્નો કેમ ઉઠાવવામાં આવ્યા ?

મીડિયા રિપોર્ટ્સ અનુસાર, ટ્રમ્પ અને પુતિનની પ્રેસ કોન્ફરન્સમાં સવાલ-જવાબની ગેરહાજરી ઘણા લોકો માટે આશ્ચર્યજનક હતી. નિષ્ણાતો માને છે કે બંને નેતાઓએ સંવેદનશીલ મુદ્દાઓ પર ચર્ચા કરી હતી અને આ મુદ્દાઓ પર ખુલ્લેઆમ બોલવાનું ટાળવા માટે સવાલ-જવાબ ટાળવામાં આવ્યા હશે. પેસ્કોવે કહ્યું કે વાતચીત સકારાત્મક હતી, પરંતુ કોઈ નક્કર કરાર થયો નહોતો. કેટલાક નિષ્ણાતો કહે છે કે ટ્રમ્પ ઇચ્છતા નહોતા કે પત્રકારોના પ્રશ્નો તેમની શાંતિ મંત્રણાની વ્યૂહરચના પર પ્રશ્નો ઉભા કરે. તો પુતિન માટે આ સમગ્ર વિશ્વમાં પોતાનું વર્ચસ્વ સ્થાપિત કરવાની તક હતી, તેઓ કોઈ વિવાદમાં ફસાયા નહીં.

મીટિંગની વિગતો કેવી રીતે બહાર આવી ?

જોકે કોઈ ઔપચારિક કરાર થયો નહોતો, પરંતુ મીટિંગની કેટલીક અંદરની વિગતો બહાર આવી. સૂત્રોએ જણાવ્યું હતું કે ટ્રમ્પ અને પુતિને યુક્રેન યુદ્ધનો અંત લાવવા, મધ્ય પૂર્વમાં વેપાર અને સહયોગ વધારવા અંગે ચર્ચા કરી હતી. પુતિને એમ પણ કહ્યું હતું કે જો ટ્રમ્પ 2022માં રાષ્ટ્રપતિ હોત, તો યુક્રેન યુદ્ધ કદાચ ન થયું હોત. આ બાબતો રશિયન અને અમેરિકન અધિકારીઓના નિવેદનો અથવા મીડિયા લીક્સ દ્વારા બહાર આવી હતી. કેટલીક X પોસ્ટ્સમાં દાવો કરવામાં આવ્યો હતો કે ટ્રમ્પે નિર્ણય યુક્રેનિયન રાષ્ટ્રપતિ ઝેલેન્સકી પર છોડી દીધો હતો, જ્યારે પુતિને મોસ્કોમાં આગામી બેઠક યોજવાનો પ્રસ્તાવ મૂક્યો છે.

પુતિન અને ટ્રમ્પની વાતચીત કેમ બહાર આવી ?

આ મામલે પણ ઘણા મંતવ્યો છે. કેટલાક લોકો માને છે કે વાતો બહાર આવવાનું કારણ બંને પક્ષોના અધિકારીઓ દ્વારા પોતપોતાના હિતો રજૂ કરવામાં આવી શકે છે. રશિયાએ પોતાની સ્થિતિ મજબૂત બતાવવા માટે કેટલીક માહિતી લીક કરી હશે, જ્યારે ટ્રમ્પની ટીમે શાંતિ પ્રયાસોનો શ્રેય લેવાનો પ્રયાસ કર્યો હતો. આ ઉપરાંત, યુક્રેન અને યુરોપિયન દેશોની ચિંતાઓએ પણ સમાચારને વેગ આપ્યો હતો, કારણ કે ઝેલેન્સકીને આ વાતચીતથી દૂર રાખવામાં આવ્યા હતા.