ડોનાલ્ડ ટ્રમ્પની નજર ઇમરાન ખાનના પુત્રો પર...પાકિસ્તાનમાં થવાનું છે કંઈક મોટું ?

Trump Aide Richard Grenell Meets Imran Khan Son : પાકિસ્તાનના ભૂતપૂર્વ વડાપ્રધાન ઇમરાન ખાનની જેલમાં હાલત અંગે હોબાળો મચી ગયો છે. તેની પાર્ટી પાકિસ્તાન તહરીક-એ-ઇન્સાફ (PTI) અને તેના પુત્રોએ દાવો કર્યો છે કે ઇમરાનને અદિયાલા જેલમાં 'ડેથ સેલ'માં રાખવામાં આવ્યા છે, જ્યાં તેમને મૂળભૂત સુવિધાઓથી પણ વંચિત રાખવામાં આવી રહ્યા છે. આ દરમિયાન, ઇમરાનના બે પુત્રો સુલેમાન અને કાસિમે તેમના પિતાને બચાવવા માટે અમેરિકી રાષ્ટ્રપતિ ડોનાલ્ડ ટ્રમ્પના નજીકના સહાયક રિચાર્ડ ગ્રેનેલને મળ્યા છે અને તેમની મુક્તિની માંગ કરી છે. શું આ મુલાકાત પાકિસ્તાનના રાજકારણમાં નવો ભૂકંપ લાવશે ?

ટ્રમ્પની શરણમાં ઇમરાન ખાનના પુત્રો ?

સમાચાર એજન્સી ANIના અહેવાલ મુજબ, યુએસ રાષ્ટ્રપતિ ડોનાલ્ડ ટ્રમ્પના ખાસ મિશનના દૂત રિચાર્ડ ગ્રેનેલ મંગળવારે PTIના સ્થાપક ઇમરાન ખાનના પુત્રોને મળ્યા અને ફરી એકવાર ભૂતપૂર્વ પાકિસ્તાની વડાપ્રધાનની મુક્તિની માંગ કરી. તેમની ધરપકડને "રાજકીય મુકદ્દમા"નો કેસ ગણાવવામાં આવ્યો હતો.

ગ્રેનેલે ઇમરાન ખાનના મોટા પુત્ર સુલેમાન ઇસા અને તેના બીજા પુત્ર કાસિમ ખાન સાથે એક ફોટો પોસ્ટ કર્યો અને લખ્યું કે તેમને તેમની સાથે "સમય વિતાવવાનું પસંદ છે" અને તેમણે કેલિફોર્નિયામાં તેમનું સ્વાગત કર્યું. X પર એક પોસ્ટમાં, ગ્રેનેલે લખ્યું, "મારા મિત્રો કેલિફોર્નિયામાં આપનું સ્વાગત છે. મને આજે તમારી સાથે સમય વિતાવવાનું ગમ્યું. સુલેમાન અને કાસિમ, તમારે મજબૂત રહેવું જોઈએ. દુનિયાભરમાં લાખો લોકો રાજકીય મુકદ્દમાઓથી કંટાળી ગયા છે." "તમે એકલા નથી." ગ્રેનેલની કમેન્ટ પીટીઆઈ નેતાઓ અને માનવાધિકાર કાર્યકરો દ્વારા અડિયાલા જેલમાં ખાનની અટકાયતની સ્થિતિ અંગે સતત ટીકા વચ્ચે આવી છે, જ્યાં તે ઓગસ્ટ 2023થી કેદ છે.

જેલમાં ઈમરાનની હાલત ખૂબ જ ખરાબ 

ઓગસ્ટ 2023થી ઈમરાન ખાન અદિયાલા જેલમાં બંધ છે. પીટીઆઈના નેતાઓનું કહેવું છે કે તેમને એક નાની સાંકડી કોટડીમાં રાખવામાં આવ્યા છે, જેને 'ડેથ સેલ' કહેવામાં આવી રહ્યું છે. આ કોટડીમાં ન તો પુસ્તકો છે, ન ટીવી છે, ન તો અખબારો છે અને ન તો કોઈને તેમને મળવાની મંજૂરી છે. પીટીઆઈના માહિતી સચિવ શેખ વક્કાસ અકરમે કહ્યું, "ભૂતપૂર્વ વડા પ્રધાન હોવા છતાં, ઈમરાનને સામાન્ય કેદી જેવા અધિકારો પણ આપવામાં આવી રહ્યા નથી." આ દેશના સૌથી લોકપ્રિય નેતા સાથે અન્યાય છે." કેટલાક અહેવાલોમાં એવો પણ દાવો કરવામાં આવ્યો હતો કે ઈમરાનનો જીવ જોખમમાં છે અને તેમની માનસિક સ્થિતિને નબળી બનાવવાના પ્રયાસો કરવામાં આવી રહ્યા છે.

પાકિસ્તાનમાં રાજકીય તોફાનના સંકેતો ?

ઈમરાનના પુત્રોના આ પગલાથી પાકિસ્તાનના રાજકારણમાં હલચલ મચી ગઈ છે. પીટીઆઈ 5 ઓગસ્ટે એક મોટી રેલીની તૈયારી કરી રહી છે, જેમાં સુલેમાન અને કાસિમ ભાગ લે તેવી શક્યતા છે. પરંતુ પાકિસ્તાન સરકાર અને સેના આના પર નજર રાખી રહી છે. એક સરકારી મંત્રીએ કહ્યું કે જો પુત્રો કાયદો તોડે છે તો તેમની સામે કાર્યવાહી કરવામાં આવશે. કેટલાક વિશ્લેષકો માને છે કે જો પુત્રોને પાકિસ્તાન આવતા અટકાવવામાં આવે છે, તો તે પીટીઆઈ સમર્થકોમાં ગુસ્સો ભડકી શકે છે અને દેશમાં એક મોટું આંદોલન શરૂ થઈ શકે છે.

શું ટ્રમ્પ પર દબાણ લાવીને ઈમરાનને જેલમાંથી મુક્ત કરવામાં આવશે ?

આ સાથે ટ્રમ્પના પાછા ફર્યા પછી યુએસ-પાકિસ્તાન સંબંધોમાં પરિવર્તનની અટકળો પણ જોરશોરથી ચાલી રહી છે. પીટીઆઈને આશા છે કે ટ્રમ્પ ઈમરાનની મુક્તિ માટે દબાણ લાવી શકે છે, પરંતુ કેટલાક નિષ્ણાતો કહે છે કે યુએસ નીતિમાં મોટો ફેરફાર મુશ્કેલ છે. હજુ પણ ઈમરાનના સમર્થકો માને છે કે આ મુદ્દો હવે આંતરરાષ્ટ્રીય સ્તરે હેડલાઇન્સ બનાવી રહ્યો છે, જે પાકિસ્તાન સરકાર માટે મુશ્કેલીઓ ઊભી કરી શકે છે.