ବିଷାକ୍ତ ବଳୟରୁ ସ୍ୱଚ୍ଛ ପବନ

ରଘୁନାଥ ସାହୁ, ଅନୁଗୋଳ: ଅନୁଗୋଳ ଜିଲ୍ଲାରେ ପ୍ରଦୂଷଣ ମାତ୍ରାରେ ଆଶାତୀତ ଭାବେ ସୁଧାର ଆସିଛି । କଳକାରଖାନା, ଖଣିରେ ଭରପୁର ଜିଲ୍ଲାର ସ୍ଥିତି ବିପଦପୂର୍ଣ୍ଣ ସ୍ଥିତିକୁ ଚାଲି ଆସିଥିଲା । କିନ୍ତୁ ଲକଡାଉନର ପ୍ରଭାବରେ ଏବେ ସ୍ଥିତି ବେଶ ସୁଧୁରୁଥିବା ଯୋଗୁଁ ଏକ ସ୍ୱଚ୍ଛ ବାତାବରଣ ସୃଷ୍ଟି ହୋଇଛି ଜିଲ୍ଲାରେ । 

ଶିଳ୍ପ ସମୃଦ୍ଧ ଅନୁଗୋଳ ଜିଲ୍ଲା । ରହିଛି ଅନେକ କୋଇଲା ଖଣି , କଳକାରଖାନା ଓ ଥର୍ମାଲ ପ୍ଳାଣ୍ଟ । ଏହା ସହ ଜିଲ୍ଲାକୁ ଦୈନଦିନ ଲକ୍ଷ ଲକ୍ଷ ସଂଖ୍ୟାରେ ଗାଡି ମୋଟର ଯିବାଆସିବା କରିଥାଏ । ଯାହା ଫଳରେ ଜିଲ୍ଲାର ବାୟୁମଣ୍ଡଳ ଧୀରେଧୀରେ ବିଷାକ୍ତ ହୋଇ ଚାଲିଥିଲା । ଏପରିକି ଚଳିତ ବର୍ଷ ଜାନୁଆରୀ ମାସ ବେଳକୁ ମଧ୍ୟ ସ୍ଥିତି ବିପଦପୂର୍ଣ୍ଣ ଥିଲା । ବାୟୁମଣ୍ଡଳରେ ଥିବା PM2.5 ଧୂଳିକଣା ହେଉ କି PM10 ଧୂଳିକଣା  ,  ଏହିସବୁର ସଂଖ୍ୟା ଏତେ ବୃଦ୍ଧି ପାଇଥିଲା ଯେ ଦିଲ୍ଲୀ ସହର ଭଳି ସ୍ଥିତି ଉପୁଜିବ ବୋଲି ଭୟ ରହିଥିଲା । ଯାହାକୁ ନେଇ NGT ମଧ୍ୟ ତାଗିଦ କରିବା ସହ ସ୍ଥିତିରେ ସୁଧାର ଆଣିବା ପାଇଁ ନିର୍ଦେଶ ଦେଇଥିଲେ । ପ୍ରଦୂଷଣ କଣ୍ଟ୍ରୋଲ ଏଥିପାଇଁ ବହୁ ପରିଶ୍ରମ କରୁଥିଲେ ମଧ୍ୟ ବିଶେଷ ସୁଧାର ଆସି ପାରୁ ନଥିଲା । ତେବେ ପ୍ରଶାସନ ଓ ପ୍ରଦୂଷଣ କଣ୍ଟ୍ରୋଲ ବୋର୍ଡ ଯାହା କରି ପାରୁ ନଥିଲେ ତା ଠାରୁ ଅଧିକ ହୋଇ ପାରିଛି ଏହି ଲକଡାଉନ ଯୋଗୁଁ । ଦେଖନ୍ତୁ ଜାନୁଆରୀ ମାସରେ ଥିବା ରିପୋର୍ଟ ତୁଳନାରେ ବର୍ତ୍ତମାନ ସ୍ଥିତି କଣ ରହିଛି । 

ଜାନୁଆରୀ ମାସର ରିପୋର୍ଟ ଦେଖିବା ବେଳେ PM2.5 ର ମାତ୍ରା 155 କୁ ଛୁଇଁ ଯାଇଥିଲା ଏବଂ ପ୍ରତ୍ଯେକ ଦିନ 100 ପଖାପାଖି ରାହୁଥିଲା  । ତେବେ ମେ ମାସରେ ଏଥିରେ ବେଶ ସୁଧାର ଆସି 50 ତଳକୁ ମଧ୍ୟ ଖସି ଯାଇଛି । ସେହିପରି PM10 ର ମାତ୍ରା ଜାନୁଆରୀ ମାସରେ 300 ଉପରକୁ ଚାଲି ଯାଇଥିଲା । ତେବେ ବର୍ତ୍ତମାନ ଏହାର ସ୍ଥିତି 40 ରୁ 50 ପ୍ରତିଶତ ହ୍ରାସ ପାଇଛି । ତେବେ ଜିଲ୍ଲାରେ ଖଣି ଖାଦାନ ସବୁ ଚାଲୁ ରହିଥିବା ବେଳେ ବାୟୁ ପ୍ରଦୂଷଣରେ ଏଭଳି ସୁଧାର ସମସ୍ତଙ୍କୁ ନିହାତି ଚକିତ କରୁଥିବ । ତେବେ ଏହାର କାରଣ ହେଲା ଜିଲାରେ ଚାଲୁଥିବା ଗାଡି ମୋଟର ବନ୍ଦ ମୁଖ୍ୟ କାରଣ ବୋଲି କହିଛନ୍ତି ଜିଲ୍ଲା ପ୍ରଦୂଷଣ ଆଞ୍ଚଳିକ ଅଧିକାରୀ । ଲକଡାଉନ ବେଳେ ଜିଲ୍ଲାରେ ଗାଡି ମୋଟର ଚଳାଚଳ ବନ୍ଦ ଯୋଗୁଁ ବାୟୁ ପ୍ରଦୂଷଣରେ ଏଭଳି ସୁଧାର ଆସିଥିବା ସେ କହିବା ସହ ସମସ୍ତଙ୍କୁ ଚକିତ କରିଛି  ।

ବିଷାକ୍ତ ବଳୟ ହୋଇଛି ସବୁଜ ବଳୟ , ବଦଳିଛି ପ୍ରଦୂଷଣକୁ ନେଇ ଚିତ୍ର  । ଲକଡାଉନ ଅନେକଙ୍କୁ କଷ୍ଟ ଦେଇଛି ସତ କିନ୍ତୁ ଅନୁଗୋଳବାସୀଙ୍କ ପାଇଁ ସାଜିଛି ଏହା ବରଦାନ ।