ଖାଁ ଖାଁ ମା' ହିଙ୍ଗୁଳାଙ୍କ ପୀଠ

ରଘୁନାଥ ସାହୁ, ଅନୁଗୋଳ: ତାଳଚେରର ଅଧିଷ୍ଠାତ୍ରୀ ଦେବୀ ମା ହିଙ୍ଗୁଳାଙ୍କ ପ୍ରସିଦ୍ଧ ଯାତ୍ରା ଆଜି ଠାରୁ ନଅ ଦିନ ଧରି ହେବାକୁ ଥିବା ଏହି ଯାତ୍ରା କୋରୋନା ମହାମାରୀ ଯୋଗୁଁ ଶେଷରେ ପ୍ରଶାସନ ପକ୍ଷରୁ ବାରଣ କରାଯାଇଛି । ମା' ଅଗ୍ନିରୂପାଙ୍କୁ ଦର୍ଶନ କରିବା ପାଇଁ ଶ୍ରଦ୍ଧାଳୁଙ୍କୁ ମନା କରାଯାଇଛି । ଏହି କାରଣ ଯୋଗୁଁ ଆଜି ଖାଁ ଖାଁ ଲାଗୁଛି ମା'ଙ୍କ ଉଭାସ୍ଥଳ । 

କେହି ମା'ଙ୍କୁ ଦର୍ଶନ କରିବା ପାଇଁ ଆସୁନାହାନ୍ତି । ଶୁନଶାନ୍ ଲାଗୁଛି ମା'ଙ୍କ ମନ୍ଦିର । ମନ୍ଦିରରେ ପୋଲିସ ମୁତୟନ କରାଯାଇଛି । ବର୍ତ୍ତମାନ ସାରା ବିଶ୍ୱରେ କୋରୋନା ଭାଇରସର ଭୟଙ୍କର ରୂପେ ଦେଖା ଦେଇଥିବାରୁ ଏହାକୁ ଜାତୀୟ ବିପତ୍ତି ଘୋଷଣା କରାଯାଇଛି । ଯାତ୍ରାରେ ଜନ ଗହଳିକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ଯାତ୍ରାକୁ ବାରଣ କରାଯାଇଛି । 

ପରମ୍ପରା ଅନୁଯାୟୀ ମା'ଙ୍କ ପୀଠରେ ଏବଂ ଉଭାସ୍ଥଳରେ କେବଳ ମା'ଙ୍କ ନୀତି ଓ ପୂଜାବିଧି ପାଳନ ହେବ । ନିରାଡ଼ମ୍ବର ଭାବେ ଚଳିତ ବର୍ଷ ଏହି ଯାତ୍ରା ପାଳନ କରାଯିବ । ଏଥିପାଇଁ ପୂର୍ବରୁ ମା' ହିଙ୍ଗୁଳା ଠାକୁରାଣୀଙ୍କ ପୂଜକ ଅନୁରୋଧ କରିଥିଲେ ଯେ, ଯାତ୍ରା ଦିନ କୌଣସି ବ୍ୟକ୍ତି ବା କୌଣସି ଜଣେ ବି ଶ୍ରଦ୍ଧାଳୁ ହିଙ୍ଗୁଳା ପୀଠକୁ ଆସିବେ ନାହିଁ । ନିଜ ଘରେ ପଣାପାଣି ଦେଇ ମା ହିଙ୍ଗୁଳାଙ୍କୁ ପୂଜାର୍ଚ୍ଚନା କରିବେ ଯାହା ସମସ୍ତଙ୍କ ପାଇଁ ଓ ସମାଜ ପାଇଁ ମଙ୍ଗଳ ମୟ ହେବ । 

ସୂଚନା ଯୋଗ୍ୟ, ହିଙ୍ଗୁଳା ଯାତ୍ରାରେ ସାରା ଦେଶରୁ ଲକ୍ଷାଧିକ ଭକ୍ତ ତାଳଚେର ଗୋପାଳପ୍ରସାଦ ଆସି ମା'ଙ୍କ ଦର୍ଶନ କରିବାର ସୁଯୋଗ ପାଇଁଥାନ୍ତି । ଆଜିର ଏହି ପ୍ରଥମ ଦିନରେ ମା'ଙ୍କ ପୀଠ ଜନଶୁନ୍ୟ ହୋଇଛି । ଆସନ୍ତା ୧୫ ତାରିଖରେ ମା'ଙ୍କ ଶୀତଳା ଯାତ୍ରା ତଥା ଶେଷ ଯାତ୍ରା । ଲକ ଡାଉନ ଉଠିଲା ପରେ ପୀଠକୁ ଶ୍ରଦ୍ଧାଳୁ ଆସିବେ କି ନାହିଁ ସେ ବିଷୟରେ ପ୍ରଶାସନ ପକ୍ଷରୁ କୌଣସି ନିଷ୍ପତ୍ତି ନିଆଯାଇ ନାହିଁ ।