ସରିଲା Destination ମ୍ୟାରେଜ୍, ଘରକୁ ଫେରିଲେ ସବ୍ୟାର୍ଚ୍ଚିତା

ଭୁବନେଶ୍ବର: ସରିଲା ମ୍ୟାରେଜ୍ ଏବେ ଘର ବାହୁଡ଼ା । ରାଜସ୍ଥାନରେ ଧୂମଧାମରେ ପରିବାର ବର୍ଗ ଓ ସାଙ୍ଗସାଥୀଙ୍କ ମେଳରେ ହାତକୁ ଦି-ହାତ ହୋଇ ଘରକୁ ଫେରିଛନ୍ତି ଓଲିଉଡର ଚର୍ଚ୍ଚିତ ଯୋଡି ସବ୍ୟସାଚୀ ମିଶ୍ର ଓ ତାଙ୍କ ପତ୍ନୀ ଅର୍ଚ୍ଚିତା । ଏୟାର ଇଣ୍ଡିଆ ଫ୍ଲାଇଟ AI-473 ଜରିଆରେ ଦିଲ୍ଲୀରୁ ଭୁବନେଶ୍ବରରେ ପହଞ୍ଚିଛନ୍ତି ସବ୍ୟାର୍ଚ୍ଚିତା । ମାର୍ଚ୍ଚ ୧ ତାରିଖରେ ଦୁହିଁଙ୍କ ବିବାହ ରାଜସ୍ଥାନର ପିଙ୍କ ସିଟିରେ ହୋଇଥିଲା । ବିବାହର ଗୋଟିଏ ଦିନ ପୂର୍ବରୁ ଏହି ଯୋଡି଼ ସୋସିଆଲ ମିଡିଆରେ ନିଜର ବିବାହ ହେବା ନେଇ ସୂଚନା ଦେବା ପରେ ଚାରିଆଡ଼େ ଚର୍ଚ୍ଚା ଜୋର ଧରିଥିଲା ।

ଓଲିଉଡ (Ollywood) ର ଆଗଧାଡିର ଏହି ଅଭିନେତା (Actor) ଓ ଅଭିନେତ୍ରୀ (Actress) ନିଜ ଅଭିନୟ ଯାଦୁରେ ଓଡ଼ିଶାବାସୀଙ୍କ ମନରେ ଏକ ସ୍ବତନ୍ତ୍ର ସ୍ଥାନ ତିଆରି କରିଛନ୍ତି ।  ଉଭୟେ ଅନେକ ଫିଲ୍ମରେ ଏକାଠି କାମ ମଧ୍ୟ କରିଛନ୍ତି । ବହୁବାର ସାମାଜିକ ସେବା ସମ୍ବନ୍ଧୀୟ କାମରେ ଦୁହିଁଙ୍କୁ ଏକାଠି ଦେଖିବାକୁ ମିଳିଥାଏ । ଏମିତି ଅନେକ ଫ୍ୟାନ୍ସ ଅଛନ୍ତି ଯେଉଁମାନଙ୍କର ପ୍ରଥମ ପସନ୍ଦ ଏହି ଯୋଡି। ଦୁହିଁଙ୍କ ଅଭିନୀତ ଅନେକ ଫିଲ୍ମ  ଖୁବ୍ ସଫଳତା ପାଇଛି । ତେବେ ମାର୍ଚ୍ଚ ପହିଲାରେ ଦୁହେଁ ବିବାହ ବନ୍ଧନରେ ବାନ୍ଧି ହୋଇଥିଲେ । ବିବାହ ପରେ ଗୋଟିଏ ପରେ ଗୋଟିଏ ଫଟୋ ଉଭୟେ ସୋସିଆଲ ମିଡିଆରେ ଛାଡ଼ିଥିଲେ । ତେବେ ଏହି ନବଦମ୍ପତିକୁ ଆଶୀର୍ବାଦ ସହ ଶୁଭେଚ୍ଛା ଜଣାଇଛନ୍ତି ତାଙ୍କ ଫ୍ୟାନ୍ସ ।

ଏକଥା ସମସ୍ତଙ୍କୁ ଜଣା, ଅଭିନେତା ସବ୍ୟଙ୍କ ପ୍ରଥମ ପତ୍ନୀ ସୀମାଙ୍କ ସହ ବିଚ୍ଛେଦ ପରେ ଅଭିନେତ୍ରୀ ଅର୍ଚ୍ଚିତା (Archita Sahu) ଙ୍କ ସହ ସବ୍ୟଙ୍କ ପ୍ରେମ ସମ୍ପର୍କ ନେଇ ଚର୍ଚ୍ଚା ଚାଲିଲା। ଆଜି ସେହି ସମ୍ପର୍କକୁ ଏକ ନୂଆ ପରିଚୟ ମିଳିଛି। ଅର୍ଚ୍ଚିତା ଓ ସବ୍ୟସାଚୀ ବିବାହ ବନ୍ଧନରେ ବାନ୍ଧି ହୋଇଛନ୍ତି। ସେତେବେଳେ ସୀମାଙ୍କ ସାତ ଜନ୍ମର ସାଥୀ ହେବାକୁ ସବ୍ୟ ଅଗ୍ନିକୁ ସାକ୍ଷୀ ରଖି ଶପଥ ନେଇ ଥିଲେ, ଏବେ ଦ୍ୱିତୀୟ ଥର ପାଇଁ ଠିକ ସେହିଭଳି ଶପଥ ନେଇଛନ୍ତି।