 "ଅନୁଭବ ବାଣ୍ଟିଲେ ବର୍ଷେ ତଳର ଅନୁଭୂତି, ସାକ୍ଷୀ ରହିଲେ ଜାଗୃତି")
ନୂଆଦିଲ୍ଲୀ: ରାଜ୍ୟରେ ତପସ୍ୱିନୀ-ସୁମିତ ବିବାଦ ହେଡଲାଇନରେ ଥିବା ବେଳେ ଅନୁଭବ-ବର୍ଷା ଘରୋଇ କଳି ପୁଣି ଥରେ ଚର୍ଚ୍ଚାକୁ ଆସିଛି। ଏଥିର ସିଧା ଭିଡିଓ ଦେଖାଇଛନ୍ତି ଅଭିନେତ୍ରୀଙ୍କ ସାଂସଦ ସ୍ୱାମୀ। ରବିବାର ସାଂସଦ ଅନୁଭବ ତାଙ୍କ ଫେସବୁକ ଆକାଉଣ୍ଟରେ ଭିଡିଓର ବର୍ଷା କରିଛନ୍ତି। ଆଉ ଏହି ଭିଡିଓ ମାଧ୍ୟମରେ ସେ ତାଙ୍କ ପ୍ରତି ହୋଇଥିବା ଅନ୍ୟାୟ ବିରୁଦ୍ଧରେ ସ୍ୱର ଉଠାଇଥିବା ସେ କହିଛନ୍ତି। ସବୁଠୁ ରୋମାଞ୍ଚକର ବିଷୟ ହେଉଛି, ଅନୁଭବ ତାଙ୍କ ପୋଷ୍ଟରେ ନିଜ ଘନିଷ୍ଠ ବାନ୍ଧବୀ ଜାଗୃତି ଶୁକ୍ଲାଙ୍କୁ ଟ୍ୟାଗ କରିଛନ୍ତି।
ରବିବାର ସନ୍ଧ୍ୟାରେ କେନ୍ଦ୍ରାପଡା ସାଂସଦ ଅନୁଭବ ମହାନ୍ତି ଏକ ପୋଷ୍ଟ ସହ ଲଗାତାର ତିନୋଟି ସିସିଟିଭି ଭିଡିଓ ସେୟାର କରିଛନ୍ତି। ସେ ପୋଷ୍ଟରେ ଲେଖିଛନ୍ତି 'ଗତବର୍ଷ ସମାନ ତାରିଖରେ ସମସ୍ତ ସଚ୍ଚୋଟତା ଏବଂ ସମ୍ମାନ ସହିତ ଜଣଙ୍କୁ ଜରୁରୀକାଳୀନ ସମୟରେ ମୋ ଘରକୁ ଅତି କମରେ ୧-୨ ମିନିଟ୍ ପ୍ରବେଶ କରିବାକୁ ଅନୁମତି ଦେବାକୁ ଅନୁରୋଧ କରିଥିଲି। ଅନ୍ତିମ ବିଚାର ପର୍ଯ୍ୟନ୍ତ ତାଙ୍କୁ ଘରୁ ବାହାର କରିଦେବା ମୋର କିମ୍ବା ମୋ ପରିବାରର କୌଣସି ଉଦ୍ଦେଶ୍ୟ ନଥିଲା!
ଆମେ ପୋଲିସ୍ ସହିତ ସମ୍ପୂର୍ଣ୍ଣ ସହଯୋଗ କରିଥିଲୁ ଏବଂ ସେମାନଙ୍କୁ ଆମର ସମସ୍ତ ନିର୍ଦ୍ଦୋଷତା ପ୍ରମାଣ କରୁଥିବା ସମସ୍ତ ଅଡିଓ-ଭିଜୁଆଲ୍ (cctv) ଇତ୍ୟାଦି ଯୋଗାଇ ଦେଇଥିଲୁ। କିନ୍ତୁ ଆଶ୍ଚର୍ଯ୍ୟର କଥା ମୁଁ ଏବଂ ମୋ ଅଫିସ୍ କର୍ମଚାରୀ 498A, 506, 341 & 34 ଅଧୀନରେ ବୁକ୍ ହୋଇଥିଲେ!
ଆମେ ନିର୍ଦ୍ଦୋଷ। ନିରପେକ୍ଷ ତଦନ୍ତ ନିଶ୍ଚିତ ଭାବରେ ଆଶା କରାଯାଏ। ଭୁଲ୍ କରୁଥିବା ବ୍ୟକ୍ତିଙ୍କୁ ଦଣ୍ଡ ଦିଆଯିବା ଜରୁରୀ କିନ୍ତୁ ପ୍ରକୃତ ନିର୍ଦ୍ଦୋଷଙ୍କୁ ନୁହେଁ! ଏହାକୁ ବର୍ଷେରୁ ଅଧିକ ସମୟ ହେଲା! ମୋ ମା, ଭାଇଙ୍କ ପତ୍ନୀ, ମୋର ପ୍ରିୟ ଛୋଟ ଭଣିଜୀ ମଧ୍ୟ ଝିଅ / ମହିଳା! ସେମାନେ କାହିଁକି ନ୍ୟାୟରୁ ବଞ୍ଚିତ ହୋଇଛନ୍ତି!? ଏହା ଯନ୍ତ୍ରଣାଦାୟକ!'
ଏହା ବ୍ୟତୀତ ଅନୁଭବ ସେୟାର କରିଥିବା ଭିଡିଓରେ ଲେଖିଛନ୍ତି ଯେ, ସେହି ଭିଡିଓ ଗୁ଼ଡିକ ତାଙ୍କ ନିର୍ଦ୍ଦୋଷର ପ୍ରମାଣ। ବର୍ଷେରୁ ଅଧିକ ସମୟ ଧରି ନ୍ୟାୟ ପାଇବାରୁ ବଞ୍ଚିତ ହୋଇଥିବାରୁ ସେ ଏହି ଭିଡିଓକୁ ସେୟାର କରୁଛନ୍ତି। ସେ ପୁଣି କହିଛନ୍ତି ଯେ, ଏହି ଭିଡିଓଟିକୁ ଦେଖନ୍ତୁ ଏବଂ କୁହନ୍ତୁ, ମୁଁ ତାଙ୍କୁ ଘରୁ ବାହାର କରିଦେଉଛି ନା ମୁଁ ମୋ ନିଜ ଘରେ ଯିବାକୁ ପୋଲିସ ଓ ତାଙ୍କ ନିକଟରେ ନେହୁରା ହେଉଛି।
କେନ୍ଦ୍ରାପଡା ସାଂସଦ ତାଙ୍କର ଏହି ଫେସବୁକ ପୋଷ୍ଟରେ ଅଭିନେତ୍ରୀ ବର୍ଷା ପ୍ରିୟଦର୍ଶିନୀଙ୍କୁ ଟ୍ୟାଗ କରିଛନ୍ତି। ବର୍ଷାଙ୍କ ସହ ପୋଷ୍ଟରେ ସୁପ୍ରିମକୋର୍ଟ ଓକିଲ ଅଶ୍ୱିନୀ ଦୁବେ, ସାମ୍ବାଦିକା ଜାଗୃତି ଶୁକ୍ଲା, ଫିଲ୍ମ ଡାଇରେକ୍ଟର ଦୀପିକା ନାରାୟଣ ଭରଦ୍ୱାଜ ଓ Men’s Day Out ନାମକ ଗଣମାଧ୍ୟମକୁ ମଧ୍ୟ ଟ୍ୟାଗ କରିଛନ୍ତି। ଏହାବ୍ୟତୀତ ସେ #MenToo ମଧ୍ୟ ବ୍ୟବହାର କରିଛନ୍ତି।
ସୂଚନାଯୋଗ୍ୟ, ଦୀର୍ଘ ଦିନ ଧରି ଅନୁଭବ ଓ ବର୍ଷାଙ୍କ ଘରୋଇ ହିଂସା ମାମଲା କୋର୍ଟରେ ଲମ୍ବିତ ହୋଇ ରହିଛି। ଆପୋଷବୁଝାମଣାରେ ମାମଲାର ସମାଧାନ ହେଉନଥିବା ବେଳେ ଉଭୟେ ଉଭୟଙ୍କ ଉପରେ ନିର୍ଯାତନା ଅଭିଯୋଗ ଆଣିଛନ୍ତି। ଅନୁଭବ ସେୟାର କରିଥିବା ଭିଡିଓ ସେହି ସମୟର, ଯେତେବେଳେ ଅନୁଭବଙ୍କ କିଛି ବନ୍ଧୁ ବର୍ଷାଙ୍କ ବେଡରୁମରେ ପଶି ତାଙ୍କର ଭିଡିଓ ସୁଟ କରିଥିବା ଅଭିଯୋଗ ଆସିଥିଲା। ତେବେ ଏହି ଭିଡିଓ ଜାରି କରି ଅନୁଭବ ପୁଣି ଥରେ ତାଙ୍କ ଘରୋଇ କଳିର ନିଆଁକୁ ପବନ ଦେବାକୁ ଚେଷ୍ଟା କରୁଥିବା ଭଳି ଲାଗୁଛି।
)