ବର୍ଷାରେ ବେହାଲ କଂଟାବାଞ୍ଜି: ରାସ୍ତା ଉପରେ ୪ ଫୁଟର ପାଣି, ଗାଡି ଚଳାଚଳ ବ୍ୟାଘାତ

ବଲାଙ୍ଗିର: ଗତ ରାତିରେ କଂଟାବାଞ୍ଜି ଏନଏସି ତଥା ଆଖପାଖ ଅଂଚଳରେ ପ୍ରବଳ ବର୍ଷା ହୋଇଛି । ଯାହା ଫଳରେ ଜନଜୀବନ ଅସ୍ତବ୍ୟସ୍ତ ହୋଇପଡିଛି । ବର୍ଷାର ପ୍ରଭାବରେ କଂଟାବାଞ୍ଜିରୁ ବଲାଙ୍ଗିର ଯାଉଥିବା ୪୨ ନମ୍ବର ରାଜ୍ୟ ରାଜପଥ କୁର୍ଲି ଗାଁ ନିକଟ ରାସ୍ତା ଉପରେ ୪ ଫୁଟରୁ ଅଧିକ ପାଣି ଯାଉଥିଲା । ଯାହା ଫଳରେ ଯୋଗାଯୋଗ ଏକ ପ୍ରକାର ବିଚ୍ଛିନ୍ନ ହୋଇଯାଇଛି ।

ସେହିପରି କଂଟାବାଞ୍ଜି ଏସ.ଆର ପେଟ୍ରୋଲ ପମ୍ପ ଆଗକୁ ଥିବା ଡ୍ରେନ ବନ୍ଦ ଥିବା ଯୋଗୁ ପାଣି ରାସ୍ତା ଉପରେ ଗଡୁଛି । କଂଟାବାଞ୍ଜି ସହରର ବିଭିନ୍ନ ୱାର୍ଡରେ ପାଣି ପସି ଯିବା ଯୋଗୁ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେବାକୁ ପଡିଛି । ଆଜି(ଗୁରୁବାର) ସକାଳୁ ସେଠାକାର ରହୁଥିବା ଘର ଭିତରକୁ ମଧ୍ୟ ପାଣି ପସିଯାଇଛି । ଆଜି ଅନେକ ଲୋକଙ୍କ ଘରେ ମଧ୍ୟ ଚୁଲା ଜଳି ନାହିଁ କି ପ୍ରଶାସନ ପକ୍ଷରୁ ରିଲିଫ ମଧ୍ୟ ପହଚିଂ ନଥିବାର ଅଭିଯୋଗ କରିଛନ୍ତି ଅଂଚଳ ବାସୀ ।

 ୧ନଂ ୱାର୍ଡରେ ରହୁଥିବା ଘରରେ ପାଣି ପସି ଥିବା ଅଭିଯୋଗ କରି ପଡା ଲୋକ ନେତା ଏନଏସି ଅଫିସ ଘେରାଉ କରିଥିଲେ । ଘେରାଉ ସମୟରେ ରାଜ୍ୟ ସରକାର ସହର ମାନଙ୍କୁ ସବୁ ପ୍ରକାର ଯୋଜନା କରୁଥିବା ବେଳେ ଏନଏସି ପ୍ରଶାସନ ଠିକରେ କାମ କରୁନଥିବା ସେମାନେ ଅଭିଯୋଗ କରିଥିଲେ ।