ବାଲେଶ୍ୱରରେ ୨ ନର୍ସଙ୍କୁ କୋରୋନା, କୋଭିଡ୍ ହସ୍ପିଟାଲରେ ଥିଲେ କାର୍ଯ୍ୟରତ

ବାଲେଶ୍ୱର: ଦୁଇ ନର୍ସଙ୍କୁ କୋରୋନା । ଉଭୟ ବାଲେଶ୍ୱର କୋଭିଡ୍ ହସ୍ପିଟାଲରେ କାର୍ଯ୍ୟରତ ଥିଲେ । ପଜିଟିଭ ଚିହ୍ନଟ ହେବା ପରେ ତାଙ୍କୁ କୋଭିଡ୍ ମେଡିକାଲରେ ଭର୍ତ୍ତି କରାଯାଇଛି । ଜିଲ୍ଲାପାଳ କେ. ସୁଦର୍ଶନ ଚକ୍ରବର୍ତ୍ତୀ ଏନେଇ ସୂଚନା ଦେଇଛନ୍ତି । ତେବେ ୨ ନର୍ସ କୋରୋନା ପଜିଟିଭ ଚିହ୍ନଟ ହେବା ପରେ ସମ୍ପୃକ୍ତ କୋଭିଡ ହସ୍ପିଟାଲର ଅନ୍ୟ କର୍ମଚାରୀଙ୍କ ମଧ୍ୟ କ୍ୱାରେଣ୍ଟାଇନରେ ରଖାଯାଉଛି ।  

କହିରଖୁଛୁ, ଆଜି ସକାଳୁ ରାଜ୍ୟରେ ୬୩ କୋରୋନା ଆକ୍ରାନ୍ତ ଚିହ୍ନିଟ ହୋଇଥିଲେ । ନୂଆ ୬୩ ମାମଲା ମଧ୍ୟରୁ ୬୧ ଜଣ କ୍ୱାରେଣ୍ଟାଇନ ସେଣ୍ଟରରୁ ହିଁ ଚିହ୍ନଟ ହୋଇଛନ୍ତି । ଅନ୍ୟ ଦୁଇ ଜଣ ସ୍ଥାନୀୟ ଅଞ୍ଚଳର ବୋଲି ଜଣାପଡ଼ିଛି । ରାଜ୍ୟ ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗରୁ ଏନେଇ ସୂଚନା ଦିଆଯାଇଛି । 

ନୂଆ ମାମଲା ମଧ୍ୟରେ ସର୍ବାଧିକ ୧୨ ଜଣ ଆକ୍ରାନ୍ତ ଖୋର୍ଦ୍ଧାରୁ ଚିହ୍ନଟ ହୋଇଛନ୍ତି । ସେହିପରି ଜଗତସିଂହପୁରରୁ ୧୧, ଢେଙ୍କାନାଳରୁ ୯, ନୟାଗଡ଼ରୁ ୭, ବଲାଙ୍ଗୀରରୁ ୬, ଗଞ୍ଜାମରୁ ୪, ବାଲେଶ୍ୱରରୁ ୩, କଟକରୁ ୩ ଓ ସୁନ୍ଦରଗଡ଼ରୁ ୨ ଜଣ କୋରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଅନ୍ୟପଟେ ସମ୍ବଲପୁର, ଝାରସୁଗୁଡ଼ା, ପୁରୀ, ମୟୂରଭଞ୍ଜ, କୋରାପୁଟ ଏବଂ ନବରଙ୍ଗପୁରରୁ ଜଣେ ଲେଖାଏଁ ଆକ୍ରାନ୍ତ ଚିହ୍ନଟ ହୋଇଛନ୍ତି ।