ସୁରତ ଫେରିଲେ ପ୍ରବାସୀ ଓଡ଼ିଆ

ବ୍ରହ୍ମପୁର: ଠକିଦେଲେ ସରକାର। ଜୀବନ ଓ ଜୀବିକାର ଭରସା ଦେଇ କୋରୋନା ମହାମାରୀ ସମୟରେ ସୂଦୁର ସୁରତରୁ ଲକ୍ଷାଧିକ ପ୍ରବାସୀ ଓଡ଼ିଆଙ୍କୁ ନିଜ ରାଜ୍ୟକୁ ଫେରାଇ ଆଣିଥିଲେ ସରକାର। ଇତି ମଧ୍ୟରେ ୨ ମାସରୁ ଊର୍ଦ୍ଧ୍ୱ ସମୟ ବିତିଯାଇଥିଲେ ମଧ୍ୟ ସରକାର ସେମାନଙ୍କୁ ନିରାଶ କରିଥିବା ନେଇ ଚର୍ଚ୍ଚା ଜୋର ଧରିଛି। ସେପଟେ ସରକାର କୋରୋନା ଉପରେ ନିୟନ୍ତ୍ରଣ ଆଣିବା ପାଇଁ ଲକଡାଉନ ଓ ସଟଡାଉନ ଜାରି ରଖିଛନ୍ତି। ରାଜ୍ୟରେ ଦିନକୁ ଦିନ କୋରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। 

ସେପଟେ ସୁରତରୁ ନିଜ ଭିଟାମାଟିକୁ ଫେରିଥିବା ପ୍ରବାସୀମାନେ ପୁଣିଥରେ ସୁରତମୁଁହା ହୋଇଛନ୍ତି। କାମ ଧନ୍ଦା ନଥାଇ ଲକ ଡାଉନ ଓ ସଟଡାଉନର କଟକଣା ମଧ୍ୟରେ ଦୀର୍ଘ ଦିନ ଧରି ହାତରେ ହାତ ବାନ୍ଧି ବସିବା ପରେ ପୁଣି ସୁରତ ଯିବା ଆରମ୍ଭ କରିଛନ୍ତି। ଗତକାଲି ଆସିକା ଅଞ୍ଚଳରୁ ୨୭ଜଣ ଶ୍ରମିକ କିଛି ଦଲାଲଙ୍କ ପ୍ରଲଭୋନରେ ପଡି ସୁରତ ଅଭିମୁଖେ ବାହାରି ଥିବା ବେଳେ ସରକାରଙ୍କ ଅବହେଳାକୁ ଦାୟୀ କରିଛନ୍ତି ବିଭିନ୍ନ ସଂଗଠନ 

କୋରୋନା ସମୟରେ ସୁରତ ଏକ ପ୍ରକାର ବନ୍ଦ ହୋଇ ପଡ଼ିଥିଲା। ଫଳରେ ଜୀବନଜୀବିକା ସବୁକିଛି ଚାଲିଯାଇଥିଲା। ସେହି ସମୟରେ ରାଜ୍ୟ ସରକାର ଜୀବିନଜୀବିକାର ପ୍ରତିଶ୍ରୁତ ଦେଇ ସେମାନଙ୍କୁ ନିଜ ଭିଟାମାଟିକୁ ନେଇ ଆସିଥିଲେ। ମାତ୍ର ପାଣିରେ ଗାର ହୋଇ ରହିଗଲା ସରକାରଙ୍କ କର୍ମ ନିଯ଼ୁକ୍ତିର ପ୍ରତିଶ୍ରୁତି। ଜୀବିକା ନପାଇ ହଟହଟା ହୋଇଛନ୍ତି ପ୍ରବାସୀ। କୋରୋନାର ଭୟାବହ ଓ କଟକଣାକୁ ଭେଦକରି ଜନ୍ମ ମାଟି ଛାଡି ପୁଣି କର୍ମ ମାଟି ମୁହା ଗଞ୍ଜାମ ଜିଲ୍ଲାର ଦାଦନ।

ସୁରଥ ପ୍ରଶାସନର ଅନୁମତି ନେଇ ଏକ କମ୍ପାନୀର କିଛି ଦଲାଲ ଗଞ୍ଜାମ ଜିଲ୍ଲାରେ ପହଞ୍ଚି ସ୍ୱତନ୍ତ୍ର ବସ ଯୋଗେ ଆସିକା ଅଞ୍ଚଳରୁ ୨୭ଜଣ ଶ୍ରମିକଙ୍କୁ ସୁରତକୁ ନେଇଥିବା ଜଣାପଡିଛି। ତେବେ ଓଡିଶାରେ ରୋଜି ରୋଟି ଯୋଗାଇ ଦେବାରେ ସରକାର ବିଫଳ ହୋଇଥିବା ବେଳେ ଶ୍ରମିକଙ୍କୁ ସେଠାରେ ସମସ୍ତ ସୁବିଧା ଯୋଗାଇ ଦିଆ ଯାଉଥିବା ଉକ୍ତ କମ୍ପାନୀ ପକ୍ଷରୁ ସୂଚନା ମିଳିଛି।

ସୂଚନା ଯୋଗ୍ୟ ଗତ ମାର୍ଚ୍ଚ ମାସଠାରୁ କୋରୋନାର ଭୟାବହ ସାରା ଦେଶରେ ଲାଗି ରହିବା ପରେ ଜୀବନଜୀବିକା ସବୁକିଛି ଠପ ହୋଇ ଯାଇଥିଲା। ଯାହାଫଳରେ ସୁରତରେ ଦାଦନ ଶ୍ରମିକ ଭାବେ କାମ କରୁଥିବା ପାଖାପାଖି ଅଢେଇ ଲକ୍ଷ ପ୍ରବାସୀ ଜୀବନ ବିକଳରେ ଘର ବାହୁଡା ହୋଇଥିଲେ। ସେତିକି ବେଳେ ସରକାରଙ୍କ ପକ୍ଷରୁ ୨ହଜାର ଟଙ୍କା ଆର୍ଥିକ ସହାୟତା ସହ ଜୀବିକା ଯୋଗାଇ ଦେବାଲାଗି ପ୍ରତିଶ୍ରୁତି ମିଳିଥିଲା।