ଗଞ୍ଜାମ ଲୋକଙ୍କୁ ଭୁବନେଶ୍ୱର ମନା

ସେହିପରି କୋରୋନା ସଂକ୍ରମଣକୁ ଆଖି ଆଗରେ ରଖି ବ୍ରହ୍ମପୁର ଏମକେସିଜି ମେଡିକାଲର ଓପିଡିକୁ ବନ୍ଦ କରାଯାଇଛି । 

ଗଞ୍ଜାମ ଲୋକଙ୍କୁ ଭୁବନେଶ୍ୱର ମନା

ବ୍ରହ୍ମପୁର: ଗତ କିଛି ଦିନ ହେଲା ଗଞ୍ଜାମରେ ତୀବ୍ର ଗତିରେ କୋରୋନା କାୟା ବିସ୍ତାର କରୁଛି । ପ୍ରତ୍ୟେକ ଦିନ ଶହ ଶହ ନୂଆ ମାମଲା ସାମ୍ନାକୁ ଆସୁଛି । ଓଡ଼ିଶାର ହଟସ୍ପଟ ପାଲଟିଥିବା ଏହି ଜିଲ୍ଲାରେ କୋରୋନାକୁ ନିୟନ୍ତ୍ରଣ କରିବା ଏବେ ବଡ଼ ଚ୍ୟାଲେଞ୍ଜ ପାଲଟିଛି । ଏସବୁ ଭିତରେ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି ଜିଲ୍ଲା ପ୍ରଶାସନ । ଗଞ୍ଜାମବାସୀଙ୍କୁ ଭୁବନେଶ୍ୱର ଯିବା ଉପରେ ରୋକ ଲଗାଇବାକୁ ଯାଇ ଗଞ୍ଜାମ-ଖୋର୍ଦ୍ଧା ବର୍ଡର ସିଲ କରାଯାଇଛି । ଗଞ୍ଜାମ ଜିଲ୍ଲାପାଳ ଟ୍ୱିଟ କରି ଏନେଇ ସୂଚନା ଦେଇଛନ୍ତି । 

ସେହିପରି କୋରୋନା ସଂକ୍ରମଣକୁ ଆଖି ଆଗରେ ରଖି ବ୍ରହ୍ମପୁର ଏମକେସିଜି ମେଡିକାଲର ଓପିଡିକୁ ବନ୍ଦ କରାଯାଇଛି । ରେଫେରାଲ କିମ୍ବା ଗୁରୁତର ରୋଗୀଙ୍କୁ ବାଦ ଦେଲେ ଅନ୍ୟମାନଙ୍କ ପ୍ରବେଶ ଉପରେ କଟକଣା ଲଗାଯାଇଛି । ରୋଗୀଙ୍କ ସହ ଜଣେ ହିଁ ଆଟେନେଣ୍ଡକୁ ପ୍ରବେଶ ନିମନ୍ତେ ଅନୁମତି କରାଯାଉଛି । ବଡ଼ ମେଡ଼ିକାଲର ମୁଖ୍ୟ ଫାଟକକୁ ବାଦ ଦେଲେ ଅନ୍ୟ ସମସ୍ତ ଫାଟକକୁ ସିଲ କରିଛି ପ୍ରଶାସନ । 

ଅନ୍ୟପଟେ ଜିଲ୍ଲାରେ ଜୋରଦାର ହୋଇଛି କୋରୋନା ଆକ୍ରାନ୍ତ ଚିହ୍ନଟ ପ୍ରକ୍ରିୟା । ଆଜିଠୁ ଆସନ୍ତା ୧୩ ତାରିଖ ପର୍ଯ୍ୟନ୍ତ ଜିଲ୍ଲାର ସହରାଞ୍ଚଳକୁ ଶଟଡାଉନ କରାଯାଇଛି । ଏହି ସମୟ ମଧ୍ୟରେ ସ୍ୱାସ୍ଥ୍ୟ କର୍ମୀ ଘର ଘର ବୁଲି ଲୋକଙ୍କ ସ୍ୱାସ୍ଥ୍ୟ ପରୀକ୍ଷା କରିବେ ।