୨୦ ଭଡ଼ାଟିଆଙ୍କ ମାସକର ଭଡ଼ା ଛାଡ଼ କଲେ ମୁରଲୀ ମୋହନ

ରାଧାଶ୍ୟାମ ଆଚାର୍ଯ୍ୟ, ବ୍ରହ୍ମପୁର: ଲକଡାଉନ୍ ଯୋଗୁ ଜୀବନ ଜୀବିକା ଅଟକି ଯାଇଥିବା ବେଳେ ଚାରିଆଡ଼େ ହାହାକାର ପରିସ୍ଥିତି ଦେଖା ଦେଇଛି । ଅନେକ ଗରିବ ଗୁରୁବା ଭଡ଼ାଟିଆ ନିଜ ଘର ଭଡ଼ା ଦେବାକୁ ସକ୍ଷମ ହୋଇପାରୁନାହାଁନ୍ତି । ଦୁଇ ବେଳି ଦୁଇ ମୁଠା ଭଲକରି ଖାଇବାକୁ ମଧ୍ୟ ଏବେ ବହୁ କଷ୍ଠ ସହିବାକୁ ପଡ଼ୁଛି । ଏଭଳି ଘଡ଼ିସନ୍ଧି ମୁହୂର୍ତ୍ତରେ ଅସହାୟଙ୍କୁ ସହାୟତାର ହାତ ବଢ଼ାଇଛନ୍ତି ବ୍ରହ୍ମପୁର ସହରର ବଦାନ୍ୟ ବ୍ୟକ୍ତି ମୁରଲି ମୋହନ ଆଚାର୍ଯ୍ୟ । ନିଜ ଜାଗାରେ ଭଡ଼ାଟିଆ ଥିବା ୨୦ଟି ଅସହାୟ ପରିବାରଙ୍କ ମାସକର ଭଡ଼ା ଛାଡ୍ କରିବା ସହ ପ୍ରତି ପରିବାରକୁ ୨୫ କିଲୋ ଲେଖାଏଁ ଚାଉଳ ପ୍ରଦାନ କରିଛନ୍ତି । ମୁରଲି ମୋହନଙ୍କ ଏଭଳି ପ୍ରୟାସକୁ ବିଭିନ୍ନ ମହଲରେ ସ୍ୱାଗତ କରାଯାଇଛି । 

ଦେଶ କୋରୋନା ମୁକାବିଲା କରୁଛି । ଲକଡାଉନ୍ ଯୋଗୁ ଅନେକ ଜୀବିକା ହରାଇ ଭୋକ ଉପବାସରେ ଡହଳ ବିକଳ ହେଉଛନ୍ତି । ତେଣୁ ଅନ୍ୟମାନଙ୍କୁ ମଧ୍ୟ ଗରିବ ଲୋକଙ୍କୁ ସହାୟତା କରିବା ପାଇଁ ନିବେଦନ କରିଛନ୍ତି ମୁରଲି ମୋହନ । ଅନ୍ୟପଟେ ତାଙ୍କର ଏପରି କାର୍ଯ୍ୟକୁ ବିଭିନ୍ନ ମହଲରେ ସ୍ୱାଗତ କରାଯାଇଛି । ବ୍ରହ୍ମପୁର ଉପଜିଲ୍ଲାପାଳ ମଧ୍ୟ ତାଙ୍କୁ ସମ୍ମାନୀତ କରିଛନ୍ତି । 

ଅସହାୟଙ୍କୁ ସହାୟତାର ହାତ ବଢ଼ାଇଥିବା ମୁରଲି ବାବୁ ଏବେ ଅନ୍ୟମାଙ୍କ ପାଇଁ ଉଦାହରଣ ପାଲଟି ଥିବା ବେଳେ ସାରା ଦେଶ ଏକ ହୋଇ ଅସହାୟଙ୍କୁ ସହାୟତା ଯୋଗାଇବା ଲାଗି ଆଗେଇ ଆସିବା ଜରୁରୀ ହୋଇପଡିଛି ।