ବହୁଚର୍ଚ୍ଚିତ କ୍ଷୀର ବ୍ୟବସାୟୀ ହତ୍ୟାକାଣ୍ଡର ଗୁମର ଖୋଲିଲା ପୋଲିସ

ବ୍ରହ୍ମପୁର: ବ୍ରହ୍ମପୁର ଗୋଶାଣି ନୂଆଗାଁ ଥାନା ଅନ୍ତର୍ଗତ ହିଲପଟଣାଠାରେ ପ୍ରତିଷ୍ଠିତ କ୍ଷୀର ବ୍ୟବସାୟୀ ଲମ୍ବୋଧର ମୁନି ହତ୍ୟାକାଣ୍ଡ ଘଟଣା ୫ ଦିନ ପରେ ଗୁମର ଫିଟାଇବାରେ ସଫଳ ହୋଇଛି ପୋଲିସ । ପୋଲିସର ସ୍ୱତନ୍ତ୍ର ଟିମ ବିଭିନ୍ନ ସ୍ଥାନରେ ଚଢାଉ କରି ମାଷ୍ଟର ମାଇଣ୍ଡ ତଥା ଲମ୍ବୋଦରଙ୍କ ଡ୍ରାଇଭର  ରୁପେଶ ପାଢୀ ସମେତ ୩ ଜଣ ଅଭିଯୁକ୍ତଙ୍କୁ ଗିରଫ କରିବା ରେ ସଫଳ ହୋଇଛି ପୋଲିସ । ଅଭିଯୁକ୍ତଙ୍କ ଠାରୁ ୪ ଲକ୍ଷ ନଗଦ ଟଙ୍କା ସମେତ ଲୁଟ ହୋଇଥିବା ସୁନା ଅଳଙ୍କାରକୁ ଜବତ କରିଛି ପୋଲିସ । ହତ୍ୟାକାଣ୍ଡରେ ଆହୁରି ଦୁଇ ଜଣ ଅଭିଯୁକ୍ତଙ୍କ ସମ୍ପୃକ୍ତି ଥିବା ପୋଲିସ ତଦନ୍ତ ବେଳେ ଜାଣିବାକୁ ପାଇଥିବା ବେଳେ ଅତିଶୀଘ ଅନ୍ୟ ଅଭିଯୁକ୍ତଙ୍କୁ ଗିରଫ କରାଯିବ ବୋଲି ସୂଚନା ଦେଇଛି।

ସୂଚନାଯୋଗ୍ୟ ମାଲିକର ବିଶ୍ୱାସରେ ବିଷ ଭରିଦେଲା ଅଙ୍ଗରଖି ଭାବେ କାମ କରୁଥିବା ଡ୍ରାଇଭର।  ଦୀର୍ଘ ୭ ବର୍ଷ ସମ୍ପର୍କରେ ଡୋରି ବାନ୍ଧି ମାଲିକଙ୍କ ସମ୍ପତି ଉପରେ ଲୋଲୁପ ଦୃଷ୍ଟି ପକାଇବା ସହ ଲୁଟ କରିବା ଲାଗି ରଚିଥିଲା ଷଡଯନ୍ତ୍ର । ବ୍ରହ୍ମପୁର ହିଲ ପାଟଣା ଅଞ୍ଚଳର ବହୁ ଚର୍ଚ୍ଚିତ କ୍ଷୀର ବ୍ୟବସାୟୀ ଲମ୍ବୋଧର ମୁନି ହତ୍ୟାକାଣ୍ଡ ଘଟଣା ଉପରୁ ପରଦା ଉଠାଇବା ପରେ ପଦାକୁ ଆସିଛି ଏଭଳି କିଛି ଚାଞ୍ଚଲ୍ୟକର ତଥ୍ୟ । ଦୀର୍ଘ ୫ ଦିନ ଧରି ଛାନବିନ କରିବା ପରେ ହତ୍ୟାକାଣ୍ଡ ଉପରୁ ପରଦା ଉଠାଇବାରେ ସଫଳ ହୋଇଛି ଗୋସାଣି ନୂଆଁଗାଁ ଥାନା । 

ଗତ ୧୩ ତାରିଖ ଦିନ ବିଳମ୍ବିତ ରାତିରେ ଯୋଜନାବଦ୍ଧ ଭାବେ ଲମ୍ବୋଦରଙ୍କ ଘରୁ ଲୁଟପାଟ ପରେ ଘଟିଥିବା ହତ୍ୟାକାଣ୍ଡର ମାଷ୍ଟର ମାଇଣ୍ଡ ଖୋଦ୍ ଲମ୍ବୋଦରଙ୍କ ଅଙ୍ଗରଖି ଭାବେ ପାଖେପାଖେ ରହୁଥିବା ଡ୍ରାଇଭର ସୁରେଶ ପାଢୀ ବୋଲି ପୋଲିସ ଜାଣିବାକୁ ପାଇଥିଲା. ପରେ ବିଭିନ୍ନ ସ୍ଥାନରେ ଚଢାଉ କରିଥିଲା ପୋଲିସର ସ୍ୱତନ୍ତ୍ର ଟିମ ।  ଗୋଟିଏ ପଟେ ଖୋଦ ଏସପି ଘଟଣାସ୍ଥଳରେ ହତ୍ୟାକାଣ୍ଡର ତଦନ୍ତ ଚଳାଇଥିବା ବେଳେ ଚତୁରତାର ସହ ପୋଲିସ ନିକଟରେ ରହି ସମସ୍ତ ଗତିବିଧି ଉପରେ ନଜର ରଖିଥିଲା ସୁରେଶ।

ପରେ ଚମ୍ପଟ ମାରିବା ଲାଗି ଯୋଜନା କରୁଥିବା ବେଳେ ମାଷ୍ଟର ମାଇଣ୍ଡ ଡ୍ରାଇଭର ପରେ ୩ ଜଣଙ୍କୁ ଗିରଫ କରିଛି ପୋଲିସ । ସେମାନଙ୍କ ଠାରୁ  ନଗଦ ୪ଲକ୍ଷ ଟଙ୍କା ସହ ଲୁଟ ହୋଇଥିବା ସୁନା ଅଳଙ୍କାର ମଧ୍ୟ ଜବତ କରାଯାଇଥିବା ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛି ପୋଲିସ । ଏହି ସୁପରିକଳ୍ପିତ ହତ୍ୟାକାଣ୍ଡରେ ସମ୍ପୃକ୍ତି ଥିବା ଆହୁରି ଦୁଇ ଜଣ ଅଭିଯୁକ୍ତ ଫରାର ଥିବା ବେଳେ ଅତିଶୀଘ୍ର ଅନ୍ୟ ଅଭିଯୁକ୍ତଙ୍କୁ ଗିରଫ କରାଯିବ ବୋଲି ସୁଚନା ଦେଇଛି ପୋଲିସ । ସେପଟେ ଲକ ଡାଉନର ନିଶବ୍ଦତାର ସୁଯୋଗ ନେଇ ଅଭିଯୁକ୍ତମାନେ ନିଜ ଲକ୍ଷକୁ ବାସ୍ତବତାର ରୂପ ଦେବାରେ ସଫଳ ହୋଇଛି ।