କୋଭିଡ ନିୟମକୁ ଉଲ୍ଲଙ୍ଘନ କରି ଯଜ୍ଞ କରିବା ମାମଲାରେ ୧୧ ଜଣ ଗିରଫ

ରାଧାଶ୍ୟାମ ଆଚାର୍ଯ୍ୟ, ବ୍ରହ୍ମପୁର:- କୋରୋନାର ମହା ବିପତ୍ତି ସମୟରେ ସରକାରୀ ନିୟମକୁ ଖୋଲା ଉଲ୍ଲଙ୍ଘନ କରି ଗ୍ରାମରେ ଯଜ୍ଞ କରିବା ନାଏବ ସରପଞ୍ଚଙ୍କୁ ପଡ଼ିଲା ମହଙ୍ଗା । ଏନେଇ ଥାନାରେ ମାମଲା ରୁଜୁ ହେବା ପରେ ୧୧ ଜଣଙ୍କୁ ପୋଲିସ ଗିରଫ କରିଛି ବୋଲି ସୂଚନା ମିଳିଛି । ଏହି ଘଟଣାଟି ପୋଲସରା ବ୍ଲକ ଅନ୍ତର୍ଗତ ଜା.ଡେଙ୍ଗା ପଦର ପଞ୍ଚାୟତ ମର୍ଦ୍ଧରାଜପୁର ଗ୍ରାମରେ ଘଟିଛି ।

ଜିଲ୍ଲା ପ୍ରଶାସନ ପକ୍ଷରୁ କଡ଼ା ନିର୍ଦ୍ଦେଶନାମା ଜାରି କରା ଯାଇଥିଲେ ମଧ୍ୟ ସବୁ ନିୟମକୁ କୁଠାରଘାତ କରି ୫ ଶହରୁ ଉର୍ଦ୍ଧ୍ୱ ଲୋକଙ୍କ ଉପସ୍ଥିତିରେ ପଞ୍ଚମୁଖି ହନୁମାନ ମନ୍ଦିର ପ୍ରତିଷ୍ଠା ଲାଗି ଯଜ୍ଞ ଆୟୋଜନ କରିଥିଲେ ନାଏବ ସରପଞ୍ଚ କୃଷ୍ଣଚନ୍ଦ୍ର ଜେନା । ଘଣ୍ଟ ମୃଦଙ୍ଗ ସହିତ ଶହ ଶହ ମହିଳାମାନେ କଳସୀ ଯାତ୍ରା କରି ସାମାଜିକ ଦୂରତାକୁ ଭୁଲି ଯାଇଥିବା ଭଳି ଦୃଶ୍ୟ  ଭାଇରାଲ ହୋଇଥିଲା । ଯାହାକୁ ନେଇ ଉକ୍ତ ଗ୍ରାମର ଏକ ଯୁବକ ଏହି ଯଜ୍ଞକୁ ବିରୋଧ କରିବାରୁ ତାଙ୍କୁ ଆକ୍ରମଣ କରାଯାଇଥିବା ବେଳେ ପୋଲସରା ଥାନାରେ ମାମଲା ରୁଜୁ ହୋଇଥିଲା ।