କୋରୋନା ସାଜିଛି କାଳ, ଫିକା ପଡ଼ିବ ମା'ଙ୍କ ପୂଜା

ବ୍ରହ୍ମପୁର: ଚଳିତ ବର୍ଷ ଗଞ୍ଜାମ ଜିଲ୍ଲାରେ ଫିକା ପଡିପାରେ ମା ଦୁର୍ଗାଙ୍କ ପୂଜା ସମାରୋହ। ପୂଜା ମଣ୍ଡପ ଗୁଡିକରେ ଏଥର ଦୁର୍ଗାପୂଜାର ଆୟୋଜନ ନ କରିବା ଲାଗି ଜିଲ୍ଲାପାଳ ବିଜୟ ଅମୃତ କୁଲାଙ୍ଗେ ଆହ୍ୱାନ କରିବା ପରେ ମା'ଙ୍କ ଆବାହନ ଏକ ପ୍ରକାର ଅନିଶ୍ଚିତତା ଘେରକୁ ଠେଲି ହୋଇଯାଇଛି । ଯାହାକୁ ସହରର ବିଭିନ୍ନ ପୂଜା ମଣ୍ଡପ କମିଟି ସହଜରେ ଗ୍ରହଣ କରି ପାରୁନଥିବା ବେଳେ ବର୍ଷ ବର୍ଷର ପରମ୍ପରା କ୍ଷୁର୍ଣ୍ଣ ନକରି ବିନା ଭକ୍ତ ଓ ବିନା ଜାକଜକମରେ ପୂଜା ଆୟୋଜନ କରିବା ଲାଗି ଅନୁମତି ଲୋଡିଛନ୍ତି ।   

ରେଶମ ନଗରୀରେ ଏଥର ଫିକା ପଡିବ ଦଶହରା । ମା'ଙ୍କ ଆବାହନରେ ପ୍ରତିବନ୍ଧକ ସାଜୁଛି କୋରୋନା । ଧରାପୃଷ୍ଠରେ ପୂଜା ପାଇବେନି ମା ମହିଷାମର୍ଦିନୀ. ବର୍ଷ ବର୍ଷ ଧରି  ଚାଲି ଆସିଥିବା ପରମ୍ପରା ଉପରେ ଜିଲ୍ଲା ପ୍ରଶାସନ କଟକଣା ଜାରି କରିବା ଲାଗି ମନସ୍ଥ କରିଛି । କୋରୋନା କୋପ ଦୃଷ୍ଟିରେ ରଖି ଚଳିତ ବର୍ଷ ମଣ୍ଡପରେ ପୂଜା ଅର୍ଚ୍ଚନା ଆୟୋଜନ ନ କରିବା ନିମନ୍ତେ ଜିଲ୍ଲାପାଳ ଆହ୍ୱାନ କରିବା ପରେ ଯେମିତି ଅନିଶ୍ଚିତତା ଘେରରେ ଠେଲି ହୋଇଯାଇଛି ମା'ଙ୍କ ପୂଜା ଆୟୋଜନ ।

ଗତ କିଛି ଦିନ ଧରି ମହାମାରୀ କୋରୋନା ଗଞ୍ଜାମ ଜିଲ୍ଲାରେ ତାଣ୍ଡବଲୀଳା ରଚୁଥିବା ବେଳେ ଜିଲ୍ଲାବାସୀଙ୍କୁ ସାମାନ୍ୟ ଆଶ୍ୱସ୍ତି ମିଳିଛି । ଏଭଳି ପରିସ୍ଥିତିରେ ଯଦି ପୂଜା ସମାରୋହର ଆୟୋଜନ ହୁଏ ତେବେ ଦକ୍ଷିଣ ଓଡିଶାର କୋଣ ଅନୁକୋଣରୁ ହଜାର ହଜାର ଜନସମାଗମ ହେବାର ସମ୍ଭାବନା ରହିଛି । ଏଣୁ ଜୀବିକାକୁ ଗୁରୁତ୍ୱ ଦେଇ ଜିଲ୍ଲାରେ ଅନଲକ-୪ କୋହୋଳ କରାଯାଇଥିବା ବେଳେ ପୂର୍ବ ନିଷ୍ପତ୍ତି ଭଳି ଚଳିତ ଦଶହରାରେ ମଧ୍ୟ ପୂଜା କମିଟି ଓ ଜନସାଧାରଣଙ୍କ ସହଯୋଗ କାମନା କରିଛନ୍ତି ଜିଲ୍ଲାପାଳ।

ଜୀ ଓଡିଶାକୁ ଏକ ସାକ୍ଷାତକାରରେ ଜିଲ୍ଲାପାଳ ଦେଇଥିବା ମନ୍ତବ୍ୟକୁ ଯେମିତି ସହଜରେ ଗ୍ରହଣ କରିପାରୁ ନାହାଁନ୍ତି ବିଭିନ୍ନ ପୂଜା ମଣ୍ଡପ କମିଟି । ସହରରେ ପ୍ରତିବର୍ଷ ଛୋଟ ବଡ କରି ଶହେରୁ ଊର୍ଦ୍ଧ୍ୱ ମଣ୍ଡପରେ ମା'ଙ୍କ ପୂଜା ଆୟୋଜନ ହେଉଥିବା ବେଳେ ଗଣେଶ ପୂଜା ଠାରୁ ମା'ଙ୍କ ଶୁଭଖୁଣ୍ଟ ସ୍ଥାପନା ହୋଇଥାଏ । ହେଲେ ଚଳିତ ବର୍ଷ ଗଣେଶ ପୂଜା ଉପରେ ରୋକ ଲାଗିବା ଯୋଗୁ ବର୍ତ୍ତମାନ ସୁଦ୍ଧା ଶୁଭଖୁଣ୍ଟି ମଧ୍ୟ ସ୍ଥାପନା ହୋଇପାରିନି। ହାତରେ ଆଉ କମ ସମୟ ରହିଥିବା ବେଳେ ଜିଲ୍ଲା ପ୍ରଶାସନ ନିଜ ନିଷ୍ପତ୍ତିରେ ପୂର୍ଣ୍ଣ ବିଚାର କରି ମଣ୍ଡପରେ କୋଭିଡ କଟକଣା ନିୟମରେ ପୂଜା ଆୟୋଜନ କରିବା ପାଇଁ ଅନୁମତି ଦେବା ଲାଗି ଗୁହାରୀ କରିଛନ୍ତି କର୍ମକର୍ତ୍ତା ।