ପ୍ରବାସୀ ଓଡ଼ିଆଙ୍କୁ ଆଇନର ପାଠ ପଢ଼ାଇଲେ ଗଞ୍ଜାମ ଏସପି

ରାଧାଶ୍ୟାମ ଆଚାର୍ଯ୍ୟ, ବ୍ରହ୍ମପୁର: ଏବେ ଓଡ଼ିଶା ଫେରୁଛନ୍ତି ପ୍ରବାସୀ ଓଡ଼ିଆ । ଗୁଜୁରାଟ, କେରଳ, କର୍ଣ୍ଣାଟକ, ଆନ୍ଧ୍ର ପ୍ରଦେଶ ଇତ୍ୟାଦିରେ ଫସିରହିଥିବା ଶ୍ରମିକମାନଙ୍କୁ ଓଡ଼ିଶା ଫେରାଇ ଆଣିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ପ୍ରୟାସ ଜାରି ରହିଛି । ଏଥିପାଇଁ ସ୍ୱତନ୍ତ୍ର ରେଳର ବ୍ୟବସ୍ଥା ମଧ୍ୟ ହୋଇଛି ।  ଗଞ୍ଜାମ ଏସପି ବ୍ରିଜେଶ କୁମାର ରୟ ହାତଯୋଡ଼ି ନମସ୍କାର କରି ପ୍ରବାସୀ ଓଡିଆମାନଙ୍କୁ ସଙ୍ଗରୋଧ ବେଳେ ନିୟମମାନନ୍ତୁ ଓ ପ୍ରଶାସନକୁ ସହଯୋଗ କରିବାକୁ ଅନୁରୋଧ କରିଥିଲେ । ଏହି ସମୟରେ ଗଞ୍ଜାମ ଏସପିଙ୍କ ଭିଡିଓ ଓ ଫଟୋ ବେଶ ଭାଇରାଲ୍ ହୋଇଥିଲା । ରାଜ୍ୟରେ ଏସପିଙ୍କୁ  ବେଶ୍ ପ୍ରଶଂସା  କରାଯାଇଥିଲା । ହେଲେ ୩ ତାରିଖ ଦିନ ଗଞ୍ଜାମର ବେଗୁନିଆପଡ଼ା ବ୍ଳକ ରାଇପୁର ଓ ଜନତା ନୋଡାଲ୍ ସ୍କୁଲର କ୍ୱାରେଣ୍ଟାଇନ କେନ୍ଦ୍ରରୁ ଫେରାର ଘଟଣା ପରେ ଆକ୍ସନ ମୁଡ଼ରେ ଆସିଛନ୍ତି ଏସପି । ଆଉ ମଙ୍ଗଳବାର ଗଣମାଧ୍ୟମ ଆଗରେ ପ୍ରବାସୀ ଓଡ଼ିଆଙ୍କୁ ଆଇନର ପାଠ ପଢ଼ାଇଛନ୍ତି । ଫେରାର ହୋଇ ଥିବା ସମସ୍ତଙ୍କୁ ଧରିଅଣାଯାଇଥିବା ସୂଚନା ଦେଇଥିଲେ । 

ଏହି ଘଟଣାରେ ତହସିଲଦାରଙ୍କ ଦ୍ୱାରା କୋଦଳା ଥାନାରେ ମାମଲା ରୁଜୁ ହୋଇଛି । ସେହିପରି ଜଗନ୍ନାଥ ପ୍ରସାଦ ଜାମୁଗୋରଡ଼ା ଆଦର୍ଶରେ ଥିବା ପ୍ରବାସୀ ଓଡ଼ିଆମାନେ ଗଣ୍ଡଗୋଳ କରିଥିଲେ। ତେଣୁ ଗଣ୍ଡଗୋଳ ପାଇଁ ମଧ୍ୟ ମାମଲା ରୁଜୁ କରାଯାଇଛି । ୨୬୮ଟି ଟିଏମସିରେ ୧୭ହଜାରରୁ ଅଧିକ ପ୍ରବାସୀ ଓଡ଼ିଆ ଅଛନ୍ତି । ସମସ୍ତେ ସରକାରଙ୍କ ନିୟମ ପାଳନ କରନ୍ତୁ । ସରକାରୀ ନିୟମର ପାଳନ ନକଲେ ଦୃଢ କାର୍ଯ୍ୟାନୁଷ୍ଠାନ ନିଆଯିବ। ଅନ୍ୟ ଜିଲ୍ଲାର ସଙ୍ଗରୋଧ କେନ୍ଦ୍ରକୁ ପଠାଇ ଅଲଗା ରଖାଯିବ ବୋଲି କହିଥିଲେ ଏସପି ବ୍ରିଜେଶ କୁମାର ରୟ ।