ଜାଣନ୍ତୁ ଓଡ଼ିଶାର ୪ର୍ଥ ପଜିଟିଭ ବ୍ୟକ୍ତି କେତେ ଜଣଙ୍କ ସଂସ୍ପର୍ଶରେ ଆସିଛନ୍ତି

ପ୍ରଜ୍ଞା ପାରମିତା ପତ୍ରୀ, ଭୁବନେଶ୍ୱର: ଓଡ଼ିଶାରେ ଗତକାଲି ଚତୁର୍ଥ କୋରୋନା ପଜିଟିଭକୁ ଚିହ୍ନଟ କରାଯାଇଛି । ବର୍ତ୍ତମାନ ଓଡ଼ିଶାରେ କୋରୋନା ପଜିଟିଭଙ୍କ ସଂଖ୍ୟା ୪କୁ ବୃଦ୍ଧି ପାଇଛି । ଏହି ଚତୁର୍ଥ ପଜିଟିଭ ବ୍ୟକ୍ତି ଜଣଙ୍କ ବୟସ ୨୯ବର୍ଷ ଓ ସେ ଭଦ୍ରକ ଜିଲ୍ଲାର । ଆଉ ଆଜି ତାଙ୍କର ସମ୍ପୂର୍ଣ୍ଣ ଟ୍ରାଭେଲ ହିଷ୍ଟ୍ରି ଟ୍ରେସ କରାଯାଇଛି । ମାର୍ଚ୍ଚ ୧୮ ତାରିଖରେ ସେ ଦୁବାଇରୁ ଓଡ଼ିଶା ଆସିଛନ୍ତି । ଦୁବାଇରୁ EK570 ବିମାନ ଯୋଗେ କୋଲକତା ଆସିଥିଲେ । କୋଲକତା ବିମାନ ବନ୍ଦରରୁ ହାୱଡ଼ା ରେଲୱେ ଷ୍ଟେସନକୁ ଟ୍ୟାକ୍ସି ଯୋଗେ ଆସି ସେହି ଦିନ ହିଁ ଇଷ୍ଟକୋଷ୍ଟ ଟ୍ରେନରେ ଭଦ୍ରକ ଆସିଥିଲେ । ଇଷ୍ଟକୋଷ୍ଟ ଟ୍ରେନର ବଗି S-11ରେ ବସିଥିଲେ । ଭଦ୍ରକ ଷ୍ଟେସନରେ ପହଞ୍ଚିବା ପରେ ଅଟୋରେ ଘରକୁ ଯାଇଥିଲେ । ସେ ସିଧାସଳଖ ୭ଜଣଙ୍କ ସଂସ୍ପର୍ଶରେ ଆସିଛନ୍ତି ବୋଲି ସୂଚନା ହସ୍ତଗତ ହୋଇଛି । ତେବେ ସବୁଠାରୁ ବଡ଼ କଥା ହେଲା ଘରକୁ ଫେରିବା ପରେ ତାଙ୍କ ନିକଟରେ COVID19ର କୌଣସି ଲକ୍ଷଣ ଦେଖାଯାଇ ନ ଥିଲା । ମାତ୍ର ବିଦେଶରୁ ଫେରିଥିବାରୁ ସେ ନିଜକୁ ଘରେ କ୍ୱାରେଣ୍ଟାଇନରେ ରଖିବା ସହିତ ଟେଷ୍ଟ ପାଇଁ ସାମ୍ପୁଲ ପଠାଯାଇଥିଲା । ଆଉ ମାର୍ଚ୍ଚ ୩୧ତାରିଖରେ ତାଙ୍କ ରିପୋର୍ଟ ପଜିଟିଭ ଆସିଥିଲା ।

ଗତକାଲି ସଂନ୍ଧ୍ୟାରେ ୪୭୩ ଜଣଙ୍କର ନମୁନା ପରୀକ୍ଷୀ ପାଇଁ ପଠାଯାଇଥିବାବେଳେ ଏମ୍ସକୁ ୧୫ଟି ସାମ୍ପୁଲ ପଠାହୋଇଥିଲା । ଆଉ ସେଥିରୁ ୧୪ଟି ନେଗେଟିଭ ଥିବାବେଳେ ଗୋଟିଏ ପଜିଟିଭ ବାହାରିଥିଲା । ତେବେ ଏ ନେଇ ଓଡ଼ିଶା ସରକାର ସମ୍ପୂର୍ଣ୍ଣ ପ୍ରସ୍ତୁତ ଥିବାବେଳେ ସାରା ଓଡ଼ିଶା ଲକ୍ ଡାଉନରେ ରହିଛି । ସଂକ୍ରମଣ ବ୍ୟକ୍ତି ଜଣଙ୍କ ଭଦ୍ରକର ବୋଲି ଜଣା ପଡ଼ିବା ପରେ ଭଦ୍ରକ ଜିଲ୍ଲାପାଳଙ୍କୁ ଯଥାଶିଘ୍ର ତାଙ୍କୁ ଆଇସୋଲେସନରେ ରଖିବା ପାଇଁ ସ୍ୱାସ୍ଥ୍ୟ ସଚିବ ଜିଲ୍ଲାପାଳଙ୍କ ସହ ଗତକାଲି ଆଲୋଚନା କରିଥିଲେ । ବର୍ତ୍ତମାନ ତାଙ୍କର ସ୍ୱାସ୍ଥ୍ୟ ଅବସ୍ଥା ସ୍ଥିର ଅଛି । ପୂର୍ବରୁ ପଜିଟିଭ ଚିହ୍ନଟ ହୋଇଥିବା ତିନି ଜଣଙ୍କ ଅବସ୍ଥା ମଧ୍ୟ ଭଲ ଥିବା ରାଜ୍ୟ କୋଭିଡ ୧୯ ମୁଖପାତ୍ର ସୁବ୍ରୋତ ବାଗଚି ସୂଚନା ଦେଇଛନ୍ତି ।