ପୁଣି ଗୋଟିଏ ଦିନରେ ଚିହ୍ନଟ ହେଲା ୧୮ କୋରୋନା ପଜିଟିଭ, ଆକ୍ରାନ୍ତଙ୍କ ସଂଖ୍ୟା ୩୯କୁ ବୃଦ୍ଧି

ଭୁବନେଶ୍ୱର: ବଢିଲା ଓଡ଼ିଶାରେ କୋରୋନା ଆକ୍ରାନ୍ତଙ୍କ ସଂଖ୍ୟା । ଗୋଟିଏ ଦିନରେ ଚିହ୍ନଟ ହେଲେ ୧୮ କୋରୋନା ପଜିଟିଭ । ଆଜି ଅପରାହ୍ନରେ ୨ଟି କୋରୋନା ପଜିଟିଭ ସାମ୍ନାକୁ ଆସିଥିବା ବେଳେ ବର୍ତ୍ତମାନ ଆଉ ୧୬ଜଣଙ୍କ ରିପୋର୍ଟ ପଜିଟିଭ ଆସିଛି । ବର୍ତ୍ତମାନ ଓଡ଼ିଶାରେ କୋରୋନା ପଜିଟିଭଙ୍କ ସଂଖ୍ୟା ୩୯କୁ ବୃଦ୍ଧି ପାଇଛି ।  ଏ ନେଇ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଟ୍ୱିଟ୍ ଜରିଆରେ ସୂଚନା ଦିଆଯାଇଛି ।

16 more COVID positive cases confirmed in Bhubaneswar.

— H & FW Dept Odisha (@HFWOdisha) April 5, 2020

ଆଜି ଚିହ୍ନଟ ହୋଇଥିବା ସମସ୍ତ ୧୮ଜଣ ଭୁବନେଶ୍ୱର ଅଞ୍ଚଳର । ପ୍ରଥମେ ଚିହ୍ନଟ ହୋଇଥିବା ଦୁଇ ଜଣଙ୍କ ମଧ୍ୟରୁ ଜଣେ ୭୦ ବର୍ଷିୟ କପିଳା ପ୍ରସାଦ ହାଉସିଂ ବୋର୍ଡ କୋଲନୀର ଓ ଦ୍ୱିତୀୟ ଜଣଙ୍କ ବମିଖାଲ ଅଞ୍ଚଳର । ତେବେ ବର୍ତ୍ତମାନ ଜଣାପଡିଥିବା ସମସ୍ତ ୧୬ଜଣ ଭୁବନେଶ୍ୱରର । ଏହି ୧୬ଜଣଙ୍କ ମଧ୍ୟରୁ ୧୫ଜଣ ବମିଖାଲ ଅଞ୍ଚଳର । ବମିଖାଲରେ ନୂଆ କୋରୋନା ପଜିଟିଭ ଚିହ୍ନଟ ହେବା ପରେ ପୁରା ଅଞ୍ଚଳକୁ ସିଲ କରିଦିଆଯାଇଛି । 
 
ଓଡ଼ିଶାରେ ବର୍ତ୍ତମାନ ୩୭ଟି ଆକ୍ଟିଭ କେସ ଥିବାବେଳେ ଦୁଇ ଜଣ କୋରୋନା ଆକ୍ରାନ୍ତ ସୁସ୍ଥ ହୋଇ ଘରକୁ ଫେରିଛନ୍ତି । ଆଜି ଗୋଟିଏ ଦିନରେ ପୁଣି ଥରେ ଏକାସହ ୧୬ଜଣଙ୍କ ରିପୋର୍ଟ ପଜିଟିଭ ଆସିବା ପରେ ସମସ୍ତଙ୍କ ନିଦ ହଜିଯାଇଛି । ତେବେ ଏ ନେଇ ନ ଡରି ସଚେତନ ହେବାର ଆବଶ୍ୟକ ରହିଛି । ରାଜ୍ୟ ସରକାର ମଧ୍ୟ ଏହି ଭୟଙ୍କର ଭୂତାଣୁ ନ ବ୍ୟାପିବା ପାଇଁ ସାରା ରାଜ୍ୟକୁ ଲକ୍ ଡାଉନରେ ରଖିଛିନ୍ତି । ଭୟଭୀତ ନ ହେବା ପାଇଁ ଓଡ଼ିଶାବାସୀଙ୍କୁ ସରକାର ନିବେଦନ କରିଛନ୍ତି   ।