ସକ୍ରିୟ ଲୁଟେରା: ଆତଙ୍କ ଖେଳାଇଛି ନମ୍ବର ବିହୀନ ବାଇକ୍

ଭୁବନେଶ୍ବର:  ଦିନକରେ ଦୁଇ ଦୁଇଟି ବଡ଼ ଧରଣର ଲୁଟ୍ । ଯୋଜନାବଦ୍ଧ ଭାବେ ଲୁଟେରା ଆଖି ପିଛୁଳାକେ ଲୁଟି ନେଇଛନ୍ତି ୨୯ ଲକ୍ଷ ଟଙ୍କା।  ଗୋଟିଏ ଲୁଟ୍ ସୁବର୍ଣ୍ଣପୁରରେ ହୋଇଥିବାବେଳେ ଅନ୍ୟ ଲୁଟ୍ ହୋଇଛି ଯାଜପୁର ଜେନାପୁର ଥାନା ଅଧୀନ କନ୍ତପଡ଼ାରେ । ସମୟ-ପୂର୍ବାହ୍ଣ ପ୍ରାୟ ୧୧ଟା ୩୫। ପ୍ରଥମ ଲୁଟ ଖବର ଆସିଥିଲା ସୁବର୍ଣ୍ଣପୁରରୁ । ସ୍ଥାନୀୟ ବରୋଦା ବ୍ୟାଙ୍କରୁ ୨୧ ଲକ୍ଷ ଟଙ୍କା ଏଟିଏମରେ ଲୋଡ୍ ହେବା ଲାଗି ଯିବାର ଥିଲା ଉଲୁଣ୍ଡା । ରାଇଟର୍ ସେଫ୍ ଗାର୍ଡ ସିକ୍ୟୁରିଟି ସଂସ୍ଥାର କର୍ମଚାରୀ ସୁଧାଂଶୁ ପଧାନ ଓ ସୁନୀଲ ମହାରଣା ଟଙ୍କା ନେଇ ଦୁଇଟି ବାଇକରେ ବାହାରିଥିଲେ।  

ଗୋଟିଏ ବ୍ୟାଗରେ ଥିଲା ୧୧ ଲକ୍ଷ ଓ ଆଉ ଏକ ବ୍ୟାଗରେ ଥିଲା ୧୦ ଲକ୍ଷ ଟଙ୍କା । ଉଭୟେ ବାଘଲପୁର ଗାଁ ଯେମିତି ପାର୍ ହୋଇଛନ୍ତି। ହଠାତ୍ ୩ଟି ବାଇକରେ ୬ ଲୁଟେରା ତାଙ୍କୁ ଘେରିଯାଇଥିଲେ । ସୁଧାଂଶୁଙ୍କୁ ଧକ୍କା ମାରି ତଳେ ପକାଇବା ସହ ସୁନୀଲଙ୍କ ମୁଣ୍ଡରେ ବନ୍ଧୁକ ଲଗାଇଦେଲେ । ଆଉ ଟଙ୍କା ବ୍ୟାଗ୍ ଧରି ଛୁ ମାରିଥିଲେ। ଏନେଇ ଧର୍ମଶାଳା ଫାଣ୍ଡିରେ ଅଭିଯୋଗ ପରେ ପୋଲିସ ଛାନଭିନ୍ ଜାରି ରହିଛି । ତେବେ ଘଟଣାସ୍ଥଳରୁ ପୋଲିସ ଲୁଟେରାଙ୍କର ଗୋଟିଏ ନମ୍ବର ବିହୀନ ବାଇକ୍ ଜବତ କରିଛି। 

ସେମିତି ଦ୍ୱିତୀୟ ଲୁଟ (Loot) ଘଟଣା ଘଟିଛି ଯାଜପୁର (Jajpur) ଜିଲ୍ଲାରେ । ସମୟ-ପୂର୍ବାହ୍ଣ ପ୍ରାୟ ୧୧ଟା ୪୦ । ଜେନାପୁର ଥାନା ଅଧୀନ କନ୍ତପଡ଼ା ପେଟ୍ରୋଲ ପମ୍ପର ଜଣେ କର୍ମଚାରୀ ୮ ଲକ୍ଷ ଟଙ୍କା ଡିପୋଜିଟ୍ କରିବାକୁ ଯାଉଥିଲେ କବାଟବନ୍ଧ ଷ୍ଟେଟ୍ ବ୍ୟାଙ୍କକୁ । ମାତ୍ର ବାରକଣା ଖେଳ ପଡ଼ିଆ ନିକଟରେ ଗୋଟିଏ ବାଇକରେ ୩ ଲୁଟେରା ଆସି ତାଙ୍କୁ ଘେରିଗଲେ। ମୁଣ୍ଡରେ ବନ୍ଧୁକ ଲଗାଇ ଭୟଭୀତ କରିଥିଲେ ଓ ୮ ଲକ୍ଷ ଟଙ୍କା ଥିବା ବ୍ୟାଗ୍ ଛଡ଼ାଇ ଫେରାର୍ ହୋଇଯାଇଥିଲେ।  ଏ ସମ୍ପର୍କରେ ଜାଣିବା ପରେ ପେଟ୍ରୋଲ ପମ୍ପ (Petrol Pump) ମାଲିକ ଜେନାପୁର ଥାନାରେ ଲିଖିତ ଅଭିଯୋଗ କରିଛନ୍ତି । ହେଲେ ଲୁଟେରାଙ୍କ କିଛି ଟେର୍ ପାଇନି ପୋଲିସ (Police) ।

ତେବେ ପ୍ରଶ୍ନ ଉଠୁଛି, ଏତେ ପରିମାଣର ଟଙ୍କାକୁ କାହିଁକି ବାଇକ ଯୋଗେ ଅସୁରକ୍ଷିତ ଢଙ୍ଗରେ ପଠାଯାଉଥିଲା ?  ବ୍ୟାଗରେ ଟଙ୍କା ଯାଉଥିବା କଥା ଲୁଟେରା କେମିତି ଜାଣିଲେ ? କ'ଣ ପୂର୍ବରୁ ଏ ସମ୍ପର୍କିତ ସୂଚନା ପାଇ ଲୁଟେରା ଯୋଜନା କରିଥିଲେ ? ଏସବୁ ଦିଗକୁ ନେଇ ପୋଲିସ ତଦନ୍ତ ତ କରିବ ନିଶ୍ଚୟ । ଅନ୍ୟପକ୍ଷରେ ଜବତ ନମ୍ବର ବିହୀନ ବାଇକ୍ (Bike) ବି ସୁରାକ ସନ୍ଧାନରେ ପୋଲିସକୁ ସାହାଯ୍ୟ କରିପାରେ। 

Edited: Zee Odisha Desk