ରାଜ୍ୟରେ ଆଉ ଜଣେ କୋରୋନା ଆକ୍ରାନ୍ତଙ୍କ ମୃତ୍ୟୁ, ଆକ୍ରାନ୍ତଙ୍କ ସଂଖ୍ୟା ୮୨୮କୁ ବୃଦ୍ଧି

ଭୁବନେଶ୍ୱର: ରାଜ୍ୟରେ ଆଉ ଜଣଙ୍କ ଜୀବନ ନେଲା କୋରୋନା । ମୃତକ ଗଞ୍ଜାମ ଜିଲ୍ଲାର । ପୂର୍ବରୁ ଗଞ୍ଜାମରେ କୋରୋନା ଯୋଗୁ ଜଣଙ୍କର ମୃତ୍ୟୁ ହୋଇଥିବା ବେଳ ଏବେ ଏହି ସଂଖ୍ୟା ୨ରେ ପହଞ୍ଚିଛି । ସେହିପରି ପୂର୍ବରୁ ଖୋର୍ଦ୍ଧାରେ ମଧ୍ୟ ୨ ଜଣଙ୍କ ମୃତ୍ୟୁ ହୋଇଥିଲା । ଅର୍ଥାତ ରାଜ୍ୟରେ କୋରୋନା ଜନିତ ୪ ଜଣଙ୍କ ମୃତ୍ୟୁ ହେଲାଣି । ରାଜ୍ୟ ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଏନେଇ ସୂଚନା ଦିଆଯାଇଛି । 

ଅନ୍ୟପଟେ ଆଜି ୯୧ଟି ନୂଆ ମାମଲା ସାମ୍ନାକୁ ଆସିଛି । ଏଥିମଧ୍ୟରୁ ସର୍ବାଧିକ ଆକ୍ରାନ୍ତ ଭଦ୍ରକ(୨୮)ର ରହିଛନ୍ତି । ସେହିପରି ବାଲେଶ୍ୱରରେ ୧୭, ଗଞ୍ଜାମରେ ୧୫, କଟକରେ ୧୨, ପୁରୀରେ ୭, କେନ୍ଦୁଝରରେ ୪, ଖୋର୍ଦ୍ଧାରେ ୩, ବଲାଙ୍ଗୀରରେ ୨ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ଅନ୍ୟ ଜିଲ୍ଲାଗୁଡ଼ିକ ମଧ୍ୟରେ କେନ୍ଦ୍ରାପଡ଼ା, ସୁନ୍ଦରଗଡ଼ ଓ ସମ୍ବଲପୁରରୁ ଜଣେ ଲେଖାଏ ଆକ୍ରାନ୍ତ ଚିହ୍ନଟ ହୋଇଛନ୍ତି । 

ଏବେ ରାଜ୍ୟରେ ଆକ୍ରାନ୍ତଙ୍କ ସଂଖ୍ୟା ୮୨୮ରେ ପହଞ୍ଚିଛି । ତେବେ ଏମାନଙ୍କ ମଧ୍ୟରୁ ୧୯୬ ଜଣ ସୁସ୍ଥ ହେଲେଣି । ସେହିପରି ୫ ଜଣଙ୍କ ମୃତ୍ୟୁ ମଧ୍ୟ ହେଲାଣି । ଅନ୍ୟ ୬୨୭ ଜଣ ଆକ୍ରାନ୍ତ ରାଜ୍ୟର ବିଭିନ୍ନ କୋଭିଡ ହସ୍ପିଟାଲରେ ଚିକିତ୍ସିତ ହେଉଛନ୍ତି । 

ତେବେ ଗୁରୁତ୍ୱପୂର୍ଣ୍ଣ କଥା ହେଉଛି, ସମ୍ବଲପୁରରେ ପ୍ରଥମ ଥର ପାଇଁ କୋରୋନା ମାମଲା ସାମ୍ନାକୁ ଆସିଛି । ଆଉ ଏହାକୁ ମିଶାଇ ରାଜ୍ୟର ସମୁଦାୟ ୨୨ ଜିଲ୍ଲାରେ କୋରୋନା ପ୍ରବେଶ କଲାଣି । ଅନ୍ୟପଟେ ଏବେ ବି ୮ ଜିଲ୍ଲାକୁ ମାଡ଼ିପାରିନି କୋରୋନା ଭାଇରସ୍ । ପଶ୍ଚିମ ଓଡ଼ିଶାର ସୁବର୍ଣ୍ଣପୁର, ବରଗଡ଼ ଓ ନୂଆପଡ଼ାରେ ଏପର୍ଯ୍ୟନ୍ତ କୋରୋନା ଏଣ୍ଟ୍ରି କରିପାରିନି । 

ନଜର ପକାନ୍ତୁ ରାଜ୍ୟ ଡ୍ୟାସବୋର୍ଡ ଉପରେ । ରାଜ୍ୟରେ ସର୍ବାଧିକ ପ୍ରଭାବିତ ହୋଇଛି ଗଞ୍ଜାମ । ଜିଲ୍ଲାରେ କୋରୋନା ଆକ୍ରାନ୍ତଙ୍କ ସଂଖ୍ୟା ୨୯୨ ରହିଛି । ଏମାନଙ୍କ ମଧ୍ୟରୁ ୩୦ ଜଣ ସୁସ୍ଥ ହୋଇସାରିଛନ୍ତି । ସେହିପରି ୩ ଜଣଙ୍କ ମୃତ୍ୟୁ ମଧ୍ୟ ହେଲାଣି । ଅନ୍ୟ ୨୫୯ ଜଣଙ୍କ ଚିକିତ୍ସା ଚାଲିଛି । ଅନ୍ୟପଟେ ବାଲେଶ୍ୱରରେ ୧୧୯, ଯାଜପୁରରେ ୧୨୧, ଖୋର୍ଦ୍ଧାରେ ୫୯, ଭଦ୍ରକରେ ୭୪, ସୁନ୍ଦରଗଡ଼ରେ ୨୭, ଅନୁଗୋଳରେ ୧୫, କେନ୍ଦ୍ରାପଡ଼ାରେ ୨୭ ଓ ମୟୂରଭଞ୍ଜରେ ୧୧ ଜଣ ଆକ୍ରାନ୍ତ ଚିହ୍ନଟ ହେଲେଣି । ଅନ୍ୟପଟେ ଜଗତସିଂହପୁର(୫), ପୁରୀ(୧୮), ବୌଦ୍ଧ(୪), କେନ୍ଦୁଝର(୮), କଟକ(୨୨), କଳାହାଣ୍ଡି(୨), ବଲାଙ୍ଗୀର(୪), ଝାରସୁଗୁଡ଼ା(୨), ନୟାଗଡ଼(୬), ଦେବଗଡ଼(୨), କୋରାପୁଟ(୧), ଢେଙ୍କାନାଳ(୧) ଓ ସମ୍ବଲପୁର(୧)ରୁ ମଧ୍ୟ କୋରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି ।