ସମାଜସେବୀ ଆଦିତ୍ୟ ଦାଶଙ୍କ ମୃତ୍ୟୁ, କାରଣ ଅସ୍ପଷ୍ଟ

ଶାନ୍ତସ୍ୱରୂପ ରାଉତ, ଭୁବନେଶ୍ୱର: ସମାଜସେବୀ ଆଦିତ୍ୟ ଦାଶଙ୍କ ମୃତ୍ୟୁ। ଭୁବନେଶ୍ୱର ଲିଙ୍ଗରାଜ ରେଳ ଷ୍ଟେସନ ନିକଟରୁ ତାଙ୍କ ମୃତ ଦେହ ଉଦ୍ଧାର ହୋଇଛି । ତେବେ ଏହା ଆତ୍ମହତ୍ୟା ନା ହତ୍ୟା ତାହା ସ୍ପଷ୍ଟ ହୋଇନାହିଁ । ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ସେହିପରି ଶବ ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲକୁ ପଠାଯାଇଛି । 

ଯାହା ଜଣାପଡ଼ିଛି, ଗତ ମାସ ୯ ତାରିଖରେ ଆଦିତ୍ୟ ବିବାହ କରିଥିଲେ । ତେବେ ଆଜି ସକାଳୁ ରେଳ ଲାଇନରେ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ତାଙ୍କ ମୃତ ଦେହ ପଡ଼ିଥିବା ଦେଖିବାକୁ ମିଳିଥିଲା । ଖବର ପାଇଁ ଘଟଣାସ୍ଥଳରେ ପୋଲିସ ପହଞ୍ଚିଛି । ଏପର୍ଯ୍ୟନ୍ତ ମୃତ୍ୟୁର କାରଣ ସ୍ପଷ୍ଟ ହୋଇନାହିଁ । ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ଏନେଇ ଚିତ୍ର ଆହୁରି ସ୍ପଷ୍ଟ ହେବ । 

କିଛି ଦିନ ପୂର୍ବରୁ ବଲିଉଡ ଅଭିନେତା ସୁଶାନ୍ତ ସିଂହ ରାଜପୁତଙ୍କ ଆତ୍ମହତ୍ୟା ଘଟଣାକୁ ନେଇ ନିଜ ଫେସବୁକରେ ଏକ ପୋଷ୍ଟ କରିଥିଲେ ଆଦିତ୍ୟ । ଯେଉଁଥିରେ ସେ ଆତ୍ମହତ୍ୟା ଏକ ବିକଳ୍ପ ନୁହେଁ ବୋଲି କହିଥିଲେ । ସୁଶାନ୍ତଙ୍କ ଠାରୁ ଏଭଳି ନିଷ୍ପତ୍ତି ଆଶା କରାଯାଇ ନ ଥିବା ଲେଖିଥିଲେ ଆଦିତ୍ୟ ଦାଶ । ଆଉ ଆଜି ଯେତେବେଳେ ରେଳ ଲାଇନରୁ ସନ୍ଦେହ ଜନକ ଅବସ୍ଥାରେ ତାଙ୍କ ମୃତଦେହ ଉଦ୍ଧାର ହୋଇଛି, ପ୍ରଶଂସକମାନେ ଏହାକୁ ସହହଜରେ ବିଶ୍ୱାସ କରିପାରୁନାହାଁନ୍ତି । 

ଜଣେ ସମର୍ଥକ ସୋସିଆଲ ମିଡିଆରେ କହିଛନ୍ତି, ''ଜୀବନ ଜିଇଁବାର କଳା ଶିଖାଉଥିବା ଲୋକଟି ଆଜି ଅକାରଣେ ଝଡ଼ି ପଡ଼ିଲା, ସତରେ ଏ ବିଧିର ବିଧାନ ବଡ଼ ବିଚିତ୍ର ।''

ଅନ୍ୟ ଜଣେ ପ୍ରଶଂସକ କହିଛନ୍ତି, ''ଆଦିତ୍ୟ ଭାଇ ଆମ ଗହଣରେ ଆଉ ନାହାନ୍ତି ବିଶ୍ୱାସ କରିହଉନି ! ମଦ ବରୋଧ ଠାରୁ ଲୋକଙ୍କ ସେବା ସିଏ ଜଡିତ ଥିଲେ ସିଏ କାହିଁକି ଏପରି କଠୋର ନିଷ୍ପତି ନେଲେ ବୁଝିହଉନି ! ପୋଲିସ ତଦନ୍ତ କଲେ ସବୁ ସତ୍ୟ ସାମ୍ନାକୁ ଆସିପାରିବ !''