ରାଜଧାନୀରେ ପ୍ରବାସୀ ଓଡ଼ିଆଙ୍କ ପ୍ରବେଶ ପାଇଁ ରହିଛି ଏହି ସବୁ ଗାଇଡଲାଇନ

ସରୋଜ ବେହେରା, ଭୁବନେଶ୍ୱର: ରାଜ୍ୟ ବାହାରୁ ରାଜଧାନୀ ଭୁବନେଶ୍ୱର ଫେରୁଥିବା ବ୍ୟକ୍ତି ବିଶେଷଙ୍କ ପାଇଁ ବିଏମ୍‌ସି ପକ୍ଷରୁ ହୋଇଛି ୩ଟି ସ୍କ୍ରିନିଂ ସେଣ୍ଟର । ସହରର ତିନିଟି ପ୍ରବେଶ ପଥ ଖଣ୍ଡଗିରି, ଉତ୍ତରା ଛକ ଓ ରସୁଲଗଡ଼ରେ ଏହି ସ୍କ୍ରିନିଂ ସେଣ୍ଟର କରାଯାଇଛି । ବାହାର ରାଜ୍ୟରୁ ରାଜଧାନୀ ଭିତରକୁ ଆସୁଥିବା ବ୍ୟକ୍ତି ଏଠାରେ ପହଞ୍ଚିବା ପରେ ପ୍ରଥମେ ସେମାନଙ୍କ ଥର୍ମାଲ ସ୍କ୍ରିନିଂ କରାଯିବ । ଥର୍ମାଲ ସ୍କ୍ରିନିଂ ପରେ ସେମାନେ ପଞ୍ଜିକରଣ କରିବେ । ଏହାପରେ ହୋମ କ୍ୱାରେଣ୍ଟାଇନ୍ କିମ୍ବା ସରକାରୀ କ୍ୱାରେଣ୍ଟାଇନ କିମ୍ବା ପେଡ୍ କ୍ୱାରେଣ୍ଟାଇନରେ ରହିବା ପାଇଁ ବ୍ୟବସ୍ଥା କରାଯିବ । 

ରସୁଲଗଡ଼ କୋଚିଲେଇ ହାଟ ନିକଟରେ ଥିବା ଆଶ୍ରମ ସ୍କୁଲ, ଖଣ୍ଡଗିରିର ତପୋବନ ସ୍କୁଲ ଓ ଉତ୍ତର ଛକରେ ଥିବା କୃପାଜଳ ଇଂଜିନିୟରିଂ କଲେଜରେ ଏହି ସ୍କ୍ରିନିଂ କରାଯିବ । କ୍ୱାରେଣ୍ଟାଇନ ସେଣ୍ଟର ଥିବା ବ୍ୟକ୍ତିଙ୍କ ଘରେ ଷ୍ଟିକର ଲାଗିବ । ଏହା ସହ କ୍ୱାରେଣ୍ଟାଇନରେ ଥିବା ବ୍ୟକ୍ତିଙ୍କ ସ୍ୱାସ୍ଥ୍ୟ ବାବଦରେ ସମୟ ସମୟରେ ଅପଡେଟ ନିଆଯିବ । ଏ ମଧ୍ୟରେ କୌଣସି ଲକ୍ଷଣ ଦେଖାଦିଏ, ତେବେ ସମ୍ପୃକ୍ତ ବ୍ୟକ୍ତିଙ୍କୁ ଚିକିତ୍ସା ପାଇଁ ପଠାଯିବ । ସେଭଳି ରାଜ୍ୟର ଅନ୍ୟ ଜିଲ୍ଲାରୁ ଆସୁଥିବା ଲୋକେ ଭୁବନେଶ୍ୱରରେ ରହିବାରେ କୌଣସି ଅସୁବିଧା ନାହିଁ । ସେମାନେ କେବଳ ସରକାରଙ୍କ ସାମାଜିକ ଦୂରତ୍ୱ ସହ ଅନ୍ୟ ଗାଇଡ୍ ଲାଇନ୍ ମାନିବାକୁ ପଡ଼ିବ ।