ପୁଣି ଜଣେ କୋଭିଡ୍ ଯୋଦ୍ଧାଙ୍କୁ କୋରୋନା

ଭୁବନେଶ୍ୱର: ପୁଣି ଜଣେ କୋଭିଡ୍ ଯୋଦ୍ଧାଙ୍କୁ କୋରୋନା । ଜଣେ ୩୪ ବର୍ଷୀୟ ମହିଳା କୋଭିଡ ଯୋଦ୍ଧାଙ୍କ କୋରୋନା ରିପୋର୍ଟ ପଜିଟିଭ ଆସିଛି । ସେ ଏକ କୋଭିଡ ହସ୍ପିଟାଲର କର୍ମଚାରୀ ଥିବା ସୂଚନା ମିଳିଛି । ତେବେ ଭୁବନେଶ୍ୱରରୁ ଆଜି(ମଙ୍ଗଳବାର) ଚିହ୍ନଟ ହୋଇଥିବା ୨୯ କୋରୋନା ପଜିଟିଭ୍ ମଧ୍ୟରୁ ମହିଳା ଜଣଙ୍କ ଅନ୍ୟତମ ।  ଏହାସହ ୧୪ ଜଣ ଲୋକାଲ କଣ୍ଟାକ୍ଟ କେସ୍ ଓ ୧୪ ଜଣ କ୍ୟାରେଣ୍ଟାଇନ କେସରେ ଚିହ୍ନଟ ହୋଇଥିବା ସୂଚନା ଦେଇଛି ବିଏମସି । ଏହାକୁ ମିଶାଇ ରାଜଧାନୀରେ ମୋଟ ୪୭୯ରେ ପହଞ୍ଚିଲା କୋରୋନା ସଂକ୍ରମିତଙ୍କ ସଂଖ୍ୟା ।

ଅନ୍ୟପକ୍ଷେ ରାଜ୍ୟ ସରକାରଙ୍କ ଦ୍ୱାରା ସବିଶେଷ ତଥ୍ୟ ଅନୁସାରେ, ମଙ୍ଗଳବାର ସକାଳ ସୁଦ୍ଧା ରାଜ୍ୟରେ ମୋଟ ୧୦,୦୯୭ କୋରୋନା ସଂକ୍ରମିତ ଚିହ୍ନଟ ହୋଇଛନ୍ତି । ଏଥିରୁ ୪୨ ଜଣ କୋରୋନା ସଂକ୍ରମିତଙ୍କ ମୃତ୍ୟୁ ଘଟିଛି । ଏହାସହ କୋରୋନା ସଂକ୍ରମିତ ସହ ଅନ୍ୟ ରୋଗ ଯୋଗୁଁ ମୃତ୍ୟୁ ବରଣ କରିଥିବା ରୋଗୀଙ୍କ ସଂଖ୍ୟା ୧୨ ପହଞ୍ଚିଛି । ୬,୪୮୬ ଜଣ କୋରୋନା ସଂକ୍ରମିତ ସୁସ୍ଥ ହୋଇଛନ୍ତି । ଏହା ବ୍ୟତୀତ ରାଜ୍ୟରେ ମୋଟ ୩,୫୫୭ ସଂକ୍ରିୟ କୋରୋନା ସଂକ୍ରମିତ ମାମଲା ରହିଛି ।