ସେପ୍ଟେମ୍ବର ପୂର୍ବରୁ DL ଓ LL ପାଇଁ କରିହେବନି ଆବେଦନ: ପରିବହନ ମନ୍ତ୍ରୀ

ମଳୟ ମହାନ୍ତି, ଭୁବନେଶ୍ୱର: ରାଜ୍ୟରେ କୋରୋନା ଯୋଗୁଁ କେମିତି ରହିଛି ପରିବହନ ସେବା ? ନୂଆ ଟ୍ରାଫିକ ନିୟମ ଆସିବା ପରେ ଲକ୍ଷ ଲକ୍ଷ ଲୋକ DL ଓ LL ପାଇଁ ଆବେଦନ କରିବାକୁ ଚାହୁଁଛନ୍ତି । ହେଲେ କୋରୋନା ଯୋଗୁଁ ଏବେ ଏହା ବାଧାପ୍ରାପ୍ତ ହୋଇଛି । ଏ ତମାମ ବିଷୟରେ ପ୍ରତିତ୍ରିୟା ରଖିଛନ୍ତି ପରିବହନ ମନ୍ତ୍ରୀ ପଦ୍ମନାଭ ବେହେରା । 

ଆସନ୍ତା ସେପ୍ଟେମ୍ବର ପୂର୍ବରୁ DL ଓ  LL ପାଇଁ ଆବେଦନ କରିହେବନି । ପୁରୁଣା ଆବେଦନକାରୀଙ୍କୁ ଜୁଲାଇରୁ ମିଳିବ ନୂଆ ସ୍କଟ । ଅଢ଼େଇ ଲକ୍ଷ ଆବେଦନକାରୀଙ୍କୁ ନୂଆ ସମୟ ଦିଆଯିବ ବୋଲି ଶ୍ରୀଯୁକ୍ତ ବେହେରା କହିଛନ୍ତି । 

ସେହିପରି ଆନ୍ତଃରାଜ୍ୟ ବସ ସେବା ଉପରେ ମଧ୍ୟ ସେ ପ୍ରତିକ୍ରିୟା ରଖିଛନ୍ତି । ଏନେଇ କୌଣସି ନିଷ୍ପତ୍ତି ହୋଇନି । ଆମେ ଏପର୍ଯ୍ୟନ୍ତ ଅନ୍ୟ ରାଜ୍ୟ ସହ ଆଲୋଚନା ମଧ୍ୟ କରି ନ ଥିବା କହିଛନ୍ତି ପଦ୍ମନାଭ । 

ରଥଯାତ୍ରା ପାଇଁ ସ୍ୱତନ୍ତ୍ର ବସ ଚଳାଚଳ ହେବ କି ? ମନ୍ତ୍ରୀଙ୍କ କହିବା କଥା ହେଲା, ପ୍ରତ୍ୟେକ ବର୍ଷ ରଥଯାତ୍ରା ପୂର୍ବରୁ ୨ ଥର ବୈଠକ ବସେ । ଏ ପର୍ଯ୍ୟନ୍ତ ବୈଠକ ହୋଇନି । ସରକାର ଯାହା ନିର୍ଦ୍ଦେଶ ଦେବେ, ସେହି ଅନୁସାରେ ବିଭାଗ ପ୍ରସ୍ତୁତ ହେବ ।

ସେହିପରି OSRTC ବସ ଚଳାଚଳ ପ୍ରସଙ୍ଗରେ ମଧ୍ୟ ପ୍ରତିକ୍ରିୟା ରଖିଛନ୍ତି ପରିବହନ ମନ୍ତ୍ରୀ । ଏବେ ରାଜ୍ୟର ୬୬ ରୁଟରେ OSRTC ବସ୍ ଚାଲୁଛି । ତେବେ ୨୦ରୁଟରେ ଯାତ୍ରୀ ହେଉନାହାଁନ୍ତି । ୨ରୁ ୩ ଜଣ ଲୋକରେ ବସ ଚଳାଚଳ କରୁଛି । ତେଣୁ ଏତେ କ୍ଷତିରେ ବସ ଚଳାଇବା ସମ୍ଭବ ନୁହେଁ । ତେଣୁ ବାଧ୍ୟ ହୋଇ ଏହି ସବୁ ରୁଟରେ ବସ୍ ସେବା ବନ୍ଦ ହେବ ବୋଲି ସେ କହିଛନ୍ତି ।