ଭୁବନେଶ୍ୱର କର କ୍ଲିନିକକୁ ଏବେ ଯାଆନ୍ତୁ ନାହିଁ...

ଚିହ୍ନଟ ହେଲେ ତୃତୀୟ କୋରୋନା ଆକ୍ରାନ୍ତ, ଲୋକଙ୍କୁ ଏଭଳି ପରାମର୍ଶ ଦେଲା ସ୍ୱାସ୍ଥ୍ୟ ବିଭାଗ

ଭୁବନେଶ୍ୱର କର କ୍ଲିନିକକୁ ଏବେ ଯାଆନ୍ତୁ ନାହିଁ...
ଫାଇଲ ଫଟୋ

ଭୁବନେଶ୍ୱର: ରାଜ୍ୟରେ ତୃତୀୟ କୋରୋନା ଆକ୍ରାନ୍ତ ଚିହ୍ନଟ ହେବା ପରେ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ସାମ୍ନାକୁ ଆସୁଛି । ପୂର୍ବରୁ ୨ ଆକ୍ରାନ୍ତ ଭୁବନେଶ୍ୱରର ହୋଇଥିବା ବେଳେ ତୃତୀୟ ଆକ୍ରାନ୍ତ ମଧ୍ୟ ସମାନ ସ୍ଥାନର ବୋଲି ସ୍ପଷ୍ଟ ହୋଇଛି । ଗତ ମାର୍ଚ୍ଚ ୧୦ ତାରିଖରେ ସେ ଦିଲ୍ଲୀରୁ ବିମାନ ଯୋଗେ ଭୁବନେଶ୍ୱର ଆସିଥିଲେ । ସେହିପରି ୨୧ ତାରିଖରେ ଆକ୍ରାନ୍ତ ଜଣକ ଚିକିତ୍ସା ପାଇଁ କର କ୍ଲିନିକ ଓପିଡିକୁ ଯାଇଥିଲେ । ପରବର୍ତ୍ତୀ ସମୟରେ ଗତ ୨୪ ତାରିଖରେ ସେ ଏହି କ୍ଲିନିକରେ ଭର୍ତ୍ତି ହୋଇଥିଲେ । ୬୦ ବର୍ଷୀୟ ଏହି ବ୍ୟକ୍ତି ଜଣକ ଏବେ କୋରୋନା ଆକ୍ରାନ୍ତ ବୋଲି ସ୍ପଷ୍ଟ ହୋଇଛି । ଆଉ ଏହା ପରେ ଲୋକଙ୍କୁ କର କ୍ଲିନିକ ନଯିବା ପାଇଁ ପରାମର୍ଶ ଦେଇଛି ସ୍ୱାସ୍ଥ୍ୟ ବିଭାଗ । ଟ୍ୱିଟ କରି ଏନେଇ ସ୍ୱାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଛି । 

ସେହିପରି ଆକ୍ରାନ୍ତ ଜଣକ ଚିହ୍ନଟ ହେବା ପୂର୍ବରୁ କାହା କାହା ସଂସ୍ପର୍ଶରେ ଆସିଥିଲେ, ସେନେଇ ତଥ୍ୟ ସଂଗ୍ରହ କରାଯାଉଛି । କର କ୍ଲିନିକରେ ଯେଉଁ କର୍ମଚାରୀ ଏବଂ ଡାକ୍ତର ଆକ୍ରାନ୍ତଙ୍କ ଚିକିତ୍ସାରେ ନିୟୋଜିତ ଥିଲେ, ସେମାନଙ୍କୁ ଆଇସୋଲେଶନରେ ପଠାଇବାକୁ ସମ୍ପୃକ୍ତ କ୍ଲିନିକର କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦିଆଯାଇଛି । ମାର୍ଚ୍ଚ ୧୦ରୁ ଏପର୍ଯ୍ୟନ୍ତ ଆକ୍ରାନ୍ତ ଜଣକ କାହା କାହା ସଂସ୍ପର୍ଶରେ ଆସିଥିଲେ, ସେନେଇ ମଧ୍ୟ ଅନୁସନ୍ଧାନ କରାଯାଉଛି । ସେହିପରି ଘରୋଇ କ୍ଲିନିକ ଗୁଡ଼ିକ ଏଭଳି କ୍ଷେତ୍ରରେ ଟିକିନିକି ତଥ୍ୟ ରାଜ୍ୟ ସରକାରଙ୍କୁ ଦେବାକୁ କୁହାଯାଇଛି । 

ଆକ୍ରାନ୍ତ ଜଣକ ଦିଲ୍ଲୀରୁ ଭୁବନେଶ୍ୱର ଯେଉଁ ବିମାନରେ ଆସିଥିଲେ, ସେହି ବିମାନର ଅନ୍ୟଯାତ୍ରୀଙ୍କ ବିଷୟରେ ମଧ୍ୟ ତଥ୍ୟ ସଂଗ୍ରହ କରାଯାଉଛି । ସେହିପରି ଘରକୁ ଫେରିବା ପରେ ସେ କେଉଁମାନଙ୍କ ସହ ମିଶିଥିଲେ, ସେନେଇ ମଧ୍ୟ ସ୍ୱାସ୍ଥ୍ୟ ବିଭାଗ ପକ୍ଷରୁ ଅନୁସନ୍ଧାନ କରାଯାଉଛି । 

ତେବେ ଏଠାରେ ଅନ୍ୟ କିଛି ପ୍ରଶ୍ନ ମଧ୍ୟ ସାମ୍ନାକୁ ଆସୁଛି । ବିଦେଶ କିମ୍ବା ବାହାର ରାଜ୍ୟରୁ ଓଡ଼ିଶାକୁ ଫେରୁଥିବା ବ୍ୟକ୍ତି ବିଶେଷ ରାଜ୍ୟ ସରକାରଙ୍କ କୋଭିଡ୍ ୧୯ ୱେବ ସାଇଟରେ ତଥ୍ୟ ଦେବାକୁ ଯେଉଁ ଗାଇଡଲାଇନ ରହିଛି, ତାହା ସମ୍ପୃକ୍ତ ବ୍ୟକ୍ତି ପାଳନ କରିଛନ୍ତି ତ ? ସମ୍ପୃକ୍ତ ବ୍ୟକ୍ତିଙ୍କଠାରେ ଫ୍ଲୁ ଲକ୍ଷଣ ଦେଖିବା ପରେ କର କ୍ଲିନିକ ପକ୍ଷରୁ ରାଜ୍ୟ ସରକାରଙ୍କୁ ତୁରନ୍ତ କାହିଁକି ଅବଗତ କରାଯାଇନଥିଲା ? ଏପରିକି ଆକ୍ରାନ୍ତ ଜଣକ ୨୧ ତାରିଖରେ ଯେତେବେଳେ କର କ୍ଲିନିକ ଓପିଡିକୁ ଯାଇଥିଲେ, ସେହି ସମୟରେ ଅନ୍ୟ କେଉଁ ରୋଗୀ ଉପସ୍ଥିତ ଥିଲେ ? କାହିଁକିନା ଏବେ ସେ ସମସ୍ତଙ୍କୁ ଆଇସୋଲେଶନରେ ରଖିବା ନିହାତୀ ଦରକାର । 

ଅନ୍ୟପଟେ ଏସବୁ ଭିତରେ ରାଜ୍ୟ ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ବର୍ତ୍ତମାନ ପାଇଁ କର କ୍ଲିନିକକୁ କେହି ମଧ୍ୟ ଚିକିତ୍ସା ପାଇଁ ନଯିବାକୁ ଜନ ସାଧାରଣଙ୍କୁ ପରାମର୍ଶ ଦିଆଯାଇଛି । କାହିଁକିନା ଯେହେତୁ ଆକ୍ରାନ୍ତ ଜଣକ ଏହି ମେଡିକାଲରେ ଭର୍ତ୍ତି ହୋଇଥିଲେ, ତେଣୁ ସେ କ୍ଲିନିକର କିଛି କର୍ମଚାରୀଙ୍କ ସଂସ୍ପର୍ଶରେ ଆସିଥିବେ ନିଶ୍ଚୟ । ବର୍ତ୍ତମାନ ସେ ସମସ୍ତଙ୍କୁ ଆଇସୋଲେଶନରେ ରଖିବାକୁ ହେବ ।