ଖୁବ ଶୀଘ୍ର ରାଜଧାନୀ ଉନ୍ନତିକରଣ କାମ ଆରମ୍ଭ କରିବ ବିଡିଏ

ସରୋଜ ବେହେରା, ଭୁବନେଶ୍ୱର: କୋରୋନା କଟକଣା ଲକଡାଉନ ସରିବା ପରେ ରାଜଧାନୀ ସହରୀକରଣ କାର୍ଯ୍ୟକ୍ରମ ଆରମ୍ଭ କରିବାକୁ ଯୋଜନା ରଖିଛି ଭୁବନେଶ୍ୱର ଉନ୍ନୟନ କତ୍ତୃପକ୍ଷ-ବିଡିଏ(BDA-Bhubaneswar Development Authority) । ଆନ୍ତର୍ଜାତୀୟ ବସ ଟର୍ମିନାଲ-ଆଇଏସବିଟି(ISBT-International Bus terminal), ଭୁବନେଶ୍ୱର ଟାଉନ ସେଣ୍ଟର ପ୍ରୋଜେକ୍ଟ(Bhubaneswar Town Center Project), ଟାଉନ ପ୍ଲାନିଂ (Town Planning) ଭଳି ଯୋଜନାକୁ ତ୍ୱାରାନ୍ୱିତ କରିବାକୁ ପ୍ରୟାସ ଆରମ୍ଭ କରିଛି ବିଡିଏ । 

ଆଇଏସବିଟି ପାଇଁ କେନ୍ଦ୍ରର  ଅନୁମତି ପାଇବା ବିଡିଏ ପାଇଁ ବଡ ସଫଳତା ଥିବା ବେଳେ, ଯଥାଶୀଘ୍ର ୩୦୦୦ ଗୃହକର୍ତାଙ୍କୁ ପଟ୍ଟା ଦେବା ପ୍ରକ୍ରିୟା ଆରମ୍ଭ କରାଯାଇଛି । କୋରୋନା ସମୟରେ ତରବରରେ ଯୋଜନାକୁ କାର୍ଯ୍ୟକାରୀ କରିବାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ସାଧାରଣ ଲୋକଙ୍କ କେବଳ ଜୀବନ ଯାତ୍ରା ନୁହଁ ସହର ଉନ୍ନତିକରଣ ଭଳି କାର୍ଯ୍ୟକୁ ଅଧାରେ ଅଟକାଇ ଦେଇଛି କୋରୋନା ମହାମାରୀ (Corona Pandemic) ।  

ନିଜର ଆର୍ଥିକ ବ୍ୟବସ୍ଥାକୁ ସୁଧାରିବାକୁ ଅଣ୍ଟା ଭିଡିଥିବା ବେଳେ କୋରୋନା ହଠାତ୍ ତାଲା ପକାଇ ଦେଇଥିଲା । ଏଥିରେ ରାଜ୍ୟର ଉନ୍ନତିକରଣ କାମ ମଧ୍ୟ ଠପ ହୋଇଯାଇଥିଲା । ଧିରେ ଧିରେ କୋରୋନା ମହାମାରୀର ପ୍ରକୋପ କମିବାରେ ଲାଗିଛି। ଲକଡାଉନ ସଟଡାଉନ ଭଳି ବ୍ୟବସ୍ଥାକୁ ଏବେ ବନ୍ଦ କରାଯାଇଛି । ଏହାକୁ ନଜରରେ ରଖି ସହରକୁ ମୁଖ୍ୟ ସ୍ରୋତକୁ ଫେରାଇ ଆଣିବାକୁ ଚେଷ୍ଟା ଆରମ୍ଭ କରିଛନ୍ତି ରାଜ୍ୟ ସରକାର । ରାଜଧାନୀ ଭୁବନେଶ୍ୱର ମଧ୍ୟ ନିଜ ସୁନ୍ଦରତାକୁ ପୁଣି ଥରେ ଫେରାଇ ଆଣିବା ସହ ଏହାକୁ କିଭଳି ଅନ୍ୟ ସ୍ମାର୍ଟ ସିଟି ସହ ମୁକାବିଲା କରିପାରିବ ସେଥିପାଇଁ ପ୍ରୟାସ ଆରମ୍ଭ କରାଯାଉଛି । 

ପ୍ରଥମିକ ପର୍ଯ୍ୟାୟରେ ରାଜଧାନୀରେ ଲୋକଙ୍କ ସଂଖ୍ୟା ବୃଦ୍ଧିକୁ ନଜରରେ ରଖି ସହର ବିସ୍ତାର କରିବା ସହ ୩ ହଜାର ଲୋକଙ୍କୁ ପଟ୍ଟା ପ୍ରଦାନ କରାଯିବ । ଏଥିପାଇଁ ଭୁବନେଶ୍ବର ଉପକଣ୍ଠ ପାଇକରାପୁର, ତମାଣ୍ଡୋ, ବିଜିପୁର ଆଦି ଅଞ୍ଚଳରେ ରହୁଥିବା ଗ୍ରାମବାସୀଙ୍କ ଜମିକୁ ସହରୀକରଣ ଯୋଜନାରେ ଅନ୍ତର୍ଭୂକ୍ତ କରାଯାଇଛି । ପରବର୍ତ୍ତୀ ସମୟରେ ରାଜଧାନୀ ଉପକଣ୍ଠରେ ଥିବା ୧୧ଟି ଟାଉନ ପ୍ଲାନିଂ ଯୋଜନାରେ ଅନ୍ତର୍ଭୁକ୍ତ ଜମିକୁ ଯୋଡି ରାସ୍ତା କାମ ଆରମ୍ଭ କରାଯିବ । 

ଭୁବନେଶ୍ୱର ଟାଉନ ସେଣ୍ଟର ପ୍ରୋଜେକ୍ଟ ପାଇଁ ଅଭିନବ ଡିଜାଇନ୍ ସହ ୮ କୋଟିରୁ ଅଧିକ ଟଙ୍କା ଖର୍ଚ୍ଚ ଅଟକଳ କରାଯାଇଥିଲା । ପ୍ରାୟ ୧୨ ଏକର ଜମିରେ ବିଡିଏ ଦ୍ୱାରା ଏହି ପ୍ରକଳ୍ପ ପ୍ରସ୍ତୁତ କରାଯିବାକୁ ଯୋଜନା ରହିଛି । ଯେହେତୁ ପ୍ରୋଜେକ୍ଟ ସାଇଟ୍ (Project Site) ଭୁବନେଶ୍ୱର ଟାଉନ୍ ସେଣ୍ଟର୍ ସ୍ମାର୍ଟ ଜିଲ୍ଲା ମଧ୍ୟରେ ସହରର ମୁଖ୍ୟ ରେଳ ଷ୍ଟେସନ୍ ସହିତ ଏହାର ସ୍ଥାନ ବାଣ୍ଟିଛି, ଉଭୟ ପୂର୍ବତଟ ରେଳବାଇ (East Coast Railway) ଏବଂ ଭୁବନେଶ୍ୱର ସ୍ମାର୍ଟ ସିଟି ଲିମିଟେଡ୍ (Bhubaneswar Smart City Limited) ଏହି ପ୍ରକଳ୍ପର ଗୁରୁତ୍ୱପୂର୍ଣ୍ଣ ଅଂଶୀଦାର ହେବେ। 

ଏହାର କାର୍ଯ୍ୟକାରିତା ସମୟରେ ପରାମର୍ଶ ଦିଆଯିବ ବୋଲି କୁହାଯାଇଥିଲା । ସିଙ୍ଗାପୁର ଭିତ୍ତିକ କମ୍ପାନୀ (Singapore Based Company) ଏହାର ସମସାମୟିକ ଡିଜାଇନ୍ ଏବଂ ପାରମ୍ପାରିକ ମନ୍ଦିର ନିର୍ମାଣ ସ୍ଥାପତ୍ୟର ଅନନ୍ୟ ମିଶ୍ରଣ ସହିତ ବିଡ୍ ଜିତିଥିଲା । ଏବେ କୋଭିଡ କଟକଣା ମଧ୍ୟରେ ଏତେ ବଡ ପ୍ରକଳ୍ପ କରିବା ପାଇଁ ସରକାର ପିପିପି ମୋଡରେ (PPP-Public Private Partnership) କାମ ଆରମ୍ଭ କରିପାରିବ କି ନାହିଁ ତାହାକୁ ନେଇ ଅନେକ କଳ୍ପନାଜଳ୍ପନା ଆରମ୍ଭ ହୋଇଛି । ସରକାର ଏଥିପାଇଁ କିଛି ସମୟ ନେଇ ପୁଣି ବିଚାର କରି କାମ ଆରମ୍ଭ କଲେ ଯୋଜନା ଫଳପ୍ରଦ ହୋଇପାରିବ ବୋଲି ବିଶେଷଜ୍ଞ କହିଛନ୍ତି ।