ସାମାଜିକ ଦୂରତ୍ୱ ଉପରେ କମିଶନରେଟ ପୋଲିସର ଗୁରୁତ୍ୱ, ଏମିତି ସାବାଡ୍ ହେଉଛନ୍ତି ଉଲଂଘନକାରୀ

ସରୋଜ ବେହେରା, ଭୁବନେଶ୍ୱର: ତୃତୀୟ ପ୍ରର୍ଯ୍ୟାୟ ଲକଡାଉନ ସମୟରେ ସରକାର ଅର୍ଥନୈତିକ କାର୍ଯ୍ୟକଳାପକୁ ଗୁରୁତ୍ୱ ଦେଉଛନ୍ତି । ଏହାକୁ ନଜରରେ ରଖି ସହରରେ କେତେକ ଦୋକାନ ବଜାର ଖୋଲିବାକୁ ଅନୁମତି ଦିଆଯାଇଛି । ହେଲେ ଏହି ସମୟରେ ସାମାଜିକ ଦୂରତା ରଖିବା ନିତାନ୍ତ ଆବଶ୍ୟକ । ତେଣୁ କମିଶନରେଟ ପୁଲିସ ପକ୍ଷରୁ ଏହାକୁ ଗୁରୁତ୍ୱ ଦିଆଯାଉଛି । ଲୋକଙ୍କୁ ସଚେତନ କରିବା ସହ ଆଇନ ଉଲଂଘନକାରୀଙ୍କ ଠାରୁ ଜୋରିମାନା ଆଦାୟ ଲାଗି ସ୍ୱତନ୍ତ୍ର ସାମାଜିକ ଦୂରତ୍ୱ ବାଧ୍ୟତାମୂଳକ ଟିମ ବା ସୋସିଆଲ ଡିସଷ୍ଟାଣ୍ଡର୍ସ ଏନଫୋର୍ସମେଣ୍ଟ ସ୍କ୍ୱାର୍ଡର୍ ଗଠନ କରାଯାଇଛି । ଏନେଇ ପୋଲିସ କମିଶନର ଡ. ସୁଧାଂଶୁ ଷଡଙ୍ଗୀ କହିଛନ୍ତି ।

ଗୁରୁବାର ଗଣମାଧ୍ୟମକୁ ସୂଚନା ଦେଇ ଡ. ଷଡଙ୍ଗୀ କହିଛନ୍ତି, କୋରୋନା ଭୂତାଣୁ ଲାଗି କୌଣସି ମେଡିସିନ କିମ୍ବା ଟୀକା ବାହାରିନାହିଁ । ତେଣୁ ଏଥିରୁ ରକ୍ଷା ପାଇବା ଲାଗି ସାମାଜିକ ଦୂରତା ଏକମାତ୍ର ବିକଳ୍ପ ରହିଛି । ତେଣୁ ଦୋକାନ ବଜାରକୁ ଆସୁଥିବା ଲୋକେ କିପରି ସାମାଜିକ ଦୂରତା ରକ୍ଷା ଲାଗି କିଛିଦିନ ହେଲା ସଚେତନ କରାଯାଉଥିଲା । ହେଲେ ଲୋକେ ସଚେତନ ନ ହେବାରୁ ପୁଲିସକୁ ଟିକେ କଠୋର ହେବାକୁ ପଡିଛି । ସେଥିପାଇଁ  ସୋସିଆଲ ଡିସଷ୍ଟାଣ୍ଡର୍ସ ଏନଫୋର୍ସମେଣ୍ଟ ସ୍କ୍ୱାର୍ଡର୍ ଗଠନ କରାଯାଇଛି ।

ପ୍ରତି ଥାନା ଅଞ୍ଚଳରେ ୩ଟି ଟିମ ଗଠନ କରାଯାଇଛି । ଥାନାର ସମ୍ବଳକୁ ଦେଖି ଥାନା ଅଧିକାରୀମାନେ କେତେ କର୍ମଚାରୀମାନଙ୍କୁ ସ୍କ୍ୱାର୍ଡରେ ସାମିଲ କରିବେ ତାହା ସେମାନେ ବିଚାର କରିବେ । ସେହିଭଳି ରାସ୍ତା ପାଶ୍ୱର୍ରେ ଡ୍ୟୁଟି କରୁଥିବା ପୁଲିସ କର୍ମଚାରୀମାନେ ଏଣିକି ଆଉ ରହିବେ ନାହିଁ । ସେମାନେ ସ୍କ୍ୱାଡ ସହ ଯାଇ ଡ୍ୟୁଟି କରିବେ । ଟ୍ରାଫିକ ଛକଗୁଡ଼ିକରେ ଟ୍ରାଫିକ ପୁଲିସ ଡ୍ୟୁଟି କରିବେ । ଗୁରୁବାର ଠାରୁ ରାଜଧାନୀ ଭୁବନେଶ୍ୱରର ସମସ୍ତ ଅଞ୍ଚଳରେ ସ୍ୱତନ୍ତ୍ର ସ୍କ୍ୱାର୍ଡ ଟିମ୍‍ ବୁଲିବା ଆରମ୍ଭ କରିଛନ୍ତି । ସେହିଭଳି ଦୁଇଟି ଜୋନ୍‍ ପାଇଁ ଗୋଟିଏ ପ୍ଳାଟୁନ ପୁଲିସ ଫୋର୍ସଙ୍କୁ ମୁତୟନ ଯୋଗାଇ ଦିଆଯାଇଛି । 

ଗୁରୁବାର ବାପୁଜୀନଗର ମାର୍କେଟରୁ ଏହି ଅଭିଯାନ ଆରମ୍ଭ ହୋଇଥିବା ବେଳେ ପରେ ଖଣ୍ଡଗିରି, ଡୁମୁଡୁମା, ଜୟଦେବ ବିହାର, ଆଚାର୍ଯ୍ୟ ବିହାର, ରାଜମହଲ, କଳ୍ପନା, ଡେଲଟା, ନୂଆପଲ୍ଳୀ, ଚନ୍ଦ୍ରଶେଖରପୁର, ପଟିଆ, ମଞ୍ଚେଶ୍ୱର, ସହିଦନଗର, ଇନ୍‍ଫୋସିଟି ଓ ନନ୍ଦକାନନ ଥାନା ଅଞ୍ଚଳରେ ବୁଲି ବ୍ୟବସାୟୀ ଓ ଗ୍ରାହକଙ୍କୁ ସଚେତନ କରିଥିଲେ ।

ସ୍ୱତନ୍ତ୍ର ସ୍କ୍ୱାଡର ଅଫିସରମାନେ ବୁଲି ବୁଲି ଲୋକମାନଙ୍କୁ ସଚେତନ କରିବା ସହ ସାମାଜିକ ଦୂରତ୍ୱ ରକ୍ଷା କରିବାକୁ ପରାମର୍ଶ ଦେଇଛନ୍ତି । ମାର୍କେଟ ଭିତରେ ଭିଡ଼ ନ କରି ସମସ୍ତେ ସାମାଜିକ ଦୂରତ୍ୱ ରକ୍ଷା କରିବାକୁ କୁହାଯାଇଛି । କେତେକ ସ୍ଥାନରେ ଲୋକେ ସାମାଜିକ ଦୂରତ୍ୱ ରକ୍ଷା କରି ନ ଥିବାରୁ ପୁଲିସ ୨୭୫ ଜଣଙ୍କଠାରୁ ଫାଇନ୍‍ ଆଦାୟ କରିଛି । ରାଜଧାନୀର ବିଭିନ୍ନ ମାର୍କେଟକୁ ବୁଲି ଉଭୟ ଦୋକାନୀ ଓ ଗ୍ରାହକମାନଙ୍କୁ ସଚେତନ କରାଯାଉଛି । ଏହି ସ୍କାର୍ଡ ଡିସିପି ଅନୁପ ସାହୁ, ଟ୍ରାଫିକ୍ ଡିସିପି ସାଗରିକ, ଡିସିପି (ସିକ୍ୟୁରିଟି) ନିର୍ମଳ ଚନ୍ଦ୍ର ଶତପଥି ଓ ଜୋନ୍ ଏସିପିମାନଙ୍କ  ନେତୃତ୍ୱରେ ପରିଚାଳିତ ହୋଇଥିଲା ।