କୋରୋନା ମୁକାବିଲା: ଘର ଘର ବୁଲି ସ୍ୱାସ୍ଥ୍ୟ ପରୀକ୍ଷା କରୁଛି ଆର.ଆର.ଟି

ଶାନ୍ତସ୍ୱରୂପ ରାଉତ, ଭୁବନେଶ୍ୱର: କୋରୋନା ମହାମାରୀର (Corona Pandemic) ମୁକାବିଲା ଲାଗି ବିଭିନ୍ନ ସ୍ତରରେ ଉଦ୍ୟମ ଜାରି ରଖିଛି ଭୁବନେଶ୍ୱର ମହାନଗର ନିଗମ-ବିଏମସି (BMC-Bhubaneswar Municpal Corporation) । ଏହି କ୍ରମରେ ଶନିବାର (ସେପ୍ଟମ୍ବର ୧୨, ୨୦୨୦) ଠାରୁ ରାଜଧାନୀରେ ଆରମ୍ଭ ହୋଇଛି ମେଗା ହେଲଥ ସ୍କ୍ରିନିଂ (Mega Health Screening)। 

ବିଏମସି ଦ୍ୱାରା ଗଠିତ ଟିମ ଭୁବନେଶ୍ୱରର ପ୍ରତିଟି ୱାର୍ଡରେ ଘର ଘର ବୁଲି ହେଲଥ ଚେକ ଅପ୍ (Health Check Up) କରିଛନ୍ତି । ଏଥିପାଇଁ ୫୬୫ଟି ରାପିଡ ରେସପନ୍ସ ଟିମ-ଆର.ଆର.ଟି (RRT-Rapid Response Team) ଗଠନ କରାଯାଇଛି । ଏହି ଟିମରେ ୧୦୦ ଆୟୁଷ ଡାକ୍ତର (Ayush Doctor), ୫୦ ଜଣ ଏ.ଏନ.ଏମ (ANM), ୧୪୦ ଜଣ ଶିକ୍ଷକ ଅଛନ୍ତି । ଗୋଟିଏ ପରିବାରର ସମସ୍ତ ସଦସ୍ୟଙ୍କ ରୋଗ ବିଷୟରେ ଜାଣିବା ତଥା ଯାଞ୍ଚ କରିବାକୁ ଏହି ପଦକ୍ଷେପ ଗ୍ରହଣ କରାଯାଇଛି । 

ସେମାନଙ୍କ ସହ ଆର.ଆର.ଟି ମଧ୍ୟ ବୁଲୁଛି । ଯଦି ଗୋଟିଏ ପରିବାରର କୌଣସି ସଦସ୍ୟଙ୍କ ଠାରେ କୋରନା ଲକ୍ଷଣ ଦେଖାଯାଏ, ତାହେଲେ ଆରଆରଟି ତାଙ୍କ ସହ ସିଧାସଳଖ ଯୋଗାଯୋଗ କରିବ । ଏବେ ୩ ସପ୍ତାହ ପର୍ଯ୍ୟନ୍ତ ଏହି ସ୍କ୍ରିନିଂ ଟେଷ୍ଟ (Screening Test) ଚାଲିବ ।