ଗରମ ଦିନରେ ବନ୍ଦ ପଡ଼ିଛି ଥଣ୍ଡା ବ୍ୟବସାୟ, ଦିନ ଗଣୁଚି ବ୍ୟବସାୟୀ

ଶାନ୍ତସ୍ୱରୂପ ରାଉତ, ଭୁବନେଶ୍ୱର: ଗରମ ଦିନରେ ଥଣ୍ଡା ବ୍ୟବସାୟ ବନ୍ଦ । କୋରୋନା ଭୂତାଣୁ ଅନେକ ବ୍ୟବସାୟର ମେରୁଦଣ୍ଡ ଭାଙ୍ଗି ଦେଇଥିବା ବେଳେ ମୃଦୁପାନୀୟ ବ୍ୟବସାୟୀମାନେ ଅଧିକ ପ୍ରଭାବିତ ହୋଇଛନ୍ତି । ଲକଡାଉନ ହେତୁ ଦୋକନ ବଜାର ବନ୍ଦ । ଚାରିଆଡେ ତାଲା ଆଉ ଏବେ ସାମାନ୍ୟ କୋହଳ ପରେ ବି ମୃଦୁପାନୀୟ ବ୍ୟବସାୟ ପାଇଁ ନାହିଁ ଅନୁମତି । ଲକଡାଉନ ହେତୁ ଚଳିତ ବାହାଘର ଋତୁ ଓ ଖରାଦିନିଆ ମୃଦୁପାନୀୟ ବେପାର ବି ଠପ୍ ।

ବେପାର ଠପ୍ । ମୃଦୁପାନୀୟ ବ୍ୟବସାୟରେ ଲକଡାଉନ ମାଡ଼ । ବ୍ୟବସାୟୀଙ୍କ କାରବାରରେ ଲାଗିଛି ତାଲା । ଦେଶରେ ତିନି ତିନି ଥର ଲକ୍ ଡାଉନ ପାଇଁ ବ୍ୟବସାୟୀ ମାନଙ୍କ ଆର୍ଥିକ ମେରୁଦଣ୍ଡ ସଙ୍କୁଚିତ ହୋଇଛି । ବିଶ୍ୱାସ ଲାଗୁ ନ ଥିବା ଭଳି କଥା ଯେ, ଗରମ ଦିନରେ ଥଣ୍ଡା ପାନୀୟ ବ୍ୟବସାୟ ସମ୍ପୁର୍ଣ୍ଣ ଠପ୍ ହୋଇଯାଇଛି । ଡିଲର ହେଉ କି ରିଟେଲର ସଭିଏଁ କ୍ଷତି ସହୁଛନ୍ତି । ଆଇସକ୍ରିମ୍, କୋଲ୍ଡ ଡ୍ରିଙ୍ଗ୍ସ ଆଦି ମୃଦୁପାନୀୟ ବିତରଣ ବନ୍ଦ ହୋଇଯାଇଥିବାରୁ ଡିଲରମାନେ କେବଳ ଗୋଦାମରେ ମାଲ ଗଚ୍ଛିତ ରଖି ବିଦ୍ୟୁତ ବିଲ୍ ବଢାଇବା ହିଁ ସାର ହୋଇଛି ।

କେବଳ ଡିଲର ନୁହେଁ, ରିଟେଲର ଓ ଠେଲା ଗାଡି ବ୍ୟବସାୟୀଙ୍କ ମଧ୍ୟ ଅବସ୍ଥା ତଦ୍ରୁପ । ଲକଡାଉନ୍ ଆରମ୍ଭରୁ ଏସବୁ ସାମଗ୍ରୀ ବିକ୍ରିବଟା ଓ ବିତରଣ ଉପରେ ରୋକ ଲାଗିଥିବା ବେଳେ ଏବେ କାଁ ଭାଁ ଜୋନ ଆଧାରରେ ଦୋକାନ ଖୋଲିଛି ହେଲେ ଏସବୁ ସାମଗ୍ରୀର ବିକ୍ରିବଟା କେବେ ଆରମ୍ଭ ହେବ ତାକୁ ଅପେକ୍ଷା କରି ରହିଛନ୍ତି ବ୍ୟବସାୟୀ । ଗୋଟିଏ ପଟେ ବିବାହ ଋତୁ ଅନ୍ୟପଟେ ଗ୍ରୀଷ୍ମକାଳ । ହେଲେ କୋରୋନା ଭାଇରସ୍ ସବୁ ବେପାର ଛଡ଼େଇ ନେଇଛି ।