ଧର୍ମାନୁଷ୍ଠାନ ଖୋଲିବାକୁ ଜୋର ଧରୁଛି ଦାବି, ପ୍ରଶ୍ନ ଉଠାଇଲେ ବିରୋଧୀ

ମଳୟ ରଞ୍ଜନ ମହାନ୍ତି, ଭୁବନେଶ୍ୱର: ମଦ ଦୋକାନ ଖୋଲା। ସମସ୍ତ ବ୍ୟବସାୟିକ ପ୍ରତିଷ୍ଠାନ ଖୋଲା। ସବୁଆଡେ ମାଳମାଳ ଲୋକ। ସବୁକିଛି ସ୍ୱାଭାବିକ କରିବାକୁ ଉଦ୍ୟମ ଚାଲିଛି। କିନ୍ତୁ ରାଜ୍ୟର ସମସ୍ତ ଧର୍ମାନୁଷ୍ଠାନ ବନ୍ଦ। ଦୀର୍ଘ ମାସ ଧରି ଧର୍ମାନୁଷ୍ଠାନ ବନ୍ଦ ପଡିବା ଫଳରେ ଏହା ଉପରେ ନିର୍ଭର କରି ଚଳୁଥିବା ପୂଜକ ତଥା ଅନ୍ୟାନ୍ୟ ବର୍ଗର ପ୍ରାୟ ୫ ଲକ୍ଷରୁ ଅଧିକ ପରିବାର ବର୍ତ୍ତମାନ ଭୟାନକ ସ୍ଥିତିରେ ପହଞ୍ଚିଛନ୍ତି। ସ୍ଥିତି ଏପରି ହୋଇଛି ଯେ ପରିବାରକୁ ଗଣ୍ଡେ ଖାଇବାକୁ ଦେବାକୁ ଅର୍ଥ ନାହିଁ। 

କେନ୍ଦ୍ର ସରକାର ଦେଶ ସାରା ଧର୍ମାନୁଷ୍ଠାନ ଖୋଲିବାକୁ ଗାଇଡଲାଇନ କରିବା ପରେ ସାରା ଦେଶରେ ବହୁ ପ୍ରତିଷ୍ଠିତ ତଥା ଛୋଟବଡ ଧର୍ମାନୁଷ୍ଠାନ ଖୋଲିବା ସହ ସ୍ୱାଭାବିକ ଭାବେ କୋରୋନା ଗାଇଡଲାଇନ ଆଧାରରେ ପୂଜାର୍ଚନା ଚାଲିଛି କିନ୍ତୁ ଓଡିଶାରେ ଖୋଦ ଆଇନ ମନ୍ତ୍ରୀ ଧର୍ମାନୁଷ୍ଠାନ ଖୋଲିବା ନେଇ ବିଚାର କରାଯାଉଥିବା କହିବାର ମାସେ ବିତିଯାଇଥିଲେ ମଧ୍ୟ ଏ ଯାଏ କିଛି ନିଷ୍ପତ୍ତି ହୋଇନି। ଏହାକୁ ନେଇ ବିଭିନ୍ନ ମନ୍ଦିରର ପୂଜକ ତଥା ତଥା ଧର୍ମାନୁଷ୍ଠାନ ଉପରେ ନିର୍ଭର କରୁଥିବା ବ୍ୟକ୍ତି ବିଶେଷମାନେ ଅସନ୍ତୋଷ ପ୍ରକାଶ କରିବା ସହ ଭାଙ୍ଗିପଡିଛନ୍ତି। 

ଅନ୍ୟପକ୍ଷରେ ରାଜ୍ୟ ସରକାରଙ୍କ ଏଭଳି ନିଷ୍ପତ୍ତିକୁ ଜୋରଦାର ପ୍ରତିବାଦ କରିଛନ୍ତି ବିରୋଧୀ। କୋରୋନା ସଂକ୍ରମଣ ସତ୍ତ୍ୱେ ମଧ୍ୟ ସରକାର ସମସ୍ତ ବ୍ୟବସାୟିକ ପ୍ରତିଷ୍ଠାନ ତଥା ଅଫିସଗୁଡିକ ଠାରୁ ଆରମ୍ଭ କରି ସବୁଆଡୁ କଟକଣା ଉଠାଇ ସ୍ଥିତିକୁ ସ୍ୱଭାବିକ କରୁଛନ୍ତି। କିନ୍ତୁ କଣ ପାଇଁ ଧର୍ମାନୁଷ୍ଠାନ ବନ୍ଦ କରି ଉଭୟ ପୂଜକ ବର୍ଗଙ୍କ ପେଟକୁ ଲାତ ମାରିବା ସହ ଭକ୍ତଙ୍କ ଭାବାବେଗକୁ ମାଡ ମାରୁଛନ୍ତି ବୋଲି କଂଗ୍ରେସ ପ୍ରଶ୍ନ କରିଛି। ଏପରିକି ସରକାରଙ୍କ ଏହି ନିଷ୍ପତ୍ତି ଆଦୌ ଗ୍ରହଣୀୟ ନୁହେଁ ବୋଲି କଂଗ୍ରେସ ବିଧାୟକ ସୁରେଶ ରାଉତରାୟ କହିଛନ୍ତି। ଅନ୍ୟପକ୍ଷରେ ବିଜେପି ମଧ୍ୟ ଏ ପ୍ରସଙ୍ଗରେ ରାଜ୍ୟ ସରକାରଙ୍କ ଉପରେ ବର୍ଷିଛି। କେନ୍ଦ୍ରୀୟ ଗାଇଡଲାଇନ ଆଧାରରେ ସାରା ଦେଶରେ ଧର୍ମାନୁଷ୍ଠାନ ଖୋଲିଥିବା ବେଳେ ଓଡିଶା ସରକାର କଣ ପାଇଁ ଏ ସବୁକୁ ବନ୍ଦ କରି ରଖିଛନ୍ତି ବୋଲି ପ୍ରଶ୍ନ ଉଠିଛି। 

ଏପରିକି ଆଇନ ମନ୍ତ୍ରୀ ପୂର୍ବରୁ ଧର୍ମାନୁଷ୍ଠାନ ଖୋଲିବା ନେଇ ବିଚାର କରାଯାଉଥିବା କହିଥିବାବେଳେ ଏବେ ସେ ନିଷ୍ପତ୍ତି କୁଆଡେ ଗଲା ବୋଲି ପ୍ରଶ୍ନ କରିଛନ୍ତି ବିଜେପିର ବରିଷ୍ଠ ନେତା ପ୍ରଦୀପ ପୁରୋହିତ। ଅନ୍ୟପକ୍ଷରେ ଶାସକ ଦଳର କହିବା କଥା ରାଜ୍ୟର କୋରୋନା ସ୍ଥିତି ଏବଂ ଆବଶ୍ୟକତାକୁ ଆଖି ଆଗରେ ରଖି ସରକାର ଧୀରେଧୀରେ କଟକଣା କୋହଳ କରୁଛନ୍ତି। ତେଣୁ ଧର୍ମାନୁଷ୍ଠାନ ପ୍ରସଙ୍ଗରେ ମଧ୍ୟ ସ୍ଥିତିକୁ ଦେଖି ସରକାର ନିଷ୍ପତ୍ତି ନେବେ ବୋଲି ଶାସକ ଦଳର ବିଧାୟକ ଅମର ଶତପଥୀ କହିଛନ୍ତି। 

ପୁରୀର ଜଗନ୍ନାଥ ମନ୍ଦିରଠାରୁ ଆରମ୍ଭ କରି ଭୁବନେଶ୍ୱରର ଲିଙ୍ଗରାଜ ମନ୍ଦିର ଏବଂ ରାଜ୍ୟରେ ଥିବା ପ୍ରସିଦ୍ଧ ମନ୍ଦିର ସବୁ ବନ୍ଦ ହୋଇ ରହିଛି। ଏପରିକି ପୁରୀଠାରୁ ଆରମ୍ଭ କରି ସାରା ରାଜ୍ୟରେ ଯାତାୟତ, ପର୍ଯ୍ୟଟନ ବ୍ୟବସ୍ଥା ସ୍ୱାଭାବିକ ହେଉଥିବା ବେଳେ କୋରୋନା ଗାଇଡଲାଇନ ଆଧାରରେ ମନ୍ଦିରରେ ଦର୍ଶନ ଏବଂ ପୂଜା କାର୍ଯ୍ୟ ହୋଇପାରିବ ବୋଲି ମନ୍ଦିରଗୁଡିକର ଦାୟିତ୍ୱରେ ଥିବା ଅଧିକାରୀମାନେ କହିଛନ୍ତି। ତେଣୁ ଏ ସବୁ ସତ୍ତ୍ୱେ ମଧ୍ୟ ରାଜ୍ୟ ସରକାର କାହିଁକି ଧର୍ମାନୁଷ୍ଠାନ ଖୋଲିବା ନେଇ ନିଷ୍ପତ୍ତି ନେଉନାହାନ୍ତି ତାକୁ ନେଇ ଚର୍ଚ୍ଚା ଜୋର ଧରିଛି।