ନିଶା କବଳରେ ଶିକ୍ଷା ହବ, ସବୁ ଜାଣି ସଭିଏଁ ଚୁପ୍

ବିଭୂତି ଭୂଷଣ ଦାସ, ଭୁବନେଶ୍ୱର: ଏବେ ନିଶାରେ ଚୂର୍ ଯୁବପିଢ଼ି । ନିଶାର ଚକ୍ରବ୍ୟୂହରେ ଫସିଛି ଶିକ୍ଷା ହବ୍ ।  ବିଶେଷ କରି ୧୫,୧୬ବର୍ଷରୁ ଆରମ୍ଭ କରି ବୟସ୍କ ଯୁବଗୋଷ୍ଠୀ ନିଶା ଫାଶରେ ପଡ଼ୁଥିବା ବେଳେ ଉଜୁଡ଼ି ଯାଉଛି ପରିବାର । ରୋଗ, ଅଭାବନୀୟ କାଣ୍ଡ ପାଇଁ ଅକାଳେ ଜୀବନ ଝଡ଼ି ପଡୁଛି । ନିଶା ସେବନ କରି ଗାଡ଼ିମଟର ଚଳାଉଥିବା ବେଳେ ଦୁର୍ଘଟଣାରେ ପ୍ରାଣ ମଧ୍ୟ ହରାଉଛନ୍ତି । 

ହେଲେ ଦୁର୍ଘଟଣା କହି ଅସଲ କାରଣକୁ ଏଡ଼ାଇ ଦିଆଯାଉଛି । ଛୋଟ ଛୋଟ ପାନ ଦୋକାନଠାରୁ ଆରମ୍ଭ କରି ହୋଟେଲ୍, ଢାବା ଏବଂ ଅସାମାଜିକ ଯୁବକ ନିଶା ଦ୍ରବ୍ୟକୁ ଲୁଚାଣିଆ ବିକ୍ରି କରି ଲାଲେ ଲାଲ୍ ହେଉଛନ୍ତି । ଏହାର ନିରାକରଣ ପାଇଁ ପୋଲିସ, ଅବକାରୀ, ଡ୍ରଗ୍ସ କଣ୍ଟ୍ରୋଲ ବୋର୍ଡ ଆଦି ବିଭିନ୍ନ ବିଭାଗ ରହିଥିଲେ ମଧ୍ୟ ତତ୍ପରତା ଅଭାବରୁ ଦିନକୁ ଦ୍ରୁତ ଗତିରେ ବଢ଼ୁଛି ନିଶା ବେପାର । ଆଉ ଦେଶରେ ନିଶା କାରବାରର ନୂଆ ଠିକଣା ପାଲଟିଛି ଓଡିଶା । ରାଜଧାନୀ ଭୁବନେଶ୍ୱର ଠାରୁ ନେଇ ଉପକୂଳ ଓ ଉପାନ୍ତ ଜିଲ୍ଲାରେ ଚାଲିଛି ଜୋରଦାର ନିଶା କାରବାର । 

କବଳିତ କଲାଣି ଗଞ୍ଜେଇ, ଚରସ, ମଦ, ଗଞ୍ଜେଇ ସିଗାରେଟ୍, ଡେନ୍ ଡ୍ରାଇଟ୍, ଫେବି କୁଇକ୍ , ଅଫିମ ଏବଂ ବ୍ରାଉନ୍ ସୁଗାର । ଆଉ ଏସବୁ ନିଶାଡି ଓ ବେପାରୀଙ୍କ ଜଙ୍କସନ୍ ପାଲଟିଛି ରାଜଧାନୀ । ଯାହାକି ରାଜ୍ୟର ବିଭିନ୍ନ ସ୍ଥାନରୁ ଓଡିଶା ପୋଲିସ ଜବତ କରିଥିବା ବିପୁଳ ପରିମାଣର ବ୍ରାଉନ୍ ସୁଗାର ଓ ଗଞ୍ଜେଇରୁ ସ୍ପଷ୍ଟ ହେଉଛି । ବର୍ଷକ ମଧ୍ୟରେ କ୍ରାଇମବ୍ରାଞ୍ଚ ଏସଟିଏଫ୍ ଭୁବନେଶ୍ୱର ସମେତ ବିଭିନ୍ନ ଜିଲ୍ଲାରୁ ଜବତ କରିଛି ୨୭ କେଜିରୁ ଅଧିକ ବ୍ରାଉନସୁଗାର । ୨୨ଟି ମାମଲା ରୁଜୁ କରିବା ସହ ୪୩ ଜଣ ବେପାରୀଙ୍କୁ ଗିରଫ କରିଛି। 

• ଅଗଷ୍ଟ ୨୮-ବାଲେଶ୍ୱର ଜମାଲପୁରରୁ ୪କେଜି ୨୫ ଗ୍ରାମ ଡ୍ରଗ୍ସ ଜବତ, ୩ ଗିରଫ
• ଅଗଷ୍ଟ ୧୮-ବାଲେଶ୍ୱର ଜିଲ୍ଲା ବସଷ୍ଟାଣ୍ଡ ନିକଟରୁ ଏକ କେଜି ୩୨୦ ଗ୍ରାମ ବ୍ରାଉନ ସୁଗାର ଜବତ, ଜଣେ ଇଂଜିନିୟରିଂ ଛାତ୍ର ଗିରଫ
• ଜୁନ୍ ୧୯-ଭୁବନେଶ୍ୱର ରସୁଲଗଡ ଅଞ୍ଚଳରୁ ୪ କେଜି ୪୮୫ ଗ୍ରାମ ବ୍ରାଉନ୍ ସୁଗାର ଜବତ, ୩ ଗିରଫ
• ୧୯ ଜୁଲାଇ-ବରମୁଣ୍ଡା ଅଞ୍ଚଳରୁ ୩ କେଜି ୨୮୫ ଗ୍ରାମ ବ୍ରାଉନ୍ ସୁଗାର ଜବତ, ୨ ଗିରଫ
• ୨ ଜୁନ-ଖୋର୍ଦ୍ଧାରୁ ଏକ କେଜି ବ୍ରାଉନ ସୁଗାର ଜବତ 
• ୧୯ ମାର୍ଚ୍ଚ-ପୁଣି ରାଜଧାନୀରୁ ୨ କେଜି ବ୍ରାଉନ୍ ସୁଗାର ଜବତ 

ଚଳିତ ବର୍ଷ ଜୁଲାଇ ଶେଷ ସୁଦ୍ଧା ୬୧୪ କ୍ବିଣ୍ଟାଲରୁ ଅଧିକ ଗଞ୍ଜେଇ ଜବତ କଲାଣି ଏସଟିଏଫ୍ । ୨୦୧୮ରେ ୫୨୩ କ୍ୱିଣ୍ଟାଲ ଗଞ୍ଜେଇ ଜବତ ହୋଇଥିଲା । ଏହି ତଥ୍ୟରୁ ଏହା ସ୍ପଷ୍ଟ ଯେ ଓଡିଶାରେ ଏବେ ସକ୍ରିୟ ଅଛନ୍ତି ନିଶା ବେପାରୀ । ଭୁବନେଶ୍ୱର ପୂର୍ବ ଭାରତର ଅଗ୍ରଣୀ ଓ ଦ୍ରୁତ ଅଭିବୃଦ୍ଧି ହେଉଥିବା ସହର ହୋଇଥିବାରୁ ଏଠାରେ ଶିକ୍ଷାନୁଷ୍ଠାନ, ଶିଳ୍ପ, କର୍ପୋରେଟ୍, ବିଜନେସ ହବ୍ ଆଦି ବୃଦ୍ଧି ପାଉଛି । ସେହି ଅନୁପାତରେ ନିଶାର ଚାହିଦା ବଢୁଛି ବୋଲି କହିଛନ୍ତି ଅବକାରୀ ବିଶେଷଜ୍ଞ । ନେପାଳ, ମିଆଁମାର୍ ବାଲାଂଦେଶରୁ କୋଲକାତା, ପରେ ବାଲେଶ୍ୱର ହୋଇ ଭୁବନେଶ୍ୱର ଓ ଏହାର ଆଖପାଖ ଜିଲ୍ଲାରେ ପହଞ୍ଚୁଛି ଡ୍ରଗ୍ସ । କିଛି ଦିନ ତଳେ ଜାତୀୟ ଗଣମାଧ୍ୟମରେ ହୋଇଥିବା ଚର୍ଚ୍ଚା ଅନୁସାରେ ବଲିଉଡ୍ ଅଭିନେତ୍ରୀ ରିୟା ଚକ୍ରବର୍ତ୍ତୀ ଗଞ୍ଜେଇ ବ୍ୟବସାୟ ପାଇଁ ଭୁବନେଶ୍ୱର ଆସିଥିଲେ । ଯେଉଁଥିରେ ସେ ଓଡିଶାରେ ମିଳୁଥିବା ଗଞ୍ଜେଇ ଆବଶ୍ୟକ ବୋଲି ମଧ୍ୟ ଉଲ୍ଲେଖ କରିଥିଲେ । 

ନିଶାଡି ଓ ବେପାରୀଙ୍କୁ ପ୍ରୋତ୍ସାହନ ଦେଇ ଆସୁଛନ୍ତି ସ୍ଥାନୀୟ ପୋଲିସ ଓ ଅବକାରୀ ଅଧିକାରୀ । ଯାହାର ପ୍ରମାଣ ବି ସାମ୍ନାକୁ ଆସିଛି...ଡ୍ରଗ୍ସ ମାଫିଆଙ୍କ ସହ ଲିଙ୍କ ଅଭିଯୋଗରେ ଜଳେଶ୍ୱର ଥାନା ଅଧିକାରୀ ଧନେଶ୍ୱର ସାହୁଙ୍କୁ ଡିଜିପି ନିଲମ୍ବନ କରିଛନ୍ତି । ଚେରକୁ ଉପାଡ଼ି ପାରୁନି...ଯଥାପୂର୍ବଂ ତଥାପରଂ ନ୍ୟାୟରେ ନିଶା କାରବାର ବେଧଡ଼କ ଚାଲୁଛି । ଏବେବି ସଞ୍ଜ ନଇଁଲେ ବିଭିନ୍ନ ଶିକ୍ଷାନୁଷ୍ଠାନ କ୍ୟାମ୍ପସ୍ , ପାନ, ଚା ଦୋକାନ, ହୋଟେଲ୍, ରେସ୍ତୁରାଁ, ଢାବାରେ ଜମୁଛି ଆସର ।